اتىراۋ وبلىسىندا جىل باسىنان بەرى 4 135 ادام سوتتان تىس بانكروتتىققا ءوتىنىش بەردى. ونىڭ ىشىندە 702 ادامنىڭ سۇرانىسى ماقۇلداندى, دەپ حابارلايدى Egemen.kz.
اتىراۋ وبلىسى بويىنشا مەملەكەتتىك كىرىستەر دەپارتامەنتى دارمەنسىز بورىشكەرلەرمەن جۇمىس باسقارماسىنىڭ باس مامانى شۇعا جانشاەۆانىڭ دەرەگىنە قاراعاندا, قازىر 300 ءوتىنىش قارالىپ جاتىر.
«بانكروت بولۋدى قالاعان 3 مىڭ ادامنىڭ ءوتىنىشى زاڭ تالاپتارىنا سايكەس كەلمەدى. سول سەبەپتەن, ولاردىڭ ءوتىنىشى قاراۋسىز قالدىرىلدى. بانكروتتىق راسىمگە ءوتىنىش بەرۋ ءۇشىن بەرەشەك سوماسى 1600 ايلىق ەسەپتىك كورسەتكىشتەن – شامامەن 6,3 ملن تەڭگەدەن اسپاۋى ءتيىس. قارىزدىڭ وتەلمەگەنىنە كەمىندە 12 اي ءوتۋى, بورىشكەردىڭ تۇراقتى تابىسىنىڭ بولماۋى ماڭىزدى شارتتاردىڭ ءبىرى سانالادى. جىل باسىنان بەرى 71 جەكە تۇلعا سوتتان تىس بانكروت دەپ تانىلدى», دەيدى شۇعا جانشاەۆا.
ونىڭ ايتۋىنشا, بانكروت دەپ تانىلعانداردىڭ بىرنەشە سەبەبى بار. بىرىنشىدەن, باسىم بولىگىنە جۇمىسسىزدىق اسەر ەتكەن. ەكىنشىدەن, تۇراقتى تابىستىڭ بولماۋىنان قارىزىن وتەي الماعان. ۇشىنشىدەن, نەسيە جۇكتەمەسى ارتىپ, قارجىلىق قيىندىققا تاپ بولعان.
ء«وتىنىشى ارنايى تالاپتارعا ساي كەلمەگەندەر ەندى ءۇش ايدان كەيىن قايتا تاپسىرا الادى. بانكروت دەپ تانىلعان جەكە تۇلعالار الداعى بەس جىلدا بانكتەر مەن ميكروقارجى ۇيىمدارىنان نەسيە المايدى. ولاردىڭ قارجىلىق جاعدايى ءۇش جىل بويى باقىلاۋدا بولادى», دەپ ءمالىم ەتتى شۇعا جانشاەۆا.