پرەزيدەنتتىڭ 2024 جىلعى جولداۋىن جانە باسقا دا تاپسىرمالارىن جۇزەگە اسىرۋ اياسىندا ەلىمىزدە كەڭ اۋقىمدا كوگالداندىرۋ جانە ورمان القاپتارىن كوبەيتۋ جۇمىستارى جالعاسىپ كەلەدى, دەپ حابارلايدى Egemen.kz ۇكىمەتتىڭ مالىمەتىنە سىلتەمە جاساپ.
ەكولوگيا جانە تابيعي رەسۋرستار ءمينيسترى ەرلان نىسانباەۆتىڭ ايتۋىنشا «تازا قازاقستان» اكتسياسى اياسىندا مەملەكەتتىك ورمان قورى اۋماعىنا 1 ملرد 369 ملن كوشەت, ونىڭ ىشىندە ارال تەڭىزىنىڭ قۇرعاعان تۇبىنە سەكسەۋىل كوشەتتەرىنىڭ 48,7 ملن داناسى ەگىلگەن.
ورمان شارۋاشىلىعىن تۇراقتى تۇردە دامىتۋ ماقساتىندا بىلتىر جىل سوڭىندا قازالىدا 33 گا الاڭعا جىلىنا 3 ملن كوشەت بەرەتىن ورمان پيتومنيگىنىڭ قۇرىلىسى اياقتالعان. بۇگىندە اگروتەحنيكالىق تالاپتار ەسكەرىلە وتىرىپ, پيتومنيكتەگى 10 گا الاڭعا سەكسەۋىل تۇقىمى ەگىلدى.
بۇدان بولەك, بيىل اۋماعى 15 گا پيتومنيكتى جوبالاۋ جانە ارالدىڭ قۇرعاعان تۇبىندە تىكەلەي ۇڭعىمىلاردى بۇرعىلاۋ جۇمىستارى جۇرگىزىلىپ جاتىر.