ەلوردا تورىندە ورنالاسقان ۇلتتىق مۋزەيدىڭ «تاريح» زالىندا تۋعانىنا 180 جىل تولىپ وتىرعان ۇلى اقىن اباي قۇنانباي ۇلىنا ارنالعان ارنايى بۇرىش بار. مۇندا اقىن ومىرىنە قاتىستى جادىگەرلەر قويىلىپتى. سونىڭ ءبىرى – مىنا ساماۋرىن.
بۇل جادىگەردىڭ قۇندىلىعى – كەزىندە ساماۋرىننان قازاقتىڭ نەبىر ۇلىلارى شاي ىشكەن. سونىڭ ىشىندە اباي دا بار. وسى ءبىر تاريحي بۇيىمدى 2023 جىلى مۋزەيگە حالىقارالىق اباي اتىنداعى مادەنيەت پەن ونەردى قولداۋ قورىنىڭ پرەزيدەنتى اسلان عافۋروۆ تاپسىرىپتى.
مۇرانى قابىلداپ العان مۋزەي اكتىسىندە: «ساماۋرىن 1893 جىلى تۋلا قالاسىندا جاسالعان. ماتەريالى – مەتالل. ەنى – 47 سم, بيىكتىگى – 53,5 سم, ديامەترى – 27 سم. بۇل ساماۋىردان اباي باستاتقان ۇلى تۇلعالار شاي ىشكەن» دەپ جازىلىپتى.
ال ساماۋرىندى مۋزەيگە وتكىزگەن اسلان قابىلبەك ۇلى جازىپ قالدىرعان مالىمەتكە جۇگىنسەك: «اباي اتىنداعى تۇڭعىش مۋزەي سەمەي قالاسىنداعى ەرتىس ساعاسىندا بوي كوتەرگەن بەكباي بايىسوۆتىڭ ءۇيىنىڭ اۋلاسىندا اشىلعان. ءدال وسى جەردە كوپىر ورنىققان. سەمەيگە كەلگەن قوناقتار وسى الاڭعا توقتاپ, كوپىر ارقىلى قالاعا وتەدى ەكەن. الاڭداعى بەكباي وتباسى ابايمەن جاقسى قارىم-قاتىناستا بولىپتى. دانا اقىن بۇل شاڭىراققا ۇنەمى قوناق بولىپ تۇرعان ەكەن. بۇل ساماۋرىننان اباي جانە ونىڭ ءىنىسى شاكارىم قاجى, بالالارى اقىلباي, ماعاۋيالار شاي ىشكەن», دەپ جازىپتى.
ساماۋرىننىڭ كەيىنگى تاعدىرىن جۇلگەلەپ ايتساق, الاڭداعى مۋزەي كوشىرىلگەن كەزدە بۇل جادىگەردى ايتقالي قىستاۋباەۆ دەگەن ادام ساقتاپ قالعان. وسىلاي ايتقالي بەيسەمباي ۇلىنىڭ جەكە قورىندا ۇزاق جىل ساقتالعان جادىگەر ۇرپاقتان-ۇرپاققا اماناتپەن جەتكەن. 1980 جىلى ۇلتتىق ونەردىڭ جاناشىرى, قازىرگى تاڭدا حالىقارالىق اباي اتىنداعى مادەنيەت پەن ونەردى قولداۋ قورىنىڭ قۇرىلتايشىسى ەرمەك ايتقالي ۇلى ەسكىرگەن ساماۋرىنعا رەستاۆراتسيا جاساتقان. ونى قاراپايىم ۇستا كۋبرين دەگەن ازامات اتقارىپ شىعىپتى. اقىرى بۇل جادىگەر 130 جىلدان كەيىن ەلوردا تورىندەگى مۋزەي قورىنان ورىن العان.