قالاعا جۇمىس بابىمەن قونىس اۋدارىپ, تۇراقتاپ قالۋدى ويلاعان جاستاردى ەڭ اۋەلى باسپانا ماسەلەسى الاڭداتادى. ولاردىڭ جۇمىسقا دەگەن ىنتاسى زور بولعانىمەن بارلىعىنىڭ بىردەي ءۇيلى بولۋعا قاراجاتى جەتە بەرمەيدى. مىنە, وسىنداي تۇراقتى جۇمىسى بار جاستارعا, جاس وتباسىلارعا 2019 جىلدان باستاپ ساتىپ الۋ قۇقىعىنسىز جالدامالى پاتەر بەرىلە باستادى.
باعدارلاما استانا, الماتى, شىمكەنت جاستارىنا ارنالعان. سەبەبى تۇسىنىكتى بولار, سالىستىرمالى تۇردە ءىرى قالالاردا تۇرعىن ءۇي باعاسى قىمبات. باعدارلاما ارقىلى ۋاقىتشا پاتەرلى بولعانداردىڭ 5 جىلدا ءوز باسپاناسىنا العاشقى جارنا جيناپ ۇلگەرەتىن تولىق مۇمكىندىگى بولدى. استانا قالاسىنىڭ اكىمدىگى «جۇمىس ىستەيتىن جاستار ءۇشىن ساتىپ الۋ قۇقىعىنسىز جالعا بەرىلەتىن تۇرعىن ءۇي» باعدارلاماسى بويىنشا 2024 جىلعا دەيىن بارلىعى 3 220 پاتەر ۇلەستىرگەن. بيىل تۇرعىن ءۇيدى جالداۋ مەرزىمىنىڭ اياقتالۋىنا بايلانىستى 778 جالعا الۋشى پاتەرىن بوساتادى. وسى تۇستا جەرگىلىكتى اكىمدىك قاراپ قالماي, جاستاردىڭ جەكە تۇرعىن ءۇي ساتىپ الۋىنا بارىنشا جاردەمدەسكەن. تۇرعىن ءۇي الۋدىڭ ءتيىمدى تاسىلدەرىن كورسەتكەن. سونىڭ ءبىرى ءارى وڭتايلىسى رەتىندە «ەلوردا جاستارى» باعدارلاماسىن ۇسىنعان.
ەندى «ەلوردا جاستارى» باعدارلاماسى تۋرالى ايتار بولساق, باستاپقى جارناسى – 10%. جىلدىق پايىزدىق مولشەرلەمەسى – 5%. نەسيەلەندىرۋ مەرزىمى 19 جىلعا دەيىن. باعدارلاما شارتىنا سايكەس 20 ملن تەڭگە شاماسىندا جەڭىلدەتىلگەن نەسيە بەرىلەدى. وسى سوماعا جاستاردىڭ باستاپقى جانە ەكىنشى نارىقتان تۇرعىن ءۇي ساتىپ الۋعا مۇمكىندىگى بار. قازىر جالدامالى پاتەرىن بوساتقانداردىڭ دەنى وسى وڭىرلىك باعدارلامانىڭ شاراپاتىن كورە باستادى. جيعان قاراجاتىنا قاراي «Otbasy bank»-ءتىڭ باسقا دا باعدارلامالارىنا قاتىسىپ, ءۇيلى بولىپ جاتقاندار كەزدەسكەنىمەن, ولاردىڭ ۇلەس سالماعى سالىستىرمالى تۇردە از.
بيىل 17 اقپاننان «Otbasy bank» اق-دا نەسيەلەندىرۋ راسىمدەرىنەن ءوتۋ ءۇشىن 778 ازاماتقا جولداما بەرىلگەن. ءبىز مۇندا جالپى ستاتيستيكانى ەمەس, تەك جالدامالى پاتەردە تۇرىپ كەلگەن تۇلعالارعا قاتىستىسىن ايتىپ وتىرمىز. سايكەسىنشە, ولاردىڭ تۇرعىن ءۇيدى جالعا الۋ شارتتارى بيىل اياقتالادى. ناق قازىر 778 ازاماتتىڭ 467-ءسى «ەلوردا جاستارى» باعدارلاماسى بويىنشا جەكە تۇرعىن ءۇي ساتىپ السا, 17 جاس, جاس وتباسى ءۇي ىزدەپ جاتقان كورىنەدى. تۇرعىن ءۇيدى جالعا الۋ مەرزىمى اياقتالعان 600-دەن استام ادام باسپاناسىن بوساتقان. ەندى بوساعان ۇيلەر تۇرعىن ءۇي زاڭناماسىنىڭ تالاپتارىنا سايكەس مۇقتاج ازاماتتارعا بەرىلەدى.
باعدارلامانىڭ شاراپاتىن كورگەن جاستاردىڭ اراسىندا قاراعاندى قالاسىنىڭ تۋماسى ايمان سەرىكقىزى بار. ول استانادا 2013 جىلدان بەرى تۇرادى. قالانىڭ تىنىس-تىرشىلىگىنە مادەنيەت سالاسىندا ءجۇرىپ ۇلەس قوسىپ كەلەدى. ياعني تۇراقتى جۇمىسى بار. جالعا بەرەتىن تۇرعىن ءۇي باعدارلاماسىنا قاتىسۋعا مۇمكىندىگى كەلگەن سوڭ, ءوتىنىش قالدىرۋعا بەكىنگەن. كوپ ۇزاماي ويداعىسى ورىندالىپ, كوميسسيا شەشىمىمەن ش.ءۋاليحانوۆ كوشەسىنىڭ بويىنداعى ءبىر بولمەلى پاتەرگە كوشكەن. مەملەكەت ۇسىنعان مۇمكىندىكتى ءساتتى پايدالانعان ول, العاشقى جارناسىن ۋاقتىلى تولىقتىرىپ وتىرعان.
– ساتىپ الۋ قۇقىعىنسىز جالعا بەرىلەتىن تۇرعىن ءۇي باعدارلاماسى بىزگە زور مۇكىندىك سىيلادى. بەس جىلدا ءبىر بولمەلى پاتەرىمىزگە اي سايىن تولەپ كەلگەن اقىمىز – 7 مىڭ تەڭگەگە دە جەتپەيدى. كۇيەۋىم ارمان ەكەۋمىز 2016 جىلى وتاۋ قۇرىپ, 2020 جىلعا دەيىن پاتەر جالداپ كەلدىك. ونىڭ قۇنىن تولەۋگە جالاقىمىزدىڭ جارتىسى كەتەتىن. ارمان ەنەرگەتيكا سالاسىندا جۇمىس ىستەيدى. ەكى بالانىڭ اتا-اناسىمىز. ەندى, مىنە, «ەلوردا جاستارى» باعدارلاماسى بويىنشا ءۇيلى بولدىق. سەبەبى قالادا جەڭىلدىكپەن بەرىلەتىن تۇرعىن ءۇي باعدارلاماسىنا قاتىسۋدى كوزدەپ جۇرگەندەر كوپ-اق. پايىزدىق ۇستەمەسى, شارتتارى وتە ءتيىمدى. «Otbasy bank»-ءتىڭ ماماندارى بىزگە باعىت-باعدار كورسەتىپ وتىردى. قۇجاتتارىمىزدى تۇگەندەپ, كونكۋرسقا قاتىستىق. بانك تاراپىنان تولەم قابىلەتىمىزدى راستادىق. جاستارعا وسىنداي مۇمكىندىك سىيلاپ جاتقان ۇكىمەتكە, كەڭەسىن بەرىپ وتىرعان «Otbasy bank»-ءتىڭ ماماندارىنا العىسىمىز زور. قالانىڭ دامۋىنا سان سالادا ۇلەس قوسىپ جاتقان جاستاردىڭ, جاس وتباسىلاردىڭ ارمانى ورىندالسىن, تەزىرەك باسپانالى بولسىن, دەيدى ايمان سەرىكقىزى.
كەيىنگى جىلدارى ەل ۇكىمەتى جاستاردىڭ ءبىلىم الىپ, باسەكەگە قابىلەتتى بولۋىنا, كاسىپ اشىپ, جۇمىسپەن قامتىلۋىنا جانە باسپانالى بولۋىنا جۇيەلى تۇردە قارايلاسىپ كەلەدى. «Otbasy bank»-ءتىڭ ادەپكى باعدارلامالارىنان بولەك, وڭىرلىك دەڭگەيدە جەرگىلىكتى اكىمدىكتىڭ ارالاسۋىمەن تۇرعىن ۇيگە جەڭىلدەتىلگەن نەسيەلەر بەرىلىپ جاتىر. بۇل رەتتە ءتىزىم «ەلوردا جاستارى», «الماتى جاستارى», «قاراعاندى جاستارى», «اۋليەاتا جاستارى», «قوستاناي جاستارى», «الاتاۋ جاستارى», «اتىراۋ جاستارى» باعدارلاماسى دەپ جالعاسىپ كەتە بەرەدى. وسىلاردىڭ ىشىندە جالدامالى تۇرعىن ءۇي باعدارلاماسىنىڭ تيىمدىلىگى زور بولدى. جاستار بەس جىلدا ءوز باسپاناسىنىڭ العاشقى جارناسىن جيناپ ۇلگەرەمىز دەستى. ويتكەنى مەملەكەت ۇسىنعان جالدامالى ءۇيدىڭ تۇرعىندارى پاتەراقىعا اي سايىن 5-15 مىڭ تەڭگە عانا اقى تولەيدى. باعدارلامادا وتباسىن قۇرىپ, ءومىردىڭ جاڭا كەزەڭىنە قادام باسقان ەرلى-زايىپتىلارعا, بالالى وتباسىلارعا باسىمدىق بەرىلگەن. وسى ارالىقتا العاشقى جارناسىن جيىپ ۇلگەرگەن جاستار مەملەكەت ۇسىنعان مۇمكىندىككە العىسىن جاۋدىرىپ جاتىر. جىل سوڭىنا دەيىن جالدامالى ۇيدە ۋاقىتشا تۇرىپ كەلگەن ءالى تالاي جاس پاتەرىن مۇقتاج جاندارعا بوساتىپ, ءوز باسپاناسىنا قونىستانادى.