پرەمەر-مينيستر ولجاس بەكتەنوۆ قىرعىزستاننىڭ شولپان-اتا قالاسىندا ءوتىپ جاتقان ەۋرازيالىق ۇكىمەتارالىق كەڭەستىڭ شاعىن قۇرامداعى وتىرىسىنا قاتىستى.
سونداي-اق بۇل جيىنعا بەلارۋس رەسپۋبليكاسىنىڭ پرەمەر-ءمينيسترى الەكساندر تۋرچين, قىرعىز رەسپۋبليكاسى مينيسترلەر كابينەتىنىڭ توراعاسى – پرەزيدەنت اكىمشىلىگىنىڭ باسشىسى ادىلبەك قاسىماليەۆ, رەسەي فەدەراتسياسى ۇكىمەتىنىڭ توراعاسى ميحايل ميشۋستين جانە ارمەنيا رەسپۋبليكاسىنىڭ ۆيتسە-پرەمەرى مگەر گريگوريان قاتىستى.
وندا بيىلعى 31 قاڭتاردا الماتى قالاسىندا وتكەن ەۋرازيالىق ۇكىمەتارالىق كەڭەستە بەرىلگەن تاپسىرمالاردىڭ ورىندالۋ بارىسى قارالدى. كەدەندىك جانە سالىقتىق اكىمشىلەندىرۋدى تسيفرلاندىرۋ سالاسىنداعى ينتەگراتسيانى دامىتۋدىڭ ستراتەگيالىق باعىتتارىن جۇزەگە اسىرۋعا, قازىرگى زامانعى تەحنولوگيالاردى قولدانا وتىرىپ اقپارات الماسۋدى جەتىلدىرە تۇسۋگە نازار اۋدارىلدى.
ساپار اياسىندا ۇكىمەت باسشىسى ولجاس بەكتەنوۆ «قازاقستان» شيپاجايىنىڭ جاڭا عيماراتىنىڭ قۇرىلىس الاڭىندا بولىپ, عىلىم جانە جوعارى ءبىلىم ۆيتسە-ءمينيسترى گۇلزات كوبەنوۆا, تۋريزم جانە سپورت ۆيتسە-ءمينيسترى سەرىك جاراسپاەۆ پەن پرەزيدەنت ءىس باسقارماسى مەديتسينالىق ورتالىعىنىڭ باسشىسى الەكسەي تسويدىڭ قىرعىزستاندا ورنالاسقان ەلىمىزگە قاراستى كۋرورتتىق-رەكرەاتسيالىق ءتورت نىساننىڭ جاعدايى تۋرالى باياندامالارىن جانە ينۆەستورلارمەن سەرىكتەستىكتە ولاردى كەزەڭ-كەزەڭىمەن جاڭعىرتۋ جوسپارلارىن تىڭدادى.
پرەمەر-مينيسترگە «قازاقستان» شيپاجايىنىڭ جاڭا عيماراتى قۇرىلىسىنىڭ جوسپارلى تۇردە جۇرگىزىلىپ جاتقانى: دەمونتاجداۋ جانە قۇرىلىس ورنىن دايىنداۋ جۇمىستارى اياقتالعانى, نەگىزگى كورپۋستاردىڭ, كوتتەدجدەر مەن شارۋاشىلىق بلوكتاردىڭ ىرگەتاسى مەن ءمونوليتتى قاڭقاسىن سالۋ جالعاسىپ جاتقانى تۋرالى باياندالدى.
سونداي-اق 500 ورىندىق «سامال» دەمالىس ۇيىنە جاڭعىرتۋ جۇمىستارىن جۇرگىزۋ جوسپارلانعان. قازىردىڭ وزىندە ينۆەستور انىقتالىپ, ينۆەستيتسيالىق كەلىسىمنىڭ جوباسى دايىندالىپ, جىل بويى جۇمىس ىستەيتىن 3-4 جۇلدىزدى زاماناۋي قوناق ءۇي سالۋ ءۇشىن جوبالاۋ-سمەتالىق قۇجاتتاما ازىرلەنىپ جاتىر.
بوستەري (ىستىقكول وبلىسى) اۋىلىنداعى «ۋنيۆەرسيتەت» سپورتتىق-ساۋىقتىرۋ لاگەرىندەگى كۋرورتتىق-رەكرەاتسيالىق ايماقتى دامىتۋ تۇجىرىمداماسىن ازىرلەۋ قولعا الىنعان. نىساندى رەكونسترۋكتسيالاۋ بويىنشا ينۆەستورلارمەن كەلىسسوزدەر جۇرگىزىلىپ جاتىر. اتالعان نىسان بازاسىندا ەلىمىزدىڭ سپورتشىلارىن جاتتىقتىرۋعا ارنالعان سپورتتىق ينفراقۇرىلىم – سپورت زالدارى, باسسەيندەر جانە تاعى باسقا نىساندار قۇرىلادى.
سونداي-اق ينۆەستورمەن بىرلەسىپ «وليمپ» سپورتتىق-ساۋىقتىرۋ ورتالىعىن جوندەۋ, جۇمىس ىستەپ تۇرعان نىسانداردى رەكونسترۋكتسيالاۋ جانە قوسىمشا سپورت عيماراتتارىن سالۋ ماسەلەسى پىسىقتالىپ جاتىر.
پرەمەر-مينيستر جاۋاپتى مينيسترلىكتەر مەن مۇددەلى مەملەكەتتىك ۇيىمدارعا جوبالاردىڭ ساپالى جۇزەگە اسىرىلۋىن قامتاماسىز ەتۋدى جانە رەكونسترۋكتسيالاۋدى باستاۋ ءۇشىن قاجەتتى راسىمدەردى جەدەلدەتۋدى تاپسىردى.