يسپانيادا ورىن العان جويقىن ورمان ورتتەرىنە ادامداردىڭ ادەيى قاتىسى بولۋى مۇمكىن دەگەن بولجام جاسالدى. بىرقاتار ءورت وقيعالارى قاساقانا ۇيىمداستىرىلعانى بەلگىلى بولدى. تامىز ايىندا پوليتسيا 48 ادامدى ءورت قويۋعا كۇدىكتى رەتىندە قاماۋعا الىپ, تاعى 134 ىسكە بايلانىستى تەرگەۋ جۇرگىزىپ جاتىر, دەپ حابارلايدى Egemen.kz.
سوڭعى اپتالاردا ورمان ورتىنەن ونداعان مىڭ گەكتار جاسىل جەلەك جويىلعان. ءورت كاستيليا مەن لەون اۋماعىن عانا ەمەس, سونىمەن بىرگە ەكولوگيالىق ماڭىزى جوعارى پيكوس-دە-ەۋروپا ۇلتتىق پاركىن, لەون پروۆينتسياسىنداعى بيوسفەرالىق قورىقتاردى, سونداي-اق گاليسيا مەن ەسترەمادۋرا ايماقتارىن شارپىعان.
كورولدىك ساراي مالىمەتىنشە, بەيسەنبى جانە جۇما كۇندەرى يسپانيا مونارحتارى گاليسيا مەن ەسترەمادۋراداعى ورتتەن ەڭ قاتتى زارداپ شەككەن قالالارعا دا بارماق. الايدا ناقتى باعىت ءالى ناقتىلانباعان.
ساراپشىلاردىڭ ايتۋىنشا, كۇدىكتىلەردىڭ كوبى جەرگىلىكتى جەردى جاقسى بىلەتىن تۇرعىندار مەن فەرمەرلەر. ولاردىڭ كەيبىرى قاساقانا ارەكەتتەردى تۇندە جۇزەگە اسىرادى. دەگەنمەن, ۇيىمداسقان قىلمىستىق توپتار جوق, بۇل كوبىنەسە جەكە ادامداردىڭ ءىس-ارەكەتى بولىپ وتىر. كۇدىكتىلەردىڭ ورتكە بارۋ سەبەپتەرى ازىرگە بەلگىسىز.
ال يسپانيا ۇكىمەتىنىڭ وكىلدەرى ورتتەردىڭ باستى سەبەبى رەتىندە جاھاندىق كليماتتىڭ وزگەرىسىن, اپتاپ ىستىق تولقىندارىن, قۇرعاقشىلىق پەن قاتتى جەلدەردى اتاپ ءوتتى.