قوستاناي وبلىستىق تاريحي-ولكەتانۋ مۋزەيىنىڭ قورىندا قىلقالام شەبەرى ءابىلحان قاستەەۆتىڭ ون شاقتى تۋىندىسى ساقتالعان. ونىڭ ىشىندە امانگەلدى باستاعان تورعايداعى ۇلت-ازاتتىق كوتەرىلىسكە قاتىسقان ءابجان تۇرمانوۆ, سەيىتماعانبەت دەمەسىنوۆ, سىزدىق جانتىلەۋوۆتىڭ پورترەتى بار.
مۋزەي قورى, سونىمەن قاتار, حالىق سۋرەتشىسى كەنەپكە تۇسىرگەن «امانگەلدى يمانوۆ وتريادى جورىقتا», «ەرتەگى وقۋ», «ۇجىمشار جايلاۋىندا», «الماتى ماڭى», «پوسەلوك» كوركەمسۋرەتتەرىن دە كوزدىڭ قاراشىعىنداي ساقتاپ وتىر.
«سۋرەتشىنىڭ شىعارماشىلىق مۇراسىندا پورترەت جانرى ماڭىزدى ورىن الادى. 1944 جىلى ءابىلحان قاستەەۆ حالىق قاھارمانى امانگەلدى يمانوۆتىڭ پورترەتىن سالعانىن بىلەسىزدەر. وسى ەڭبەگى ءۇشىن حالىق سۋرەتشىسى اتاعى بەرىلدى. ءابىلحان قاستەەۆ 20 جىلداي 1916 جىلعى تورعاي كوتەرىلىسى تاقىرىبىندا ەڭبەك ەتتى. امانگەلدى باتىردىڭ ۇزەڭگىلەس سەرىكتەرىنىڭ پورترەتتەرىن سالدى. ءبىرسىپىرا تۋىندىلارىندا وتكەن عاسىرداعى تاريحي وقيعالار كورىنىس تاپقان», دەيدى مۋزەيدىڭ عىلىمي قىزمەتكەرى ءنازيما وتاشەۆا.
مۇراجاي ماماندارىنىڭ ايتۋىنشا, ارتىندا بەس مىڭنان استام كوركەمسۋرەتتى مۇرا ەتىپ قالدىرعان قىلقالام شەبەرىنىڭ تۋىندىلارى ماسكەۋدەگى ترەتياكوۆ گالەرەياسىندا, كيەۆتەگى شەۆچەنكو مۋزەيىندە, قىرعىزستان, تاجىكستان مۋزەيلەرىندە, الماتى, استانا, قوستاناي جانە ەلىمىزدىڭ باسقا قالالارىنداعى گالەرەيالار مەن مۋزەيلەردە ساقتاۋلى تۇر.
قوستاناي وبلىسى