ءماجىلىس سپيكەرى ەرلان قوشانوۆ استاناعا رەسمي ساپارمەن كەلگەن وزبەكستان رەسپۋبليكاسى ولي ءماجىلىسى سەناتىنىڭ توراعاسى تانزيلا نارباەۆامەن كەزدەستى. تاراپتار پارلامەنتارالىق ىقپالداستىقتى ارتتىرۋ ماسەلەسىن تالقىلاپ, ەكىجاقتى قارىم-قاتىناستىڭ وزەكتى جايتتارى بويىنشا پىكىر الماستى, دەپ جازادى Egemen.kz.
قازاقستان مەن وزبەكستان اراسىنداعى پارلامەنتارالىق ديالوگ قارقىندى قانات جايىپ كەلەدى. تەك بيىلدىڭ وزىندە ەكى ەل پارلامەنتتەرىنىڭ باسشىلارى ءتۇرلى الاڭداردا بىرنەشە مارتە كەزدەسۋ وتكىزدى.
جوعارى دەڭگەيدەگى كەلىسسوزدەر بۇگىن وزبەكستان رەسپۋبليكاسى ولي ءماجىلىسى سەناتى توراعاسىنىڭ قازاقستانعا رەسمي ساپارى اياسىندا جالعاسىن تاپتى.
كەزدەسۋدە ەرلان قوشانوۆ وزبەك حالقىن كەلە جاتقان تاۋەلسىزدىك كۇنىمەن قۇتتىقتاپ, باۋىرلاس اعايىنعا باق-بەرەكە تىلەدى.
«بۇگىندە ەلدەرىمىز اراسىنداعى كۇن ءتارتىبىنىڭ مازمۇنى ارتا تۇسۋدە. ىنتىماقتاستىعىمىز ستراتەگيالىق سەرىكتەستىك پەن وداقتاستىق رۋحىندا قارقىندى دامىپ كەلەدى. بۇل – ارينە, ءبىزدىڭ پرەزيدەنتتەرىمىزدىڭ ەرەن ەڭبەگىنىڭ ناتيجەسى», دەدى ە.قوشانوۆ.
ستراتەگيالىق ارىپتەستىك پارلامەنت دەڭگەيىندە دە سەرپىندى جالعاسۋدا. پارلامەنتارالىق بايلانىس – ەكى ەل باسشىلارىنىڭ كەلىسىمدەرىن ىسكە اسىراتىن ماڭىزدى تەتىكتىڭ ءبىرى. سوندىقتان دەپۋتاتتار بۇعان ەرەكشە ءمان بەرىپ, تىعىز بايلانىستا جۇمىس اتقارىپ جاتىر.
«كوشباسشىلارىمىزدىڭ كەزدەسۋلەرىنىڭ قارقىنى مەن ناتيجەلىگى ءبىزدىڭ پارلامەنتارالىق بايلانىسىمىزدىڭ سيپاتىن ايقىندايدى. شاۆحات ميرزيوەۆتىڭ قازاقستانعا جاساعان 2021 جىلعى ساپارى بارىسىندا پرەزيدەنتتەرىمىز بارلىق ۋاعدالاستىقتىڭ ورىندالۋىن پارلامەنتتەر باقىلاۋى كەرەك دەگەن ورتاق پىكىرگە كەلدى. ءسويتىپ, پارلامەنتارالىق ىنتىماقتاستىق كەڭەسىن قۇرۋ تۋرالى شەشىم قابىلداندى. بۇگىنگى تاڭدا كەڭەس ءتيىمدى جۇمىس اتقارۋدا. ءبىز تاشكەنتتە جانە الماتىدا كەڭەستىڭ ەكى وتىرىسىن وتكىزدىك. پرەزيدەنتتەرىمىزدىڭ اراسىنداعى بارلىق كەلىسىم پارلامەنتشىلەردىڭ باقىلاۋىندا. جالپى, دەپۋتاتتارىمىزدىڭ ءار كەزدەسۋى ەكىجاقتى قارىم-قاتىناستى نىعايتۋعا ەرەكشە قارقىن بەرۋدە», دەدى ە.قوشانوۆ.
ءوز كەزەگىندە, تانزيلا نارباەۆا قوناقجايلىق تانىتقانى ءۇشىن قازاقستان تاراپىنا زور العىسىن ايتىپ, ەكىجاقتى پارلامەنتارالىق بايلانىس نىعايا بەرەتىنىنە سەنىم ءبىلدىردى.
«كوپتەگەن ماسەلە بويىنشا ءبىزدىڭ كوزقاراسىمىز ۇقساس. جانە ۇنەمى ءبىر-ءبىرىمىزدى قولداپ كەلەمىز. پرەزيدەنتتەرىمىز دە بىردەي باعىت ۇستانادى. ول – ازاماتتارىمىزدىڭ جايلى ءومىر ءسۇرۋى ءۇشىن جاعداي جاساۋ, بەيبىتشىلىك, قاۋىپسىزدىك پەن تۇراقتىلىقتى قامتاماسىز ەتۋ. كوشباسشىلارىمىز ەكى ەل اراسىنداعى تاۋار اينالىمىن 2030 جىلعا قاراي 10 ملرد دوللارعا جەتكىزۋ جونىندە اۋقىمدى مىندەت قويدى. وعان بارلىق مۇمكىندىك بار. ءبىزدىڭ ماقساتىمىز – پرەزيدەنتتەرىمىزدىڭ كەلىسىمدەرىن ىسكە اسىرۋ ءۇشىن زاڭنامالىق نەگىز قالىپتاستىرۋ», دەدى تانزيلا نارباەۆا.