ەلىمىزدەگى اسكەري-تەڭىز كۇشتەرى تەڭىزدە ورىن الاتىن ءتۇرلى قاۋىپ-قاتەرگە تويتارىس بەرۋ وپەراتسياسىن جۇرگىزۋدىڭ امال-تاسىلدەرىن پىسىقتادى. جەدەل-تاكتيكالىق وقۋ-جاتتىعۋ كاسپي تەڭىزىندە ءوتتى. گەوساياسي جاعىنان ماڭىزدى ستراتەگيالىق ايماقتا سىنالعان اسكەري-تەڭىز كۇشتەرىمىزدىڭ الەۋەتى قانداي؟
كاسپي تەڭىزىنىڭ جاعالاۋىندا بەس مەملەكەتتىڭ اسكەري-تەڭىز كۇشتەرى ورنالاسقان. قاۋىپ-قاتەر تونگەن جاعدايدا قاي ەلدىڭ بولسىن سول جەردەگى كۇشتەرى ونى قۇرىقتاۋ قاجەت, ءتىپتى كەيدە بىرلەسكەن وپەراتسيالار دا ورىندالادى. كاسپي ايدىنىندا اسكەري-تەڭىز كۇشتەرىنىڭ جاۋىنگەرلەرى الدىمەن قارسىلاستىڭ كەمە توبىنا بىرلەسكەن سوققى بەرۋ امالدارىن جاسادى. بۇل تاپسىرما اسكەري كەمەلەر مەن مي-8 جانە مي-35 تىكۇشاقتارىنا جۇكتەلدى.
سونداي-اق زىمىراندى ارتيللەريالىق كەمەسىنىڭ كومانديرى ەرلان وسپانوۆتىڭ ايتۋىنشا, شابۋىلداۋشى جاقتىڭ كەمەلەرىنە, اۋە نىساندارىنا قارسى تويتارىس بەرۋ, سۋ ءۇستى ديۆەرسانتتارىنىڭ كوزىن جويۋ جاۋىنگەرلىك اتىستارى وتكىزىلگەن. اسكەري-تەڭىز كۇشتەرى دابىل بويىنشا كوتەرىلىپ, ناقتى ۇرىسقا جاقىن جاعدايدا بولىمشەلەردىڭ جاۋىنگەرلىك دايىندىق دەڭگەيىن تولىق تەكسەرۋگە مۇمكىندىك بەرگەن.
سۋ استىنان جارىلعىش زاتتار ىزدەپ, اپاتقا ۇشىراعان كەمەنى قۇتقارۋعا تەڭىزشىلەر قاتىستى. ولار سونداي-اق تەڭىزدە كەمە جۇرگىزۋ ماشىقتارىن پىسىقتادى. اسكەري-تەڭىز كۇشتەرى كاسپي تەڭىزىنىڭ ورتالىق بولىگىندە وقۋ-جاتتىعۋ شتۋرماندىق جورىعىن وتكىزگەن. شتۋرماندىق دايىندىق بويىنشا شتابتىڭ جەتەكشى مامانى كاپيتان-لەيتەنانت قۋانىشبەك دۇيسەمباەۆتىڭ ايتۋىنشا, مۇندا تەڭىزشىلەر كەمەنى باسقارۋ داعدىلارىن جەتىلدىرىپ, شتۋرماندىق قىزمەتتى ۇيىمداستىرۋدى تاجىريبە جۇزىندە مەڭگەردى.
ساباق بارىسىندا جاۋىنگەرلەر تەڭىزدەگى اسكەري ءىس-قيمىلدار تەاترىنىڭ ەرەكشەلىكتەرىن زەرتتەۋگە جانە ءتۇرلى كەمە جۇرگىزۋ ادىستەرىن قولدانۋ ارقىلى ناۆيگاتسيالىق مىندەتتەردى دە ورىنداعان. وقۋ جورىعىنىڭ قورىتىندىسى بويىنشا شتۋرماندىق جاۋىنگەرلىك بولىمشەنىڭ وفيتسەرلەرى سىناقتى ءساتتى تاپسىرعان.
تەڭىزدەگى پراكتيكالىق وپەراتسيالارعا اسكەري-تەڭىز كۇشتەرى زاپاستاعى وفيتسەرلەرى العاش رەت قاتىسقان. جيىنعا شاحماردان ەسەنوۆ اتىنداعى كاسپي مەملەكەتتىك تەحنولوگيالار جانە ينجينيرينگ ۋنيۆەرسيتەتىنىڭ اسكەري-تەڭىز كافەدراسىندا بۇرىن وقىعان 30 اسكەري مىندەتتى تارتىلدى. ولاردىڭ بارلىعى – كورابلدەردى شتۋرمانمەن قامتاماسىز ەتۋ, راديوتەحنيكالىق بايلانىس قۇرالدارىن, سونداي-اق ديزەل-ەنەرگەتيكالىق قوندىرعىلاردى پايدالانۋ جانە جوندەۋ سالاسىنداعى ماماندار.
جيىن اياقتالعان سوڭ جاقسى ناتيجە كورسەتكەندەرگە زاڭناماعا سايكەس كەزەكتى اسكەري شەن بەرىلدى. مۇنداي جيىنداردى وتكىزۋ رەزەرۆتى دايارلاۋ جۇيەسىن دامىتۋداعى جانە ەل اسكەري-تەڭىز كۇشتەرىنىڭ جاۋىنگەرلىك الەۋەتىن نىعايتادى. جەدەل-تاكتيكالىق وقۋ-جاتتىعۋدىڭ قورىتىندىسى بويىنشا, ەلىمىزدىڭ تەڭىز اسكەرىنە «كاسپيدەگى قاۋىپسىزدىكتى قامتاماسىز ەتە الاتىن دەڭگەيدە», دەگەن باعا بەرىلدى.
– وقۋ-جاتتىعۋ قورىتىندىسى بويىنشا جەكە قۇرام جەدەل جانە تاكتيكالىق دايارلىق دەڭگەيىن ارتتىرىپ, بولىمشەلەر اراسىنداعى ءوزارا ءىس-قيمىل, سونداي-اق كاسپي تەڭىزىنىڭ وتاندىق سەكتورىندا قاۋىپسىزدىكتى قامتاماسىز ەتۋ جونىندەگى مىندەتتەردى ءتيىمدى ورىنداۋ قابىلەتى بويىنشا قويىلعان ماقساتتارعا قول جەتكىزدى, – دەدى باس قولباسشىنىڭ ورىنباسارى-قك اتك باس قولباسشىسى باسقارماسى جاۋىنگەرلىك دايارلىق باسقارماسىنىڭ باستىعى 1-دارەجەلى كاپيتان دانيار حايرۋشەۆ.