اۋىلدى سەرپىلتەتىن مۇمكىندىك كوپ

جوبانىڭ العاشقى كۇنى باتىس قازاقستان وبلىسى اكىمىنىڭ ورىنباسارى قايىرجان مەڭدىعاليەۆ وبلىس جانە اۋداننىڭ بەلسەندى جاستارىمەن كەزدەستى. ول كەزدەسۋدە كوتەرىلگەن ويلار مەن ۇسىنىستار اۋىل جاستارىنىڭ قوعام ومىرىنە بەلسەندى ارالاسۋعا دايىن ەكەنىن كورسەتكەنىن اتاپ ءوتتى.

– ءبىز جاستاردىڭ جۇمىسقا ورنالاسۋ, ءبىلىم الۋ جانە بوس ۋاقىتتى ءتيىمدى پايدالانۋ باعىتىنداعى باس­تامالارىن قولدايمىز. جاستاردىڭ يدەياسى – اۋىلدىڭ, ءوڭىردىڭ دامۋىنا قوسىلعان ۇلەس. ەڭ باستىسى, جاستار العا قويعان ماقساتتان تايماي, جاڭا مۇمكىندىكتەردى پايدالانا ءبىلۋى كەرەك, – دەيدى قايىرجان ەرمەك ۇلى.

وسى جيىن بارىسىندا جاس­تار اراسىنداعى بەلسەندى ازاماتتار, اسىرەسە قايىرىمدىلىق شارالارىنا بەلسەنە قاتىسىپ جۇرگەن ەرىكتى, جاس كاسىپكەر دانا ەرمۇحانوۆا, جيھاز تسەحىن دامىتىپ وتىرعان كاسىپكەر, مەتسەنات ەربول اياپوۆ, قۇس شارۋاشىلىعىن جولعا قويىپ, مەملەكەتتىك گرانت يەگەرى اتانعان ماناس اسىلحان ۇلى,ءتارتىپ ساقشىسى, پوليتسيا قىزمەتكەرى ورازعالي ورازىمبەتوۆ سىندى قىز-جىگىتتەر العىسحاتقا يە بولدى.

«اۋىل life» جوباسى اياسىندا بەلگىلى شاشتاراز بەرىك قايىرشا «قايشىداعى كرەاتيۆ», SMM مامان, بلوگەر ادەمى جاراسوۆا ء«بىزدىڭ الەم», بلوگەر, قولونەر شەبەرى داراجات حاپاروۆا «بالا­لارىمىزدى بۇگىننەن دامىتايىق» تاقىرىبىندا شەبەرلىك ساعاتىن وتكىزىپ, ءوز تاجىريبەلەرىن ايتىپ بەردى. سونىمەن قاتار جوبا قاتىسۋشىلارى اۋداندىق تاريحي-ولكەتانۋ مۋزەيىن, اۋداندىق ورتالىقتاندىرىلعان كىتاپحانانى ارالاپ كورىپ, جۇمىسىمەن تانىس­تى.

اۋىل جاستارىنىڭ ءومىرىن قامتىعان ەكىنشى كۇنگى ءىس-شارالار دا وتە قىزىقتى ءوتتى. «ساۋىپ ىشكەننىڭ ءدامى بولەك» اتتى بايقاۋدا قىزدار سيىر ساۋ شەبەرلىگىن سىنعا سالسا, «قاستەرلى كاسىپ» بولىمىندە جىگىتتەر قوي سويۋدىڭ ءداستۇرلى ادىستەرىن كورسەتىپ, ەتتى مۇشەلەۋ مەن وڭدەۋدىڭ قىر-سىرىن تانىس­تىردى. كەلەسى بولىمدە ارۋلار ۇلتتىق تاعامداردى دايىنداپ, ءدامى ءتىل ۇيىرەر اس ءمازىرىن ۇسىندى. ال «بىرلىك كۇش بەرەدى» اتتى سايىستا كوماندالار ارقان تارتىسىپ, كۇش سىناستى. بۇدان كەيىن جىگىتتەر اساۋعا قۇرىق سالۋ شەبەرلىگىن كورسەتىپ, اتقا ءمىنۋدىڭ ادىستەرىن تانىستىرسا, قىزدار «اۋىلدىڭ اق ءدامى» دەپ قۇرت دايىنداۋدىڭ ءداستۇرلى تاسىلدەرىن كورسەتتى. سوڭىنان جىگىتتەر قوي كوتەرىپ, لاڭگى تەۋىپ تە جارىستى. ال قىزدار ۇرشىق يىرۋدەن سىنعا ءتۇستى.

تارتىستى وتكەن جارىستا ءى ورىندى «قوسوزەن» كومانداسى يەلەنسە, ءىى ورىندى «جارقىرا» كومانداسى, ءىىى ورىندى «رۋح» كومانداسى قانجىعاعا بايلادى.

– بۇل اۋىل جاستارىن ءبىر سەرپىلت­كەن جوبا بولدى. جاستار جاڭا يدەيالارمەن قاناتتانىپ كەتتى. وسىنداي جوبالار ارقىلى اۋىلىمىزدىڭ الەۋەتى ارتا تۇسەدى دەپ ويلايمىن, – دەيدى قازتالوۆ اۋدانى اكىمىنىڭ ورىنباسارى سەرىك قايىرليەۆ.

ال كرەاتيۆتى ءىس-شاراعا كەلگەن ءبيبىنۇر حاميت ەسىمدى قاتىسۋشى وسى جوبانىڭ ارقاسىندا العاش رەت كيىز ۇيگە تۇنەگەنىن ايتتى. ول شاڭىراققا قاراپ جاتىپ, جەردەن ەرەكشە ءبىر قۋات العان سەزىمىن دە جاسىرا المادى.

– تاڭعى سالقىنمەن ويانىپ, كۇننىڭ شىعۋىن تاماشالادىق. تابي­عاتتىڭ تىلسىم تىنىسى جانى­مىزعا تىنىشتىق سىيلادى. جوبا اياسىنداعى ەكىنشى كۇن دە ەرەكشە باستالدى. جىگىتتەر قوي سو­يىپ, قىزدار ەت اسىپ, نان يلەپ, اۋىل ءومىرىنىڭ قىزىقتى ساتتەرىن باستان وتكەردى. ءجۇن ءتۇتىپ, ۇرشىق ءيىرۋ سەكىلدى ۇمىتىلىپ بارا جاتقان ءداستۇرلى ىستەرگە ارالاسىپ, سوناۋ بالالىق شاقتاعى اجە-انالاردىڭ مەيىرىمى مەن جىلۋىن ەسكە العان قاتىسۋشىلار كوزدەرىنە جاس الدى. «اۋىل life» جوباسى ۇلتتىق رۋحىمىزدى وياتتى, – دەيدى ب.حاميت.

باتىس قازاقستان وبلىسى