ەتنومەدياتسيانىڭ باستى ماقساتى – قوعامداعى الەۋمەتتىك قاقتىعىستاردىڭ ەتنوسارالىق قاقتىعىسقا اينالۋىنا جول بەرمەۋ, ەتنوسارالىق شيەلەنىستىڭ, الدىن الۋ, تاتۋلاستىققا قول جەتكىزۋ.
ءساۋىر ايىندا وتكەن قازاقستان حالقى اسسامبلەياسىنىڭ ءحححىV سەسسياسىندا پرەزيدەنت قاسىم-جومارت توقاەۆ ۇلتارالىق كەلىسىم مەن تۇراقتىلىقتى نىعايتۋ مەملەكەتتىك ساياساتتىڭ باستى باعىتتارىنىڭ ءبىرى ەكەنىن اتاپ كورسەتە وتىرىپ: «مادەنيەت جانە اقپارات, ىشكى ىستەر, ادىلەت مينيسترلىكتەرى مۇددەلى مەملەكەتتىك ورگاندارمەن, استانا, الماتى, شىمكەنت قالالارىنىڭ جانە وبلىستاردىڭ اكىمدەرىمەن بىرلەسىپ, قازاقستان حالقى اسسامبلەياسىنىڭ ەتنومەدياتسيا سالاسىنداعى جۇمىسىنا جان-جاقتى قولداۋ كورسەتسىن, «ەلدەسۋ جانە تاتۋلاسۋ» جوباسىنىڭ اۋقىمىن كەڭەيتسىن», دەپ تاپسىرما بەردى.
وسى ورايدا ماڭعىستاۋ وبلىسىندا ەتنومەدياتسيا باعىتىندا بىرقاتار جوبا قولعا الىندى. سولاردىڭ ءبىرى – «اسسامبلەيا. پارلامەنت. ءماسليحات» جوباسى. بۇل بويىنشا ماڭعىستاۋ وبلىستىق ءماسليحاتى قازاقستان حالقى اسسامبلەياسىمەن تىعىز بايلانىستا جۇمىس ىستەپ جاتىر. اتالعان جوبا اياسىندا وبلىس, اۋدان, قالا دەپۋتاتتارىنان قحا-نىڭ دەپۋتاتتىق توبى قۇرىلىپ, جوسپارعا سايكەس قابىلداۋ جۇرگىزىلىپ كەلەدى. قابىلداۋدا دەپۋتاتتارمەن بىرگە ەتنومەدياتورلار دا جۇمىس ىستەيدى. سەبەبى دەپۋتاتتاردىڭ قابىلداۋىنا ارىز-شاعىممەن كەلگەن تۇرعىنداردىڭ ەتنوسارالىق قاتىناستارعا قاتىسى زەردەلەنىپ وتىرادى.
تاعى ءبىر ايتا كەتەرلىگى, بيىل اقتاۋ قالاسىنىڭ تۇركى الەمىنىڭ مادەني استاناسى بولىپ بەلگىلەنۋىنە وراي, ماڭعىستاۋ وبلىسىنىڭ ەتنومەدياتسياسىن دامىتۋ جانە شەتەلدەگى ارىپتەستەرمەن تاجىريبە الماسۋ جۇمىستارى دا جوسپارلانعان. بۇل رەتتە الماتى قالاسىندا ۇلتتىق قاۋىپسىزدىك كوميتەتى اكادەمياسى بازاسىندا 2024 جىلدىڭ 23–27 جەلتوقسانى ارالىعىندا وتكەن كۋرستا 2 ەتنومەدياتور بىلىكتىلىگىن ارتتىرسا, 23–27 ماۋسىم ارالىعىندا تاعى دا 4 ەتنومەدياتور ءوز بىلىكتىلىگىن شىڭدادى. ودان بولەك, بيىل تاعى دا ەتنومەدياتورلاردىڭ بىلىكتىلىگىن ارتتىرۋ ماقساتىندا 28 شىلدە مەن 8 تامىز ارالىعىندا 30 ەتنومەدياتور جالپى جانە ارنايى كۋرستاردان ءوتىپ, «پاراسات» مەدياتسيا جانە قۇقىق ورتالىعىنىڭ سەرتيفيكاتىن الدى.
قحا-نىڭ 13 جوباسىنىڭ ءبىرى – «ەلدەسۋ جانە تاتۋلاسۋ» جوباسى بويىنشا جەرگىلىكتى قۇقىق قورعاۋ ورگاندارىمەن تىعىز بايلانىستا جۇمىس ىستەپ كەلەمىز. وسى ورايدا 23 مامىر كۇنى قازاقستان حالقى اسسامبلەياسىنىڭ 30 جىلدىعىنا وراي ماڭعىستاۋ وبلىسى اكىمىنىڭ ورىنباسارى, وبلىستىق ءماسليحات جانە ەتنومەدياتسيا كەڭەسىنىڭ توراعاسى, ماڭعىستاۋ وبلىستىق پروكۋراتۋرا, سوت جانە ءبىلىم باسقارماسى, ماڭعىستاۋ وبلىسىنىڭ كاسىپكەرلەر پالاتاسى, وبلىستىق پوليتسيا دەپارتامەنتى, ماڭعىستاۋ وبلىسى قازاقستان حالقى اسسامبلەياسىنىڭ قۇرىلىمدارى, ەتنومەدياتورلار, ءماسليحات دەپۋتاتتارى, ساياسي پارتيالار, اسسامبلەيا جاستارى قاتىسقان دوڭگەلەك ۇستەل وتكىزىلىپ, ماڭعىستاۋ وبلىستىق ەتنومەدياتسيا كەڭەسى مەن ماڭعىستاۋ وبلىسىنىڭ «اتامەكەن» كاسىپكەرلەر پالاتاسىنىڭ جانە «قوعامدىق كەلىسىم» مەكەمەسى مەن وبلىستىق ءبىلىم باسقارماسىنىڭ اراسىندا جاسالعان مەموراندۋمدارعا قول قويىلدى.
ارينە, اسسامبلەيانىڭ بارلىق باعىتى ماڭىزدى, سەبەبى ولاردىڭ ارقايسىسىندا حالىقتىڭ تاريحى, ابىرويى مەن قادىر-قاسيەتى كورىنىس تابادى. ال ەتنومەدياتورلاردىڭ تاريحي جادىنى ساقتاۋشى ءارى كەلىسىم مەن بەيبىتشىلىك مادەنيەتىن قالىپتاستىرا الاتىن, وتكەندى شىنايى ءتۇسىنۋ مەن مادەني الۋاندىلىقتى قۇرمەتتەۋگە نەگىزدەلگەن دانەكەر تۇلعالار رەتىندەگى ءرولى ەرەكشە.
پرەزيدەنتتىڭ «باستى مىندەت – قازاقستان حالقىنىڭ تاتۋلىعى مەن اۋىزبىرشىلىگىن, مەملەكەتىمىزدىڭ تۇتاستىعى مەن كيەلى تاۋەلسىزدىگىمىزدى نىعايتۋ», دەپ اتاپ كورسەتكەنىندەي, قازاقستان حالقى اسسامبلەياسىنىڭ بيىلعى سەسسياسىندا بەرىلگەن تاپسىرمالاردى باسشىلىققا الا وتىرىپ, قۇقىقتىق مەملەكەت قالىپتاستىرۋ, اعارتۋشىلىق قىزمەت, قاقتىعىستاردىڭ الدىن الۋ جانە ءاربىر ازاماتتى قوعامدىق كەلىسىمدى نىعايتۋ ۇدەرىسىنە تارتۋ ارقىلى تاتۋلىق پەن اۋىزبىرلىك جولىنداعى قىزمەتىمىزدى جالعاستىرا بەرەمىز.
جاڭبىرباي ماتاەۆ,
ماڭعىستاۋ وبلىستىق ءماسليحاتىنىڭ توراعاسى, قحا مەدياتسيا كەڭەسىنىڭ توراعاسى