«ماڭعىستاۋ» تۋريستىك ايماعىن دامىتۋدىڭ كەشەندى جوسپارى بەكىتىلدى

قۇجاتتا 9 باعىت بويىنشا سالالىق ماسەلەلەردى جۇيەلى شەشۋ قاراستىرىلعان. ونىڭ ىشىندە: ينفراقۇرىلىمدى دامىتۋ, لوگيستيكا, تسيفرلاندىرۋ, قاۋىپسىزدىكتى قامتاماسىز ەتۋ, كادر دايارلاۋ, ينۆەستيتسيالىق جوبالاردى ىلگەرىلەتۋ جانە باسقا دا باعىتتار بار. جوسپاردى جۇزەگە اسىرۋ كەزەڭىندە جۇزدەن استام ءىس-شارا ۇيىمداستىرۋ كوزدەلەدى.

بولاشاعى زور 12 تۋريستىك نىساننىڭ ىشىندە وڭىردەگى ءتۋريزمدى دامىتۋدىڭ نەگىزگى باعىتتارىنىڭ ءبىرى كەندىرلى تۋريستىك ايماعى بولىپ بەلگىلەندى. ينفراقۇرىلىمدىق ماسەلەلەردى شەشۋ, ونىڭ ىشىندە ينجەنەرلىك كوممۋنيكاتسيالار جۇرگىزۋ, تۋريستىك نىسانداردى ەلەكتر قۋاتىمەن, سۋمەن جابدىقتاۋ جانە كولىك قولجەتىمدىلىگىمەن قامتاماسىز ەتۋ بويىنشا شارالار كەشەنى ىسكە اسىرىلادى. كەندىرلى اۋىلىندا جولدار مەن باسقا دا نىسانداردى جوندەۋدەن بولەك, اۋەجاي سالىنادى. بۇل رەتتە ينۆەستورلار مەن ەكو-بەلسەندىلەردىڭ ۇسىنىستارى ەسكەرىلدى.

اقتاۋ قالاسىندا تەڭىز ۆوكزالى مەن حالىقارالىق دەڭگەيدەگى ستاديون سالۋ جوسپارلانىپ وتىر.

سونداي-اق وڭىردە ءتۋريزمدى ناسيحاتتاۋ ءۇشىن مادەني-سپورتتىق ءىس-شارالار وتكىزۋ كوزدەلگەن.

كەشەندى جوسپار تۋريستەر تارتۋعا قولايلى جاعداي جاساۋعا جانە تۋريستىك ايماقتى ودان ءارى دامىتۋعا قولايلى ينۆەستيتسيالىق احۋال قالىپتاستىرۋعا مۇمكىندىك بەرەدى.

سونىمەن قاتار شاعىن جانە ورتا بيزنەس ءارى قاراي دامۋعا جاڭا سەرپىن الىپ وتىر, بۇل ءۇشىن جوسپاردا «كاسپي اكك» اق جەلىسى ارقىلى تۋريزم سالاسىن جەڭىلدەتىلگەن نەسيەلەۋ باعدارلاماسىن ىسكە قوسۋ كوزدەلگەن.

جوسپار جۇزەگە اسىرىلعاننان كەيىن 2029 جىلعا قاراي ىشكى تۋريستەر سانى 430 مىڭنان 520 مىڭ ادامعا, ال كەلۋشى تۋريستەر سانى 89 مىڭنان 143 مىڭ ادامعا دەيىن ارتادى دەپ كۇتىلىپ وتىر. تۋريزم سالاسىندا جۇمىسپەن قامتىلعاندار سانى 1,7 مىڭ ادامنان 2,7 مىڭ ادامعا دەيىن, جەكە ينۆەستيتسيا كولەمى – 198,9 ملرد تەڭگەگە دەيىن, ال ءوڭىر ەكونوميكاسىنداعى تۋريزم ۇلەسى – 2,2%-دان 3,6%-عا دەيىن وسەدى.