ءماجىلىس دەپۋتاتى, «Amanat» پارتياسى فراكتسياسىنىڭ مۇشەسى بولات كەرىمبەك جەتىسۋ وبلىسىنا جۇمىس ساپارى اياسىندا الاكول كولىنىڭ جاعالاۋىنداعى دەمالىس ورىندارىنىڭ قازىرگى جاعدايىمەن تانىستى. جەتىسۋ وبلىسى قۇرىلعالى الاكول اۋدانىنا 4,8 ملن-نان اسا تۋريست كەلگەن.
دەپۋتات كوممۋنالدىق جاعاجاي مەن بىرقاتار تۋريستىك نىساندى ارالاپ, ينفراقۇرىلىم ماسەلەسىنە نازار اۋداردى. اتاپ ايتقاندا, سانيتارلىق تازالىق, كارىز جۇيەسى, كولىك باقىلاۋ جانە ينجەنەرلىك ينفراقۇرىلىمنىڭ جايى قوزعالدى. ب.كەرىمبەك ينفراقۇرىلىمدى جەتىلدىرۋ جۇمىسىن ءارى قاراي جالعاستىرا بەرۋ كەرەكتىگىن اتاپ ءوتتى.
– الاكول – تەك جەتىسۋ وبلىسىنىڭ ەمەس, تۇتاس ەلىمىزدىڭ تۋريستىك برەندى. كەيىنگى جىلدارى مۇندا كوپ جۇمىس اتقارىلدى. ەلەكتر جارىعى مەن ينتەرنەت ماسەلەسى شەشىلدى. كارىز جۇيەسى تارتىلىپ جاتىر. بىراق ءالى دە جۇيەلى شەشىمدى قاجەت ەتەتىن ماسەلەلەر بار. ءبىز ءۇشىن باستى ماقسات – تابيعات بايلىعىن ساقتاي وتىرىپ, حالىققا جايلى جاعداي جاساۋ. بۇل باعىتتا مەملەكەت پەن كاسىپكەرلەردىڭ كۇش بىرىكتىرۋى اسا ماڭىزدى, – دەدى دەپۋتات.
ايتا كەتەيىك, كەيىنگى جىلدارى الاكول جاعالاۋىندا ينفراقۇرىلىم ەداۋىر جاقساردى. تۋريستىك نىساندار سانى ءبىر جىلدا 270-تەن استى. ۇزىندىعى 56,7 شاقىرىم ەلەكتر جەلىسى مەن قوسالقى ستانسا سالىنىپ, ۇزدىكسىز جارىق بەرىلىپ وتىر. جاعالاۋ ينتەرنەتپەن قامتىلىپ, 16 بازالىق ستانسا ورناتىلدى.
ال ماجىلىستەگى جسدپ فراكتسياسىنىڭ مۇشەسى اسحات راقىمجانوۆ شىعىس قازاقستان وبلىسىنداعى بەلوۋسوۆكا اۋىلىنىڭ تۇرعىندارىمەن كەزدەسىپ, ولاردىڭ ينفراقۇرىلىمعا قاتىستى كوتەرگەن ماسەلەلەرىن تىڭدادى.
اۋىلدا ينفراقۇرىلىم, سۋ تاپشىلىعى, مەديتسينالىق قىزمەتتەردىڭ قولجەتىمسىزدىگى مەن ءدارى-دارمەك ماسەلەلەرى وتكىر تۇر. اسىرەسە تۇرعىندار قىس كەزىندە قاردى ەرىتىپ پايدالانۋعا ءماجبۇر. بۇل جايتقا قاتىستى اۋىل اكىمى اناتولي تاشنيچەنكو 1 قاراشاعا دەيىن سۋ قىسىمىن قالپىنا كەلتىرەتىندەرى جونىندە ۋادە بەردى.
قارتتارعا ارنالعان كۇندىزگى ستاتسيوناردىڭ جوقتىعى, اۋرۋحانادا قاجەتتى توسەكتىك ورىنداردىڭ جەتىسپەۋشىلىگى دە اۋىل تۇرعىندارىنىڭ الاڭداۋشىلىعىن تۋعىزىپ وتىر. جاڭا مەديتسينالىق عيماراتتىڭ قۇرىلىسى تەك 2027 جىلى باستالادى. بۇعان قوسا كەزدەسۋدە ءدارى-دارمەك تاپشىلىعى ماسەلەسى دە ەگجەي-تەگجەي كوتەرىلدى.
اسحات راقىمجانوۆ بۇل ماسەلەلەردى شەشۋ ءۇشىن ۋاقىتشا ستاتسيوناردى ۇيىمداستىرۋدى, اۋرۋحانالاردا مەديتسينالىق قىزمەتتەردىڭ قولجەتىمدىلىگىن ارتتىرۋدى جانە ءدارى-دارمەك ساتىپ الۋ ءتارتىبىن قايتا قاراستىرۋدى ۇسىندى.
كەزدەسۋ سوڭىندا ءماجىلىس دەپۋتاتى تۇرعىنداردىڭ ماڭىزدى تالاپ-تىلەگىن ورىنداۋدا جەرگىلىكتى بيلىكتىڭ جەدەل ارەكەت ەتۋى قاجەت ەكەنىن باسا ايتتى.
– تۇرعىندار اۋىزسۋمەن, ءدارى-دارمەكتەرمەن قامتاماسىز ەتۋدى جانە تىرشىلىككە قاجەتتى ينفراقۇرىلىمدى دۇرىس تالاپ ەتىپ وتىر. اكىمدىك حالىقتىڭ ناقتى سۇرانىستارىنا جاۋاپ بەرۋگە ءتيىس, – دەدى ا.راقىمجانوۆ.
سونىمەن قاتار دەپۋتات بەلوۋسوۆكا تۇرعىندارىنىڭ سۇراقتارى مەن ۇسىنىستارىن ءتيىستى مەملەكەتتىك ورگاندارعا جولدايتىنىن, ال ولاردىڭ ورىندالۋ بارىسى دەپۋتاتتىڭ قاداعالاۋدا بولاتىنىن ايتتى.
الماتىعا جۇمىس ساپارى بارىسىندا ءماجىلىس دەپۋتاتى, «Respublica» فراكتسياسىنىڭ مۇشەسى ايتۋار قوشمامبەتوۆ تۇرعىن ۇيلەردىڭ ماڭايىندا ورنالاسقان شاعىن دۇكەندەردىڭ يەلەرىمەن كەزدەسىپ, كاسىپكەرلىك سالاداعى وزەكتى ماسەلەلەردى تالقىلادى.
الماتىدا مۇنداي شاعىن ساۋدا ورىندارىنىڭ سانى 3,5 مىڭنان اسادى. كاسىپ يەلەرى جۇكتەمەنىڭ ارتىپ, ەرەجەلەردىڭ ۇنەمى وزگەرىپ جاتقانىنا الاڭداۋلى. كاسىپكەرلەر ەكى نەگىزگى پروبلەماعا توقتالدى. ءبىرىنشىسى – 4 پايىز كولەمىندەگى بولشەك سالىق. شاعىن دۇكەن يەلەرى رەنتابەلدىلىكتى ساقتاپ قالۋ ءۇشىن ونى 2 پايىزعا دەيىن تومەندەتۋدى تالاپ ەتىپ كەلەدى. سونداي-اق ولاردى تسيفرلاندىرۋ جانە ءموبيلدى اۋدارىمدار ماسەلەسى تولعاندىرادى. اۋدارىمداردى باقىلاۋعا باعىتتالعان جاڭا ەرەجەلەر دە الاڭداتارلىق. ياعني بۇل ەرەجە بانكتىك كوميسسيا مولشەرى 5 پايىزعا دەيىن جەتىپ, كاسىپكەرلەردىڭ تابىسىن ازايتادى. ايتۋار قوشمامبەتوۆتىڭ ايتۋىنشا, ءدال وسىنداي ماسەلەلەر بارىنشا تالقىلانۋى كەرەك. ول شاعىن بيزنەس تۇسىنىكتى ءارى ءادىل ەرەجەلەرمەن جۇمىس ىستەۋى كەرەكتىگىن, ال قازىرگى جاعدايدا ولار تەك قىسىمعا شىداپ, كۇن كورىپ وتىرعانىن ايتتى.