سالىمشىلاردىڭ جەكە زەينەتاقى شوتتارىنداعى زەينەتاقى جيناقتارى ولار اۋداراتىن جارنالاردان, زەينەتاقى اكتيۆتەرىن باسقارۋ ناتيجەسىندە الىنعان ينۆەستيتسيالىق كىرىستەردەن قۇرالادى. بارلىق زەينەتاقى اكتيۆتەرى بجزق-عا بىرىكتىرىلگەن 2014 جىلعى 1 ساۋىردەن باستاپ 2025 جىلعى 1 شىلدەدەگى جاعداي بويىنشا جيناقتاردىڭ جالپى كولەمىندەگى تازا ينۆەستيتسيالىق كىرىستىڭ ۇلەسى جۇرگىزىلگەن تولەمدەردى ەسكەرگەندە 40,5%-دى قۇرادى, جيناقتالعان تازا ينۆەستيتسيالىق كىرىستىڭ كولەمى 12,18 ترلن تەڭگەدەن استى.
2025 جىلدىڭ العاشقى ايلارىندا بايقالعان قىسقامەرزىمدى اۋىتقۋلارعا قاراماستان, 6 ايداعى ينۆەستيتسيالىق كىرىس شامامەن 350,7 ملرد تەڭگەگە جەتتى. قرۇب باسقاراتىن, مىندەتتى, مىندەتتى كاسىپتىك, ەرىكتى جارنالار ەسەبىنەن قالىپتاستىرىلعان زەينەتاقى اكتيۆتەرىنىڭ كىرىستىلىگى 2024 جىلعى شىلدەدەن باستاپ 2025 جىلعى ماۋسىمعا دەيىنگى كەيىنگى 12 ايدا 12,22%-دى قۇرادى, ينفلياتسيا 11,8% بولدى. جمزج-نىڭ كەيىنگى 12 ايداعى تابىستىلىعى – 12,15%.
نەعۇرلىم ۇزاق كەزەڭدى قاراستىرار بولساق, ورتا, ۇزاق مەرزىم ىشىندە زەينەتاقى جيناقتارىنىڭ جيناقتالعان ينفلياتسيا دەڭگەيىنەن اساتىن وڭ, ناقتى كىرىستىلىگى قامتاماسىز ەتىلەدى. ماسەلەن, 1998 جىلى جيناقتاۋشى زەينەتاقى جۇيەسى قۇرىلعان ساتتەن باستاپ 2025 جىلعى 1 شىلدەگە دەيىن جيناقتالعان ينۆەستيتسيالىق كىرىستىلىك 996,28%-دى قۇرادى. بۇكىل كەزەڭدەگى ينفلياتسيا 892,73%-عا تەڭ.
كەلتىرىلگەن ساندار زەينەتاقى اكتيۆتەرىنىڭ جەكەلەگەن قىسقامەرزىمدى كەزەڭدەردەگى كىرىستىلىگى ولاردى باسقارۋ تيىمدىلىگىنىڭ كورسەتكىشى بولا المايتىندىعىن كورسەتەدى. ويتكەنى قىسقا مەرزىم ىشىندە ەسەپتەلگەن قارجى قۇرالدارى, باسقا وپەراتسيالار بويىنشا سىياقى تۇرىندەگى كىرىستەر ءاردايىم وسى كەزەڭدەگى باعالى قاعازدار مەن ۆاليۋتا باعامدارىنىڭ وزگەرۋىن جابا بەرمەيدى. سوندىقتان ينۆەستيتسيالىق كىرىستى وبەكتيۆتى باعالاۋدى كەم دەگەندە ءبىر جىل ىشىندە جۇرگىزگەن ءجون.
ەلىمىزدە ينفلياتسيا دەڭگەيى ەسكەرىلە وتىرىپ, مىندەتتى زەينەتاقى جارنالارىنىڭ ساقتالۋىنا بىرەگەي كەپىلدىك بەرىلەدى. سالىمشىنىڭ تولەمگە قۇقىعى باستالعان كەزدە جيناقتالعان كىرىستىلىگىنە كەرى اسەرىن تيگىزگەن جەكەلەگەن كەزەڭدەردەگى كىرىستىلىكتىڭ تومەندەۋى جاعدايىندا ايىرمانىڭ وتەماقىسىنا مەملەكەت كەپىلدىك بەرەدى. زەينەتاقى اكتيۆتەرىن ينۆەستيتسيالىق باسقارۋ مەن ەسەپكە الۋ جۇيەسى تولىقتاي اشىق. ءاربىر سالىمشىنىڭ enpf.kz سايتىنداعى نەمەسە ۇيالى قوسىمشاداعى جەكە كابينەتىنەن ءوزىنىڭ ينۆەستيتسيالىق كىرىسىن كورۋگە مۇمكىندىگى بار.