تۇركىستان وبلىسىندا «مەكتەپكە جول» اكتسياسى اياسىندا ءوڭىر بويىنشا شتاب قۇرىلىپ, وعان ءبىلىم, دەنساۋلىق, جۇمىسپەن قامتۋ الەۋمەتتىك باعدارلامالار باسقارمالارى, پوليتسيا, اۋدان, قالا اكىمىنىڭ ورىنباسارلارى, ءبىلىم ءبولىمىنىڭ باسشىلارى ەندى.
«ۇكىمەت قاۋلىسىنا سايكەس الەۋمەتتىك وسال توپ وتباسىنىڭ 5 ساناتىنا اۋداندىق, قالالىق ءبىلىم بولىمدەرى تاراپىنان اتا-انالارىنىڭ نەمەسە قامقورشىلارىنىڭ ەسەپشوتتارىنا اۋدارىلىپ جاتىر. جىل باسىندا ۇلتتىق ءبىلىم بەرۋ دەرەكتەر قورى نەگىزىندە 55 654 بالا انىقتالىپ, وعان 2 ملرد 415 ملن 773 مىڭ تەڭگە مەكتەپ فورماسى مەن وقۋ قۇرالدارىن الۋىنا قارجى قارالدى. بۇگىنگى تاڭدا, اتا-انالارىنىڭ بەرگەن وتىنىشتەرىنە سايكەس, اتالعان ساناتتاعى 9 078 بالانىڭ اتا-انالارىنىڭ ەسەپشوتتارىنا 414 ملن 016 مىڭ تەڭگە اۋدارىلدى. اتا-انالارىنىڭ بەرگەن وتىنىشتەرىنە سايكەس, ءارى قاراي قارجىنى اۋدارۋ جۇمىستارى جۇرگىزىلۋدە», دەلىنگەن وبلىس اكىمدىگى ءباسپاسوز قىزمەتىنىڭ بىزگە بەرگەن مالىمەتىندە.
سونداي-اق اۋدان, قالا اكىمدىكتەرىندە «مەكتەپكە جول» اكتسياسى شەڭبەرىندە الەۋمەتتىك وسال توپ وتباسىنىڭ بالالارىنا دەمەۋشىلەردىڭ كومەگىمەن وقۋ-قۇرالدارى مەن مەكتەپ فورماسى الىپ بەرىلۋدە. ال «حالىق بانكى» تۇركىستان قالاسىندا ورنالاسقان ءبىلىم بەرۋ ۇيىمدارىنداعى 1-سىنىپقا كەلەتىن الەۋمەتتىك وسال توپ وتباسىنىڭ 200 بالاسىنا وقۋ قۇرالدارىن الىپ بەرۋگە دەمەۋشىلىك جاساۋدا. بۇدان بولەك, اۋدان, قالا اكىمدىكتەرىندە مەكتەپ فورمالارىن قولجەتىمدى باعادا ساتىپ الۋ ءۇشىن شالعاي ەلدى مەكەندەردە «مەكتەپ جارمەڭكەلەرى» وتكىزىلىپ جاتىر.
ايتا كەتەلىك, وبلىستا بيىل «كەلەشەك مەكتەپتەرى» جوباسى مەن جاڭا قۇرىلىستار ەسەبىنەن مەملەكەتتىك مەكتەپتەر سانى 13-كە ارتىپ, 935-كە جەتەدى. جاڭا وقۋ جىلىندا 1-11 سىنىپتاردا 568 مىڭعا جۋىق وقۋشى ءبىلىم الادى دەپ بولجانىپ وتىر. ءبىرىنشى سىنىپقا 48 مىڭنان استام وقۋشىنى قابىلداۋ جوسپارلانعان. وڭىردەگى ءبىلىم ۇيالارىنىڭ جاڭا وقۋ جىلىنا دايىندىعى تالقىلانعان جيىندا وبلىس اكىمى نۇرالحان كوشەروۆ جاۋاپتىلارعا ءبىلىم ۇيالارى 1 قىركۇيەككە دەيىن 100 پايىز دايىن بولۋى كەرەكتىگىن ايتىپ, ناقتى تاپسىرمالار بەردى. ءبىلىم ۇيالارىن قاتتى جانە سۇيىق وتىنمەن قامتۋ, جىلىتۋ ماۋسىمىنا دايىنداۋ باعىتىنداعى تىرلىكتى دە شيراتۋ قاجەت. وبلىستىق ءبىلىم باسقارماسى باسشىسىنىڭ مىندەتىن اتقارۋشى عالىمجان ورىنوۆتىڭ ايتۋىنشا, «كەلەشەك مەكتەپتەرى» جوباسى اياسىندا جوسپارلانعان 29 مەكتەپتىڭ 13-ءى پايدالانۋعا بەرىلىپ, 9 مەكتەپتە وقۋ ۇدەرىسى ءجۇردى, قامتىلعان وقۋشى سانى – 7 694 (77%). 4 مەكتەپ وقۋ ۇدەرىسىن وسى جاڭا وقۋ جىلىندا باستايدى. بيىلعى 1–30 تامىز ارالىعىندا 16 مەكتەپ ىسكە قوسىلادى دەپ كۇتىلۋدە. مەكتەپتەردى جاڭعىرتۋ جوباسىنا وبلىستىڭ 115 مەكتەبى ەنگىزىلگەن. بيىلعا جوسپارلانعان 41 مەكتەپتىڭ ىشىندە اعىمداعى جوندەۋمەن 15 مەكتەپ, كۇردەلى جوندەۋمەن 26 مەكتەپ قامتىلدى. قازىرگى تاڭدا 41 مەكتەپتىڭ قىرىعىندا بەكىتىلگەن وندىرىستىك كەستەگە سايكەس جۇمىس جۇرگىزىلىپ وتىر. بيىل 6 كۇردەلى جوندەۋ, 15 اعىمداعى جوندەۋ جۇمىسى جۇرگىزىلىپ جاتقان نىساندار پايدالانۋعا بەرىلەدى. قالعان 20 نىسان 2026 جىلعا وتپەلى. وبلىستاعى مەملەكەتتىك مەكتەپتىڭ 798-ءى تيپتىك, 124-ءى ىڭعايلاستىرىلعان عيماراتتا ورنالاسقان. وبلىستىق بيۋدجەت ەسەبىنەن بيىل 17 ءبىلىم نىسانىنىڭ قۇرىلىسى جۇرگىزىلىپ جاتىر. اتاپ ايتقاندا, 11 مەكتەپ پەن 1 كوللەدجدىڭ 120 ورىندىق جاتاقحاناسى, 5 قوسىمشا ءبىلىم بەرۋ ۇيىمى سالىنىپ جاتىر. وسى 17 ءبىلىم نىسانىنىڭ 4-ەۋى بيىل پايدالانۋعا بەرىلسە, قالعان 13-ءى 2026 جىلعا وتپەلى.
ءبىلىم بەرۋ ۇيىمدارىن پوليتسيا دەپارتامەنتىنىڭ جەدەل باسقارۋ ورتالىعىنا قوسۋ جۇمىستارى دا جۇيەلى اتقارىلىپ كەلەدى. قازىرگى ۋاقىتتا وبلىستاعى 1259 مەملەكەتتىك ءبىلىم بەرۋ مەكەمەسىنىڭ 827-ءى جەدەل باسقارۋ ورتالىعىنا قوسىلعان. دابىل تۇيمەلەرى – 100% ورناتىلسا, تۋرنيكەت جۇيەسى مەن ارنايى كۇزەت قىزمەتى تولىق قامتاماسىز ەتىلدى. جەكەمەنشىك سەكتورلارداعى مىڭنان استام مەكەمەدە دابىل باتىرماسى بار. 65 جەكەمەنشىك مەكەمە تۋرنيكەت جۇيەسىن قويسا, 500-گە جۋىق عيماراتتا ارنايى كۇزەت قىزمەت ەتەدى.
تۇركىستان وبلىسى