مەديتسينا – زور جاۋاپكەرشىلىكتى قاجەت ەتەتىن سالا. ال, اق حالاتتى جانداردىڭ ىشىندە ناۋقاستىڭ العاشقى سەنىمىن سەزىنەتىندەر – مەيىرگەرلەر. استانا اكىمدىگىنىڭ شجق «№8 قالالىق ەمحانا» مكك ەمشارا كابينەتىنىڭ جانە ونكولوگ دارىگەرىنىڭ مەيىرگەرى گۇلنۇر نۇريمانوۆا وسى ماماندىققا جۇرەك قالاۋىمەن كەلگەن جان. مەديتسينا سالاسىندا ەڭبەك ەتۋدى قارشادايىنان ارمانداعان گۇلنۇر ادىلقىزىنىڭ ايتۋىنشا, «مەيىرگەر» اتاۋىنىڭ ءوزى مەيىرىم ۇعىمىنان شىققان.
بىردە-ءبىر دارىگەر مەيىرگەردىڭ قاتىسۋىنسىز جۇمىس ىستەي المايدى. مەيىرگەرلەر ءار ناۋقاستىڭ ءومىرى ءۇشىن زور جاۋاپكەرشىلىكپەن مول جۇمىس اتقارىپ ءجۇر.
«بالا كەزىمدە اناممەن بىرگە ەمحاناعا بارعان كەزدە ۇزاق ۋاقىت كەزەك كۇتىپ وتىراتىنبىز. سول كەزدەردە وزىمە «بولاشاقتا وسى سالادا ەڭبەك ەتىپ, ناۋقاستاردى كۇتكىزبەي قابىلداپ, ءار ادامعا مەيىرىممەن قارايمىن» دەپ ۋادە ەتۋشى ەدىم. سول ارمانىما جەتتىم دەپ ويلايمىن», دەيدى مەيىرگەر.
2024 جىلى الماتى قالاسىنداعى ءال-فارابي اتىنداعى قازاق ۇلتتىق ۋنيۆەرسيتەتىن ءتامامداپ, مەيىربيكە ءىسى بويىنشا باكالاۆر اتانعان گۇلنۇر نۇريمانوۆانىڭ جالپى ەڭبەك ءوتىلى – 10 جىل. وسى جىلدار ىشىندە دەنساۋلىق ساقتاۋ سالاسىندا كوپتەگەن وزگەرىستەردى كوزبەن كورىپ, تاجىريبەدەن وتكەرگەن.
«سوڭعى جىلدارى مەديتسينادا ۇلكەن وزگەرىستەر بولدى. بۇرىن ناۋقاستار ۇزاق كەزەكتە تۇراتىن, قازىر ەلەكتروندى جۇيە ارقىلى الدىن الا جازىلىپ كەلەدى. اناليز ناتيجەلەرىن دە ۇيدە وتىرىپ-اق «Damumed» قوسىمشاسى ارقىلى كورەدى. بۇل – ناۋقاستارعا دا, مەديتسينا قىزمەتكەرلەرىنە دە ۇلكەن جەڭىلدىك اكەلدى. بۇگىندە زاماناۋي كت, مرت سياقتى قۇرىلعىلار قولجەتىمدى. بۇرىن ولاردى الۋ ايلاپ كۇتۋدى كەرەك ەتەتىن. بۇگىندە ساقتاندىرۋ جۇيەسىنىڭ ارقاسىندا كوپتەگەن تەكسەرۋلەر مەن ەم-شارالار تەگىن جاسالادى. سونىمەن قاتار, ءبىز ونكولوگيالىق ناۋقاستارعا ۇيىنە بارىپ تا قىزمەت كورسەتەمىز, پسيحولوگتار دا بىرگە بارىپ, قولداۋ كورسەتەدى. مۇنداي مۇمكىندىك بۇرىن بولماعان», دەيدى گ.نۇريمانوۆا.
ول پروتسەدۋرالىق مەيىرگەر رەتىندە جۇمىسىنداعى ەڭ جاۋاپتى مەزەتكە دە توقتالدى.
«ەڭ جاۋاپتى ءسات – قان الۋ كەزىندە. قان الۋ بارىسىندا قاننان قورىققان ناۋقاس باسى اينالىپ, ەسىن جوعالتۋى مۇمكىن. سوندىقتان ءاردايىم ناۋقاستىڭ جاعدايىن باقىلاپ وتىرۋ قاجەت. سەنىمىن وياتۋ ءۇشىن مەيىرگەر ەڭ الدىمەن وزىنە سەنىمدى بولۋى كەرەك. مەيىرگەر قولى دىرىلدەمەي, سابىرلى ارەكەت جاساسا, ناۋقاس تا سەنەدى. مەن ءۇشىن ەڭ ۇلكەن قۇندىلىق – ناۋقاستىڭ سەنىمىن اقتاۋ. كەيدە باسقا جەردە قان تاپسىرا الماعان ناۋقاستار بىزگە كەلىپ, قان ءساتتى الىنعاندا قاتتى قۋانىپ, العىستارىن ءبىلدىرىپ جاتادى. سول ساتتەردە ەڭبەگىمنىڭ ناتيجەسىن سەزىنەمىن», دەيدى ول.
گۇلنۇر ادىلقىزى ونكولوگ دارىگەرىنىڭ دە مەيىرگەرى. ونكولوگيا – وتە اۋىر سالا. ناۋقاستار مۇندا قورقىنىشپەن كەلەتىنى ءمالىم.
«ناۋقاستاردىڭ قورقىنىشىن ازايتۋ ءۇشىن ءبىز ەڭ الدىمەن پسيحولوگيالىق قولداۋ كورسەتەمىز. مەن العاش ەڭبەك جولىمدى ونكولوگيالىق ورتالىقتا باستاعاندىقتان, بەيىمدەلۋ اسا قيىن بولمادى. ءار پاتسيەنتپەن جەكە جۇمىس ىستەپ, ولارعا سەنىم بەرۋ – ەڭ باستى مىندەتىم», دەيدى بىلىكتى مامان.
جۇمىسى اۋىر بولعانىمەن, ول ءار ناۋقاستىڭ العىسىن ەڭ ۇلكەن ماراپات سانايدى. اسىرەسە, رەانيماتسيا بولىمىندە ۇمىتىلماس ساتتەردى باستان كەشكەن.
«2016-2019 جىلدارى رەانيماتسيا بولىمىندە جۇمىس ىستەدىم. بىردە ناۋقاستىڭ جۇرەگى توقتاپ قالعان كەزدە بۇكىل كوماندا بولىپ كومەك كورسەتتىك. جۇرەگى قايتا سوعىپ, ەسىن جيعان مەزەتىن ەشقاشان ۇمىتپايمىن. بۇل – ەڭبەگىمىزدىڭ باعالانعانى», دەيدى بىلىكتى مامان مەيىرگەر سول مەزەتتى تولقي ەسكە الىپ.
ەلىمىزدىڭ دەنساۋلىق ساقتاۋ جۇيەسىندە مەيىرگەرلەردىڭ ءرولى ەداۋىر ارتقانىمەن, دارىگەردىڭ شەشىمىنسىز تاۋەلسىز ارەكەت ەتۋگە بولمايتىنىنا توقتالعان گ.نۇريمانوۆانىڭ ايتۋىنشا دياگنوز قويۋ مەن ەم تاعايىنداۋ – دارىگەردىڭ قۇزىرىنداعى ءىس. مەيىرگەرلەر دارىگەردىڭ نۇسقاۋىمەن جۇمىس ىستەيدى, بىراق ناۋقاستىڭ سەنىمىن وياتىپ, قولداۋ كورسەتۋ – مەيىرگەردىڭ نەگىزگى مىندەتى.
ول ءۇشىن مەيىرگەر كاسىبىنىڭ باستى قۇندىلىعى – ۇزدىكسىز ىزدەنىس پەن كاسىبي بىلىكتىلىك.
«جاقسى مەيىرگەر بولۋدىڭ قۇپياسى – مەيىرىم مەن قامقورلىقتا جاتىر. كەيدە جاي عانا جىلى ءسوزدىڭ ءوزى ادامنىڭ ۋايىمىن ازايتىپ, كوڭىلىن كوتەرەدى. مەيىرگەر ءار بەس جىل سايىن بىلىكتىلىك ساناتىن قورعاۋى ءتيىس. بۇل جۇيەنى قايتا ەنگىزگەنى دۇرىس بولدى. ويتكەنى, بۇل جۇيە – تەوريالىق قانا ەمەس, پراكتيكالىق ءبىلىمدى دە جاڭارتىپ وتىرۋعا مۇمكىندىك بەرەدى. اتالعان بىلىكتىلىك ساناتىن قورعاۋدان بولەك, مەيىرگەر ءاردايىم وقىپ ءارى تاجىريبە الماسىپ وتىرۋى كەرەك جانە كۋرستارعا قاتىسىپ, ءارتۇرلى بولىمدەردە جۇمىس ىستەپ كورۋ كاسىبي دەڭگەيدى ارتتىرادى. جاڭا ءبىلىم الىپ, تاجىريبەسىن ۇنەمى شىڭداپ وتىرعان مەيىرگەر كەز كەلگەن جاعدايدا كومەك كورسەتە الادى.
مەيىرگەر ەڭبەگى كوپ جاعدايدا «كورىنبەي قالادى», ال شىن مانىندە ەڭبەگى وتە مول عوي, سەبەبى جۇمىستىڭ باسىم بولىگىن مەيىرگەرلەر اتقارادى, بىراق العىس كوبىنەسە دارىگەرگە ايتىلادى. جاستاردى وسى ماماندىققا قىزىقتىرۋ ءۇشىن مەيىرگەرلەردى كوبىرەك ناسيحاتتاۋ كەرەك. سۇيىسپەنشىلىك بولماسا, جاۋاپكەرشىلىك تە بولمايتىندىقتان جاستار بۇل ماماندىققا جۇرەك قالاۋىمەن كەلۋى قاجەت», دەيدى ءاردايىم ەل العىسىن الىپ جۇرگەن گۇلنۇر ادىلقىزى.
حالىقتىڭ ساۋلىعى كۇندەلىكتى تەر توگىپ جۇرگەن مەيىرگەر مامانداردىڭ قولىندا ەكەنى داۋسىز. مەيىرگەر ەڭبەگىنىڭ قوعامداعى ورنى مەن ماڭىزى زور. ويتكەنى مەيىرگەرلىك – مەيىرىمگە تولى جۇرەكپەن اتقارىلاتىن ەڭبەك.