اەس قۇرىلىسىنىڭ العاشقى قادامى باستالدى

بۇگىنگى سالتاناتتى شارا ينجەنەرلىك-ىزدەستىرۋ جۇمىستارىنىڭ باستالۋى – قازاقستاندا اتوم ەلەكتر ستانساسىن سالۋ جولىنداعى نەگىزگى دايىندىق كەزەڭى, وعان ناقتى ۋچاسكە مەن قوندىرعىنىڭ كونفيگۋراتسياسىن تاڭداۋ عانا ەمەس, سونىمەن قاتار بۇكىل جوبانىڭ قاۋىپسىزدىگى, سەنىمدىلىگى جانە ەكونوميكالىق تيىمدىلىگى دە بايلانىستى.

«قادىرلى اعايىن, قۇرمەتتى ارىپتەستەر, دوستار, شەتەلدىك سەرىكتەستەر! بۇگىن ءبىز «روساتوم» مەملەكەتتىك كورپوراتسياسىمەن بىرلەسىپ, قازاقستانداعى العاشقى اتوم ەلەكتر ستانساسىنىڭ قۇرىلىسىنا باعىتتالعان ينجەنەرلىك-ىزدەستىرۋ جۇمىستارىن باستاپ وتىرمىز. بۇل كەزەڭ – جوبا ءۇشىن اسا ماڭىزدى, سەبەبى ول بولاشاق ستانسانى ورنالاستىرۋعا ەڭ قولايلى الاڭدى انىقتاپ, كەيىنگى جوبالاۋ جۇمىستارى ءۇشىن قاجەتتى ينجەنەرلىك جانە گەولوگيالىق دەرەكتەردى جيناۋعا نەگىز بولادى», دەدى قۋانىشىن جاسىرا الماعان الماسادام ساتقاليەۆ.

اەس قۇرىلىسىنىڭ جوباسى حالىقتىڭ كەڭ قولداۋىمەن جۇزەگە اسىرىلىپ جاتىر. وتكەن جىلعى رەسپۋبليكالىق رەفەرەندۋمدا ەل حالقىنىڭ 70 پايىزدان استامى بۇل باستامانى قولداعان بولاتىن. اسىرەسە, ۇلكەن اۋىلىنداعى تۇرعىنداردىڭ 97 پايىزى قاتىسىپ, ولاردىڭ 90 پايىزعا جۋىعى «جاقتاپ» شىقتى. بۇل جوباعا ۇلكەن قوعامدىق ماندات بەردى.

«قۇرمەتتى ۇلكەن تۇرعىندارى! ۇلكەن – ەلىمىزدىڭ عىلىمي, تەحنولوگيالىق جانە ادامي كاپيتالى داميتىن ورتالىققا اينالىپ جاتىر. جوباعا ينۆەستيتسيالاردىڭ جالپى كولەمى 14-15 ميلليارد دوللارعا جۋىق سوممانى قۇرايدى. سونىمەن قاتار, قوسىمشا 1 ميلليارد دوللار الەۋمەتتىك نىساندار مەن زاماناۋي ينفراقۇرىلىمنىڭ قۇرىلىسىنا بولىنبەك», دەدى قوش حاباردى جەتكىزگەن اگەنتتىك توراعاسى.

ونىڭ ايتۋىنشا جوبادا وتاندىق كاسىپورىندار مەن زەرتتەۋ ۇيىمدارىنىڭ بەلسەندى قاتىسۋىنا ۇلكەن ءمان بەرىلەدى. بۇل جەرگىلىكتى ءوندىرىستى جاڭا دەڭگەيگە شىعارۋعا, مىڭداعان جاڭا جۇمىس ورىندارىن اشۋعا, ال يادرولىق عىلىمدى – جاھاندىق ستاندارتتارعا ساي دامىتۋعا مۇمكىندىك تۋدىرادى.

ء«ىس-شاراعا الماتى قالاسىنداعى MEPhI فيليالىنىڭ ستۋدەنتتەرى, بولاشاق اتوم سالاسى ينجەنەرلەرى قاتىسىپ وتىر. بۇل سيمۆولدىق. جوبا قازىردىڭ وزىندە ەلىمىزدە عىلىم-ءبىلىم مەن ينجەنەرلىك مەكتەپتىڭ دامۋىنا سەرپىن بەرۋدە. اەس جوباسىن جۇزەگە اسىرۋدىڭ ارقاسىندا ەلىمىز مامانداردىڭ جاڭا بۋىنىن, عىلىمي-زەرتتەۋ بازاسىنىڭ دامۋىن, ءبىلىم بەرۋ مەن تەحنولوگيالىق سەرپىلىسكە مۇمكىندىكتەر الادى», دەپ ءسوزىن جالعادى الماسادام ساتقاليەۆ.

اتوم ەلەكتر ستانساسى – اتوم ونەركاسىبىن دامىتۋدىڭ, يندۋستريالىق-يننوۆاتسيالىق پروگرەس پەن ۇزاق مەرزىمدى ەكونوميكالىق ءوسۋدىڭ نەگىزگى درايۆەرىنە اينالاتىن ستراتەگيالىق جوبا. سوندىقتان عالامات جوبانىڭ جۇمىسى باستالعان كۇندى التى الاشقا اق تۇيەنىڭ قارنى جارىلعان كۇن دەپ الاقايلاۋعا دا بولادى.