ۇزىندىعى 1 668 كم ورىنبور – تاشكەنت ماگيسترالىنىڭ قۇرىلىسى باستالعان 1904 جىل – قازاقستاندا تەمىرجول كولىگىنىڭ قۇرىلعان جىلى بولىپ سانالادى. تەمىرجول بويىندا اقتوبە, ورال, تۇركىستان, قىزىلوردا جانە باسقا دا قالالار مەن ونەركاسىپ ورتالىقتارى ءوستى, دەپ حابارلايدى Egemen.kz.
قازاقستان اۋماعىندا العاشقى تەمىرجول ماگيسترالىنىڭ اشىلۋى 1894 جىلى 25 قازاندا – پوكروۆسكايا سلوبودا (قازىرگى رف ساراتوۆ وبلىسىنىڭ ەنگەلس قالاسى) – ورال تار تاباندى جەلىسىنىڭ قۇرىلىسى اياقتالعاننان كەيىن بولعان. وسى تەمىرجولدىڭ 130 شاقىرىمى قازىرگى قازاقستان اۋماعى ارقىلى ءوتتى. 4 جىلدان كەيىن ۋرباح – استراحان تار تابانى ىسكە قوسىلدى, ونىڭ 77 شاقىرىمى دا قازاقستان جەرىنەن وتكەن ەكەن.
سولتۇستىك قازاقستاننىڭ دامۋى ءۇشىن 1891-1896 جىلدارى ءترانسسىبىر ماگيسترالىن سالۋ, اتاپ ايتقاندا ونىڭ 190 شاقىرىمدىق وتاندىق ۋچاسكەسىن قۇرۋ ۇلكەن ماڭىزعا يە بولدى, بۇل جول – حالىقتاردىڭ ەكونوميكالىق جانە مادەني جاقىنداسۋىندا ۇلكەن ءرول اتقاردى. 1914-1917 جىلدارى ارىس – پىشپەك جەتىسۋ جولى – بولاشاق تۇركسىبتىڭ ءبىر بولىگى, 1915 جىلى – چەليابينسك – ترويتسك – قوستاناي ماگيسترالى (قازاقستان بويىنشا 166 كم) سالىندى.