E-Qazyna ەلەكتروندى ساۋدا پلاتفورماسىندا قايتارىلعان اكتيۆتەردىڭ ءبىرى – الماتى وبلىسىنداعى جەر تەلىمىن ساتۋ بويىنشا وتكەن اۋكتسيوندىق ساۋدا ساتىمەن اياقتالدى. كەزىندە جەكەنىڭ قولىنا زاڭسىز ءوتىپ كەتكەن جەر تەلىمىنىڭ لوتى 217 ملن تەڭگەگە ساتىلدى.
بۇل تۋرالى «قايتارىلعان اكتيۆتەردى باسقارۋ» كومپانياسىنىڭ (قابك) ءباسپاسوز قىزمەتى حابارلادى. اۋكتسيون تولىق اشىقتىق جانە جاريالىلىق جاعدايىندا ءوتىپ, بارلىق قاتىسۋشىلارعا تەڭ مۇمكىندىك بەرىلگەن. ساۋدانىڭ ەلەكتروندىق فورماتى ۇدەرىستىڭ وبەكتيۆتىلىگىن جانە باسەكەلەستىك ورتانى قامتاماسىز ەتكەن.
قابك ءباسپاسوز قىزمەتى تۇسىندىرگەندەي, بەلگىلەنگەن تارتىپكە سايكەس, ساۋدا اياقتالعاننان كەيىن 10 جۇمىس كۇنى ىشىندە جەڭىمپاز بەن ساتۋشى ساتىپ الۋ-ساتۋ شارتىن جاساسۋى ءتيىس.
«نىسان ساتىپ الۋشىدان بارلىق قاراجات ساتۋشىنىڭ شوتىنا تولىق تۇسكەننەن كەيىن عانا تاپسىرىلادى.
ساتۋدان تۇسكەن قاراجات ارنايى مەملەكەتتىك قورعا اۋدارىلىپ, ول ءبىلىم بەرۋ, دەنساۋلىق ساقتاۋ, ينفراقۇرىلىمدى دامىتۋ جانە الەۋمەتتىك وسال توپتاردى قولداۋ سياقتى باسىم الەۋمەتتىك جوبالاردى قارجىلاندىرۋعا جۇمسالادى», دەلىنگەن كومپانيانىڭ اقپاراتىندا.
ەسكە سالا كەتسەك, «قايتارىلعان اكتيۆتەردى باسقارۋ كومپانياسى» جشس مەملەكەت باسشىسى ۇسىنعان زاڭ مەن ءتارتىپ باستاماسى اياسىنداعى ءوز ميسسياسىن ويداعىداي ورىنداپ كەلەدى. ياعني مەملەكەتكە قايتارىلعان اكتيۆتەردى ءتيىمدى, اشىق جانە قوعامدىق پايداعا باعىتتاپ, ولاردى ەلدىڭ دامۋى مەن ازاماتتاردىڭ ءال-اۋقاتىن ارتتىرۋعا جۇمىس ىستەيتىن ەكونوميكالىق اينالىمعا تارتۋ ءىسى جالعاسا بەرمەك.