پرەمەر-ءمينيستردىڭ ءبىرىنشى ورىنباسارى رومان سكلياردىڭ توراعالىعىمەن ەلىمىزدىڭ ءىرى ونەركاسىپتىك كاسىپورىندارىنىڭ قىزمەتىنە جاساندى ينتەللەكت (جي) تەحنولوگيالارىن ەنگىزۋ ماسەلەلەرى بويىنشا جيىن ءوتتى.
وعان ورتالىق مەملەكەتتىك ورگاندار, ۇلتتىق كومپانيالار, سالالىق بىرلەستىكتەر مەن ءىرى ونەركاسىپتىك كاسىپورىنداردىڭ باسشىلارى قاتىستى. كۇن تارتىبىندە ءىرى ونەركاسىپتىك كاسىپورىنداردا جاساندى ينتەللەكتىنى ەنگىزۋدىڭ اعىمداعى مارتەبەسى, تسيفرلىق تەحنولوگيالار مەن جاساندى ينتەللەكت نەگىزىندە وڭدەۋشى ونەركاسىپتى دامىتۋ, ونەركاسىپتە جاساندى ينتەللەكتىنى قولدانۋ تاجىريبەسى مەن ونى ودان ءارى دامىتۋ جوسپارلارى قارالدى.
«جاساندى ينتەللەكتىنى ەنگىزۋ – بۇل جاي عانا تەحنولوگيالاردى جاڭعىرتۋ ەمەس, بۇكىل ەكونوميكا ءۇشىن ستراتەگيالىق قادام. ەلىمىز ءوز ونەركاسىبىنىڭ الەمدىك نارىقتاعى باسەكەگە قابىلەتتى جەكە ساراپتاماسى مەن شەشىمدەرىن قالىپتاستىرۋعا ءتيىس», دەدى رومان سكليار.
وتاندىق تەحنولوگيالىق شەشىمدەردى ەنگىزۋگە, سونداي-اق وزىق الەمدىك تاجىريبەمەن الماسۋدى قامتاماسىز ەتۋگە ەرەكشە نازار اۋدارىلدى. جوسپارلانعان شارالاردى جۇزەگە اسىرۋ وندىرىستىك ۇدەرىستەردىڭ تيىمدىلىگى مەن قاۋىپسىزدىگىن ارتتىرۋعا عانا ەمەس, سونىمەن قاتار تەحنولوگيالىق جاڭعىرتۋعا, ونىمدىلىكتىڭ وسۋىنە, قازاقستاننىڭ يندۋستريالىق دامۋ كوشباسشىلارى قاتارىنداعى پوزيتسياسىن نىعايتۋعا تۇراقتى نەگىز قالىپتاستىرۋعا مۇمكىندىك بەرەدى.