دەپۋتاتتار وڭىردەگى بىرقاتار نىسانداردى ارالاپ, ينفراقۇرىلىمنىڭ دامۋى جانە مەملەكەتتىك باعدارلامالاردىڭ ورىندالۋ بارىسىمەن تانىستى. سونداي-اق جەرگىلىكتى تۇرعىندارمەن كەزدەسىپ, مۇڭ-مۇقتاجىنا قۇلاق ءتۇرىپ, تۇيتكىلدى ماسەلەلەرىن بىرلەسە تالقىلادى.
ءماجىلىس دەپۋتاتى, «Amanat» پارتياسى فراكتسياسىنىڭ مۇشەسى ەربولات ساتىبالدين «جەزقازعان – قىزىلوردا» تاس جولىنىڭ جاعدايىن باقىلاپ قايتتى. ايماقتاعى اۆتوجولدىڭ 200 شاقىرىمنان اسا بولىگى جاڭارتىلىپ جاتىر.
ەربولات ساتىبالدين جوندەلىپ جاتقان جولداردىڭ ساپاسىن جەكە باقىلاۋىنا الدى. ءارى مەردىگەرلەرگە جۇمىس قارقىنىن جەدەلدەتۋ كەرەگىن ايتتى. سونداي-اق ول تۇرعىندارمەن كەزدەسىپ, حالىقتى زاڭنامالىق دەڭگەيدە اتقارىلىپ جاتقان جۇمىستاردان حاباردار ەتتى.
– ەگەر بۇرىن اقىلى جولداردان تۇسكەن قاراجات تەك سول جولداردىڭ جوندەۋ جۇمىستارىنا عانا جۇمسالسا, ەندى ول بۇكىل ينفراقۇرىلىمنىڭ دامۋىنا پايدالانىلادى. سونىمەن قاتار اۆتوكولىك يەسى اقىلى جولعا بەرەشەگى بولسا, كولىكتى ساتا المايدى نەمەسە قايتا تىركەي المايدى. جۇرگىزۋشىلەر مەن تاسىمالداۋشىلاردىڭ ءبىرىنشى ساناتتاعى اقىلى جولدار ساپاسىنا قاتىستى شاعىمدارىن تىڭداساڭىز, زاڭ جوباسىنىڭ ماڭىزى ايقىن كورىنەدى. جۇرگىزۋشىلەر اقىلى جولدى ۋاقتىلى تولەسە دە, جول ساپاسىنىڭ تومەندىگى سالدارىنان كولىكتى جوندەۋگە قوسىمشا شىعىندانۋعا ءماجبۇر بولادى. ەگەر بۇل قاراجات تەگىن جولدارعا باعىتتالسا, ساپا ستاندارتىن ارتتىرۋعا جانە حالىقتىڭ جول ساپاسىنا دەگەن سەنىمىن نىعايتۋعا مۇمكىندىك بەرەدى, – دەدى ە.ساتىبالدين.
جەتىسۋ وبلىسىنا جۇمىس ساپارى اياسىندا ءماجىلىس دەپۋتاتى, «اق جول» پارتياسى فراكتسياسىنىڭ جەتەكشىسى ازات پەرۋاشەۆ جاقىندا تالدىقورعاندا اشىلعان «ASMA Industrial» زاماناۋي وندىرىستىك اككۋمۋلياتور زاۋىتىنىڭ تىنىس-تىرشىلىگىمەن تانىستى.
بۇل زاۋىت – اتالعان وبلىس ءۇشىن ماڭىزدى ينۆەستيتسيالىق جوبا. وعان 3 ملرد تەڭگەدەن استام قارجى قۇيىلىپ, 180 جاڭا جۇمىس ورنى اشىلدى.
– ءبىز جاڭا تەحنولوگيالاردى قولداۋىمىز كەرەك. ەگەر زاماناۋي تالاپتارعا ساي مەملەكەت بولعىمىز كەلسە, ەكونوميكالىق جوبالاردى جۇزەگە اسىرىپ, وسىنداي زاۋىتتاردى ىسكە قوسۋ اسا ماڭىزدى, – دەدى ا.پەرۋاشەۆ.
كاسىپورىندى ارالاۋ بارىسىندا دەپۋتات شيكىزات جەتكىزۋ, سالىق سالۋ جانە باسقا دا بىرقاتار ماسەلەگە نازار اۋداردى. زاۋىتتىڭ باس ديرەكتورى سەرىكباي اجماعانبەتوۆ بۇل باعىتتا ەشقانداي تۇيتكىل جوق ەكەنىن, شيكىزات جەتكىزۋ ۋاقتىلى جۇزەگە اسىرىلىپ وتىرعانىن جەتكىزدى.
ال ءماجىلىس دەپۋتاتى, جسدپ فراكتسياسىنىڭ مۇشەسى ناۋرىز سايلاۋباي قاپشاعايداعى №6 جاعاجايدا جۇمىس ىستەيتىن كاسىپكەرلەرمەن كەزدەستى. جۇزدەسۋدە جاعالاۋ اۋماعىن اباتتاندىرۋ, ينفراقۇرىلىمدى جاڭعىرتۋ جانە بيزنەستىڭ مۇددەسىن قورعاۋ ماسەلەلەرى تالقىلاندى.
كەزدەسۋگە قوناەۆ قالاسىنىڭ اكىمى اسحات بەردىحانوۆ, «اتامەكەن» كاسىپكەرلەر پالاتاسىنىڭ, «جاسىل قالا» مەكەمەسىنىڭ وكىلدەرى مەن وزگە دە كاسىپكەرلەر قاتىستى.
ناۋرىز سايلاۋباي قاپشاعاي سۋقويماسىنىڭ تۋريستىك الەۋەتىن بيزنەس وكىلدەرىمەن بىرلەسە دامىتۋدىڭ ماڭىزدىلىعىن اتاپ ءوتتى.
– جاعالاۋ ايماعىنىڭ دامۋى كاسىپكەرلەردىڭ قۇقىقتارىن شەكتەۋ ەسەبىنەن ەمەس, ولارمەن ارىپتەستىك ارقىلى جۇزەگە اسۋى ءۇشىن كۇش سالامىز. ءتۋريزمدى دامىتۋعا ءوز كۇشىن دە, قاراجاتىن دا جۇمساپ جۇرگەن ازاماتتاردىڭ مۇددەلەرى قورعالۋعا ءتيىس, – دەدى دەپۋتات.
كەزدەسۋگە باستاماشى بولعان كاسىپكەردىڭ ءبىرى – قامبار بايكەنوۆ. ول تۋريزم سالاسىنىڭ باسقارىلۋعا ءتيىستى قۇرىلىمدا بولۋى كەرەك ەكەنىن ايتتى.
باسقوسۋدا كاسىپكەرلەر ينجەنەرلىك كوممۋنيكاتسيالاردىڭ جوقتىعى, كەشەندى اباتتاندىرۋدىڭ قاجەتتىلىگى مەن اكىمشىلىك شەكتەۋلەر سياقتى بىرقاتار ماسەلەگە نازار اۋداردى. قالا اكىمدىگى مەن ءتيىستى مەكەمە وكىلدەرى بۇل ماسەلەلەردى بىرلەسە شەشۋگە دايىن ەكەندەرىن جەتكىزدى. كەزدەسۋ اياعىندا وسى ماۋسىمنىڭ سوڭىنا دەيىن №6 جاعاجايدى دامىتۋ جوسپارىن دايىنداۋ تۋرالى شەشىم قابىلداندى.