ەلدەگى ەكىنشى دەڭگەيلى بانكتەر 2025 جىلدىڭ قاڭتار-شىلدە ارالىعىندا 1,6 ترلن تەڭگە تازا پايداعا شىقتى. ۇلتتىق بانكتىڭ مالىمەتىنشە, بۇل وتكەن جىلدىڭ سايكەس كەزەڭىنەن 18,1%-عا نەمەسە 252,5 ملرد تەڭگەگە كوپ, دەپ جازادى Egemen.kz.
شىلدە ايى بانك سەكتورىنداعى ەڭ تابىستى اي بولدى. ءبىر عانا وسى ايدىڭ قورىتىندىسى بويىنشا بانكتەردىڭ تازا پايداسى 262 ملرد تەڭگەنى قۇرادى. بۇل – جىل باسىنان بەرگى رەكوردتىق كورسەتكىش ءارى وتكەن جىلدىڭ شىلدەسىمەن سالىستىرعاندا 13%-عا جوعارى.
اي سايىنعى تابىس ديناميكاسى: • قاڭتار – 228,4 ملرد تگ • اقپان – 220,3 ملرد تگ • ناۋرىز – 215,1 ملرد تگ • ءساۋىر – 240,5 ملرد تگ • مامىر – 238,6 ملرد تگ • ماۋسىم – 235,7 ملرد تگ.
ماۋسىمدا جاريالانعان جارتىجىلدىق ەسەپكە سايكەس, تابىس كولەمى بويىنشا كوش باستاپ تۇرعان بانك – Halyk Bank. ونىڭ جارتىجىلدىق تازا پايداسى 473,9 ملرد تەڭگەگە جەتكەن. ودان كەيىنگى ورىندا Kaspi Bank – 265 ملرد تەڭگە, ءۇشىنشى ساتىدا – بانك تسەنتركرەديت (137,4 ملرد تەڭگە).
قازىر ەلدە 22 بانك جۇمىس ىستەيدى. جىل ورتاسىندا قارجى سەكتورىندا بىرقاتار وزگەرىستەر بولدى: ماۋسىم ايىندا بۇرىنعى ميكروقارجى ۇيىمى بانك ليتسەنزياسىن الىپ, BNK Commercial Bank اتاۋىمەن جۇمىسىن باستادى. ال تامىزدىڭ ورتاسىندا تاعى ءبىر ءىرى ميكروقارجى ۇيىمى – KMF رەسمي تۇردە KMF بانككە اينالدى.
ساراپشىلاردىڭ ايتۋىنشا, بانكتەردىڭ تابىسى نەسيە پورتفەلىنىڭ وسۋىمەن, سونداي-اق حالىقتىڭ تۇتىنۋشىلىق نەسيەلەرگە سۇرانىسىنىڭ ارتۋىمەن بايلانىستى. بۇل ترەند جىل سوڭىنا دەيىن ساقتالۋى مۇمكىن.