قىزىلوردا, تۇركىستان, جامبىل, الماتى, باتىس قازاقستان, اتىراۋ جانە ماڭعىستاۋ وبلىستارىندا شاڭدى داۋىل مەن نايزاعاي كۇتىلىپ وتىر. كەي جەرلەردە بۇرشاق جاۋى ىقتيمال. جەل ەكپىنى 15-20 م/س, كەي وڭىرلەردە 23-28 م/س-قا دەيىن جەتەدى. قىزىلوردا مەن تۇركىستاندا تۇندە دە اۋا رايى قۇبىلىپ, نايزاعاي مەن قاتتى جەل ساقتالادى.
قاراعاندى, پاۆلودار, اقمولا, قوستاناي, شىعىس قازاقستان, اباي جانە سولتۇستىك قازاقستان وبلىستارىندا نايزاعاي مەن قاتتى جاڭبىر, بۇرشاق جانە داۋىل بولادى دەپ بولجانۋدا. تۇنگى جانە تاڭعى ۋاقىتتا تۇمان تۇسەدى. اتالعان وڭىرلەردە دە جەلدىڭ جىلدامدىعى ارتىپ, قاتتى ەكپىنمەن سوعۋى مۇمكىن.
الماتى وبلىسىنىڭ تاۋلى ايماقتارىندا, جەتىسۋ مەن شىعىس قازاقستاندا نايزاعاي ويناپ, جەل كۇشەيەدى. كوپتەگەن ايماقتا جوعارى جانە توتەنشە ءورت قاۋپى ساقتالىپ وتىر. قاۋىپتىلىك دەڭگەيى اسىرەسە قىزىلوردا, تۇركىستان, جامبىل, باتىس قازاقستان, ماڭعىستاۋ جانە اباي وبلىستارىندا جوعارى.
مەگاپوليستەردە دە جاعداي تۇراقسىز:
الماتىدا كۇندىز نايزاعاي, جەلدىڭ ەكپىنى 18 م/س-قا دەيىن كۇشەيەدى.
شىمكەنتتە دە نايزاعاي, داۋىل جانە شاڭدى داۋىل بولادى.
استانادا بۇرشاق پەن نايزاعاي بولجانۋدا, جەلدىڭ جىلدامدىعى 20 م/س-قا دەيىن جەتۋى مۇمكىن.
مەتەورولوگتار تۇرعىنداردى ساق بولۋعا, الىس جولعا شىقپاۋعا جانە اۋا رايىنا بەيىمدەلگەن قاۋىپسىزدىك شارالارىن ۇستانۋعا شاقىرادى. قاۋىپسىزدىك ماقساتىندا توتەنشە جاعدايلار قىزمەتتەرى كۇشەيتىلگەن رەجيمدە جۇمىس ىستەۋدە.