شىمكەنتتەگى ءۇش اۋىسىمدى وقىتۋ ماسەلەسى شەشىمىن تاپتى

وقۋ-اعارتۋ مينيسترلىگىنىڭ حابارلاۋىنشا, قازىر قالا مەكتەپتەرىندەگى قاۋىپسىزدىك دەڭگەيى ايتارلىقتاي ارتقان. بارلىق وقۋ ورىندارى بەينەباقىلاۋ كامەرالارىمەن جابدىقتالىپ, ءىىم جەدەل باسقارۋ ورتالىقتارىنا قوسىلعان. بۇدان بولەك, جازبالار اكىمدىكتىڭ احۋالدىق ورتالىعىنا دا بەرىلىپ, جاعدايدى ونلاين باقىلاپ, كەز كەلگەن تاۋەكەلگە جەدەل ارەكەت ەتۋ مۇمكىندىگى جاسالعان.

«مەكتەپ ينفراقۇرىلىمىندا دا ۇلكەن وزگەرىستەر ورىن الۋدا. مەملەكەت باسشىسىنىڭ باستاماسىمەن ىسكە اسىرىلىپ جاتقان «كەلەشەك مەكتەبى» ۇلتتىق جوباسى اياسىندا شىمكەنتتە 12 جاڭا مەكتەپ سالىندى. سولاردىڭ ءبىرى – 2030 وقۋشى ءبىلىم الاتىن №144 مەكتەپكە مينيستر ارنايى باردى. ءمينيستردىڭ ايتۋىنشا, جاڭا مەكتەپتەردىڭ قۇرىلىسى تىعىز ورنالاسقان شاعىن اۋداندارداعى جۇكتەمەنى ازايتىپ, ءاربىر بالاعا جايلى جاعداي جاساۋعا سەپتىگىن تيگىزەدى», دەلىنگەن حابارلامادا.

سونىمەن قاتار قالا اكىمى ءۇش اۋىسىمدى وقىتۋ ماسەلەسى تولىعىمەن شەشىلگەنىن حابارلادى.

سونىمەن قاتار ءبىلىم بەرۋ ۇيىمدارىن جاڭعىرتۋ جۇمىستارى دا جالعاسىپ جاتىر. رەنوۆاتسيا باعدارلاماسى شەڭبەرىندە قالاداعى 11 مەكتەپ جوندەۋدەن وتەدى. ماسەلەن, سايرام تۇرعىن الابىنداعى №109 مەكتەپتە كۇردەلى جوندەۋ اياقتالىپ, وقۋ ورنى زاماناۋي ءارى قاۋىپسىز تالاپتارعا ساي جاڭارتىلعان.

پەداگوگتەرمەن كەزدەسكەن مينيستر مەكتەپتىڭ وقۋشىلار ءۇشىن جايلى ورتا عانا ەمەس, مۇعالىمدەر ءۇشىن كاسىبي دامۋدىڭ ورتاسى بولۋى قاجەتتىگىن اتاپ وتكەن. سونداي-اق, مەملەكەت ۇستازدارعا جان-جاقتى قولداۋ كورسەتىپ وتىرعانىن جەتكىزدى.

ينكليۋزيۆتى ءبىلىم بەرۋ ماسەلەسى دە نازاردان تىس قالعان جوق. مينيستر سايرامداعى كومەكشى مەكتەپ-ينتەرناتى-كوللەدجىندە بولىپ, ەرەكشە ءبىلىم قاجەتتىلىكتەرى بار بالالارعا جاسالعان جاعدايلاردى كورگەن. قازىرگى تاڭدا شىمكەنتتە ينكليۋزيۆتى ءبىلىم بەرۋمەن قامتۋ دەڭگەيى بالاباقشالاردا – 96%, مەكتەپتەردە – 95%-عا جەتكەن. بۇل باعىتتا «ەرەكشە ءبىلىمدى قاجەت ەتەتىن بالالاردى كەشەندى قولداۋ تۋرالى» زاڭ جوباسى ازىرلەنىپ جاتىر.

سونىمەن قاتار مينيستر شىمكەنت اگرارلىق-تەحنيكالىق كوللەدجىندە بولىپ, ستۋدەنتتەردىڭ وقۋ جاعدايى مەن ماتەريالدىق-تەحنيكالىق بازاسىمەن تانىسقان.