سوڭعى ءۇش جىلدىڭ ىشىندە تۇركىستان وبلىسىندا اۋىل شارۋاشىلىعى ماقساتىنداعى شامامەن 1 ميلليون گەكتار جەر مەملەكەت مەنشىگىنە وتكەن, دەپ حابارلايدى Egemen.kz.
قالا اكىمدىگىنىڭ حابارلاۋىنشا, 2022 جىلى – 520 مىڭ گەكتاردان استام, 2023 جىلى – 330 مىڭ گەكتاردان استام, ال 2024 جىلدىڭ وزىندە 70 مىڭ گەكتاردان استام جەر مەملەكەتكە قايتارىلعان.
«بيىل جىل سوڭىنا دەيىن قوسىمشا 110 مىڭ گەكتار جەر ۋچاسكەسىن مەملەكەتكە قايتارۋ جوسپارلانىپ وتىر. بۇگىنگى كۇنگە ونىڭ 60,1 مىڭ گەكتارى قايتارىلدى. بۇل جەرلەر كەزىندە اۋىل شارۋاشىلىعى ماقساتىندا جەكە تۇلعالارعا بەرىلگەنىمەن, جىلدار بويى پايدالانىلماعانى انىقتالعان», دەلىنگەن حابارلامادا.
سونىمەن قاتار وبلىستا ورتاق جايىلىمداردى مەملەكەتكە قايتارۋ ءىسى دە جۇيەلى جۇرگىزىلىپ جاتىر. بۇل باعىتتاعى جۇمىس وبلىس اكىمدىگىنىڭ كەزەكتى ماجىلىسىندە قارالعان. جوبا مەملەكەت باسشىسى قاسىم-جومارت توقاەۆتىڭ 2024 جىلعى 2 قىركۇيەكتەگى جولداۋىندا بەرگەن تاپسىرماسىنا سايكەس ىسكە اسىرىلىپ جاتىر. پرەزيدەنت پايدالانىلماي جاتقان جەرلەردى مەملەكەتكە الىپ, ولاردى ءتيىمدى پايدالاناتىن ازاماتتارعا بەرۋدى مىندەتتەگەن بولاتىن. وسىعان وراي ايماقتاعى جاۋاپتى ورگاندار جەرلەردى قايتارىپ, ءادىل ءبولۋدى جالعاستىرىپ كەلەدى.
وبلىستىق جەر قاتىناستارى باسقارماسىنىڭ باسشىسى ەرعالي تىلەگەننىڭ ايتۋىنشا, ءوڭىردىڭ جالپى جەر قورى – 11 ملن 610,3 مىڭ گەكتار. قازىرگى كەزدە پايدالانىلماي جاتقان نەمەسە زاڭعا قايشى قولدانىلىپ وتىرعان اۋىل شارۋاشىلىعى القاپتارىن مەملەكەت مەنشىگىنە قايتارۋ ءۇشىن وبلىس اكىمىنىڭ وكىمىمەن ارنايى ۆەدومستۆوارالىق توپ قۇرىلعان.
جۇمىس ەكى باعىتتا جۇزەگە اسىرىلىپ جاتىر: ءبىرىنشىسى – اۋىل شارۋاشىلىعى مينيسترلىگى بەكىتكەن جوسپار شەڭبەرىندە, ەكىنشىسى – جۇمىس توبى انىقتاعان ورتاق جايىلىمداردى قايتارۋ جوسپارى بويىنشا.
جيىندا تۇركىستان وبلىسىنىڭ اكىمى نۇرالحان كوشەروۆ جايىلىم جەرلەردى قايتارۋ جۇمىستارىن كۇشەيتۋدى تاپسىردى. ول جاۋاپتى ورگاندارعا جۇيەلى مونيتورينگ جۇرگىزىپ, جىلدىق جوسپاردىڭ تولىق ورىندالۋىن قاداعالاۋدى مىندەتتەدى.
«مەملەكەت باسشىسى ورتاق جايىلىمداردى ەل يگىلىگىنە قايتارۋ جونىندە ناقتى تاپسىرما بەردى. اۋدان, قالا اكىمدەرى, جاۋاپتى باسقارمالار مەن دەپارتامەنتتەر وسى باعىتتاعى جۇمىستى كۇشەيتسىن. ماقساتسىز پايدالانىلىپ جاتقان جەرلەردى قايتارۋ ءىسى جۇيەلى جۇرگىزىلۋى كەرەك. كوسمومونيتورينگ ناتيجەلەرىن ەسكەرىپ, تەرەڭ تالداۋ جاساعان ءجون. مونيتورينگ, زەردەلەۋ جۇمىستارى توقتاماۋ كەرەك جانە جىلدىق جوسپاردىڭ تولىق ورىندالۋى ءتيىس», دەدى نۇرالحان كوشەروۆ.
قازىرگى تاڭدا جەر رەسۋرستارىن باسقارۋ دەپارتامەنتى 403 جەر پايدالانۋشىعا تيەسىلى 124,3 مىڭ گەكتار جايىلىمعا قاتىستى قۇجاتتاردى قاراپ, نۇسقامالار جىبەرىپ جاتىر. سونىمەن بىرگە اۋدان جانە قالا اكىمدىكتەرى ازىرلەگەن جوسپارلار اۋىلدىق وكرۋگ دەڭگەيىندە بەكىتىلىپ, قايتارىلعان جايىلىم جەرلەردىڭ كارتا-سىزبالارى دايىندالعان.