تۇركىستان وبلىسىنىڭ تاريحي ورىندارىنا بيىلعى 6 ايدىڭ قورىتىندىسىمەن 520,7 مىڭ ادام كەلگەن. ال وڭىردەگى تابيعي اۋماقتارعا كەلۋشىلەر سانى 80,2 مىڭ ادامعا جەتتى. بيىل تۋريزم سالاسىنداعى نەگىزگى كاپيتالعا تارتىلعان ينۆەستيتسيالار كولەمى 33 ملرد تەڭگە بولدى, دەپ حابارلايدى Egemen.kz.
وبلىستىق تۋريزم باسقارماسىنىڭ باسشىسى نۇرداۋلەت مەدەۋوۆتىڭ مالىمدەۋىنشە, جىل باسىنان بەرى تۋريزم سالاسىنداعى قىزمەت كولەمى 1,5 ملرد تەڭگەنى قۇراپ, وتكەن جىلدىڭ ءتيىستى كەزەڭىنەن 1,3%-عا وسكەن. شەتەلدىك تۋريستەردىڭ سانى دا وتكەن جىلدىڭ ءتيىستى كەزەڭدەرىمەن سالىستىرعاندا 2 ەسەگە ارتىپ وتىر.
«E-qonaq» جۇيەسىنە سايكەس, قاڭتار-ماۋسىم ايلارىندا وڭىرگە كەلگەن شەتەلدىكتەردىڭ سانى 24 مىڭعا جۋىقتاپتى. «قىتاي, جاپونيا, يتاليا, گەرمانيا ەلدەرىنەن كەلگەن تۋريستەردىڭ سانى ارتىپ كەلەدى. حالىقارالىق باق-تا تۇركىستان تۋرالى كەڭىنەن اقپاراتتار تاراتىلىپ, ءوڭىردىڭ تۋريستىك الەۋەتى تانىستىرىلىپ كەلەدى. شاھاردا جىل سوڭىنا دەيىن ەسكەك ەسۋ كانالى ىسكە قوسىلماق. سونىمەن قاتار, قولونەرشىلەر قالاشىعى دا بيىل اياقتالادى دەپ كۇتىلۋدە. كۇلتوبە قالاشىعى جوباسىن دا جاقىندا ىسكە قوسۋ جوسپارلانىپ وتىر. بيىل جالپى 27 ينۆەستيتسيالىق جوبا جۇزەگە اسىرىلادى. بۇل جوبالارعا 26,3 ملرد تەڭگە كولەمىندە ينۆەستيتسيا تارتىلىپ, 1 130 جاڭا جۇمىس ورنى اشىلادى دەپ جوسپارلانۋدا. سونىمەن قاتار, تۋريستىك ينفراقۇرىلىم سالاسىندا 11,3 ملرد تەڭگە كولەمىندەگى 6 جوبا ىسكە اسىرىلماق. جىل سوڭىنا قاراي تۇركىستان وبلىسىنا كەلەتىن تۋريستەر سانى 350 مىڭ ادامعا جەتەدى دەپ كۇتىلۋدە. جالپى سالاداعى ينۆەستيتسيا كولەمىن 55,8 ملرد تەڭگەگە جەتكىزۋ مەجەلەنىپ وتىر», دەدى باسقارما باسشىسى.
سونداي-اق وڭىردە قوناق ۇيلەردىڭ سانى 245-كە, دەمالىس ورىندارى 298-گە جانە ەمدىك-ساۋىقتىرۋ كەشەندەرىنىڭ سانى 117-گە جەتتى. بيىلدىڭ I توقسانى بويىنشا قوناق ۇيلەرگە جايعاسقان تۋريستەر سانى 61,3 مىڭ ادامعا جەتىپ, وتكەن جىلدىڭ ءتيىستى كەزەڭىنەن 1,5%-عا وسكەن.