مايقايىڭ كەنتىنىڭ الەۋمەتتىك سالاسىندا الداعى جىلدارى وڭ وزگەرىس جوسپارلانىپ وتىر. جاقىندا مۇندا ءوڭىر باسشىلىعى مەن «التىنالماس» اق اراسىندا ستراتەگيالىق مەموراندۋم جاسالدى.
«التىنالماس» اق كومپانياسى «مايقايىڭ-التىن» اق-نىڭ 100 پايىز جارعىلىق كاپيتالىن ساتىپ الۋ بويىنشا كەلىسىمدى ءساتتى اياقتاعانى ءمالىم. بۇگىندە التىن كومبيناتى مەن كەنىش تولىقتاي سوعان قارايدى.
پاۆلودار وبلىسىنىڭ اكىمى اسايىن بايحانوۆ پەن «التىنالماس» اق باسقارما مۇشەسى, قارجى جونىندەگى باس اتقارۋشى ديرەكتورى رۇستەم قاراكەسوۆ 4,6 ملرد تەڭگەنىڭ الەۋمەتتىك جانە ينفراقۇرىلىمدىق باستامالاردى ىسكە اسىرۋ تۋرالى مەموراندۋمعا قول قويدى.
– بۇل جاي عانا زاڭدى قۇجات ەمەس, بۇل اپاتتىق جاعدايداعى تۇرعىن ۇيلەردى بۇزۋ مەن كەنتتى جىلۋمەن جابدىقتاۋ جۇيەسىن جاڭارتۋدان باستاپ جاڭا الەۋمەتتىك نىساندار سالۋعا, جولداردى جوندەۋگە دەيىنگى كەنتتىڭ وزەكتى ماسەلەلەرىن شەشۋگە باعىتتالعان بيلىك پەن بيزنەستىڭ كۇش-جىگەرىن بىرىكتىرەتىن ناقتى ءىس-قيمىل جوسپارى, – دەپ اتاپ ءوتتى اسايىن بايحانوۆ.
جاسالعان مەموراندۋمعا سايكەس كاسىپورىن شاحتالارىنا جاقىن ورنالاسقان «شانحاي» شاعىن اۋدانىنداعى اپاتتى جاعدايدا تۇرعان 76 تۇرعىن ءۇيدى كوشىرۋ جوسپارلانعان. سونداي-اق الداعى ءۇش جىل ىشىندە قولدانىستاعى ەكى قازاندىقتى قايتا جاڭارتۋ جانە ءبىر جاڭا قازاندىق ورناتۋ, ورتالىقتاندىرىلعان جىلۋ جەلىلەرىنە قوسىلماعان شاعىن اۋدانداردا ورامىشىلىك جىلۋ جەلىلەرىن سالۋ كوزدەلگەن. بۇل جۇمىستار كەنتتىڭ جىلۋمەن جابدىقتاۋ جەلىلەرىنە جۇرگىزىلگەن تەحنولوگيالىق ءاۋديتتىڭ قورىتىندىسىنا سايكەس جۇزەگە اسىرىلادى.
جولداردى كۇردەلى جوندەۋ مەن جاڭاسىن سالۋ, بىرقاتار الەۋمەتتىك نىساندار – مۋزىكا مەكتەبى مەن زاماناۋي سپورت كەشەنىن تۇرعىزۋ, مايقايىڭ كوشەلەرى مەن اۋلالارىن كەشەندى اباتتاندىرۋ دا جوسپارلانىپ وتىر.
اتاپ وتەرلىگى, كەيىنگى ءۇش جىلدا مايقايىڭ كەنتىن جانە وعان ىرگەلەس جاتقان سۇلۋجون, مايكوبە, شوپتىكول, ۇشق ۇلىن اۋىلدارىن دامىتۋعا وبلىستىق بيۋدجەتتەن 4 ملرد تەڭگەدەن استام قاراجات بولىنگەن. بۇل اقشا 33 كم كىرمە جول سالۋعا, كوشەلەردىڭ 17 كم ءاسفالتتى جابىنىن جوندەۋگە, جىلۋمەن جابدىقتاۋ جانە سۋ قۇبىرلارى جەلىلەرىن جاڭارتۋعا, مەكتەپتەر مەن اۋرۋحانالاردى كۇردەلى جوندەۋگە, مەكتەپ اۆتوبۋسىن, سانيتارلىق كولىك ساتىپ الۋعا, مەديتسينالىق جابدىقتاردى جاڭارتۋعا, بالالار ويىن الاڭدارىن ورناتۋعا باعىتتالعان.
جاڭا مەموراندۋم ينفراقۇرىلىمدى جاڭعىرتۋ, جاڭا نىساندار سالۋ جانە ودان ءارى اباتتاندىرۋ ءۇشىن قوسىمشا مۇمكىندىكتەر بەرىپ, كەنتتىڭ دامۋ قارقىنىن بىرنەشە ەسە ارتتىرادى.
مايقايىڭ – ەرەكشەلىگى كوپ ەلدى مەكەن. ەرەكشە دەيتىنى سول, 10 مىڭنان اسا حالىقتىڭ بەرەكەسىنە اينالعان الەمگە ايگىلى التىن كەنىشى وسىندا ورىن تەپكەن. ونىڭ ەكونوميكاسى جەراستى بايلىعىنا تاۋەلدى. التىن كەنىشى جەرگىلىكتى حالىقتى اسىراپ وتىر. «مايقايىڭالتىن» اكتسيونەرلىك قوعامى ەرتىستىڭ پاۆلودار وڭىرىندەگى ەڭ العاش قۇرىلعان تاۋ-كەن ءوندىرىسى ەكەنىن دە اتاپ وتكەن ابزال. ونداعى كەنىشكە تۇڭعىش ەكسكاۆاتور 1940 جىلى تۇسىرىلگەن ەكەن. ول بۋمەن جۇمىس ىستەيتىن ەدى. كاسىپورىنعا قازىردە بىرنەشە كەن-بايىتۋ فابريكاسى قارايدى. جەرگىلىكتى حالىقتىڭ دەنى بۇگىندە التىن وندىرىسىندە ەڭبەك ەتەدى.
پاۆلودار وبلىسى,
مايقايىڭ كەنتى