14-16 تامىز ارالىعىندا استاناداعى جاقسىلىق ۇشكەمپىروۆ اتىنداعى جەكپە-جەك سارايىندا تاەكۆوندودان (WT) Kazakhstan Open 2025 اتتى حالىقارالىق رەيتينگىلىك تۋرنير وتەدى. جارىستىڭ جالپى جۇلدە قورى 15 808 000 تەڭگەنى قۇرايدى, دەپ حابارلايدى Egemen.kz.
قالا اكىمدىگىنىڭ حابارلاۋىنشا, دۇنيەجۇزىلىك تاەكۆوندو فەدەراتسياسىنىڭ (World Taekwondo) رەسمي كۇنتىزبەسىنە ەنگەن بۇل جارىس ءۇش جاس ەرەكشەلىگىن قامتيدى: جاسوسپىرىمدەر, جاستار جانە ەرەسەكتەر ساناتى. قازىرگى تاڭدا 750-دەن استام سپورتشى ءوز قاتىسۋىن راستاعان.
بايراقتى باسەكەگە اۋعانستان, ارمەنيا, كانادا, فرانتسيا, ءۇندىستان, يران, قازاقستان, كۋۆەيت, قىرعىزستان, ومان, ليۋكسەمبۋرگ, ماروككو, نەپال, پاكىستان, پالەستينا, قىتاي, ساۋد ارابياسى, تۇركيا, تۋنيس, بىرىككەن اراب امىرلىكتەرى, اقش جانە بەيتاراپ مارتەبەسى بار (AIN) سپورتشىلار قاتىسادى.
ايتا كەتەيىك, ۇزاق ۇزىلىستەن كەيىن قازاقستان الەمدىك تاەكۆوندو قاۋىمداستىعىنىڭ نازارىن قايتا اۋدارىپ وتىر. بۇعان دەيىن ەلىمىزدە G-1 ساناتىنداعى حالىقارالىق تۋرنيرلەر 2015 جىلى الماتىدا جانە 2017 جىلى اتىراۋدا وتكىزىلگەن بولاتىن.
بيىلعى دودا جاڭارتىلعان حالىقارالىق ستاندارتتار بويىنشا, KPNP K-2 جۇيەسى ارقىلى وتەدى. قازاقستاندا تۇڭعىش رەت ءدال ءارى ءادىل ەسەپكە الۋعا مۇمكىندىك بەرەتىن KPNP كومپانياسىنىڭ جاڭا ەلەكتروندى قولعاپتارى قولدانىلادى. سونىمەن قاتار, بۇل تۋرنير اياسىندا دۇنيەجۇزىلىك تاەكۆوندو فەدەراتسياسىنىڭ كورسەتىلىم توبى العاش رەت ەلىمىزدە ونەر كورسەتەدى.
ءىس-شاراعا دۇنيەجۇزىلىك تاەكۆوندو فەدەراتسياسىنىڭ پرەزيدەنتى دوكتور چۋنگۆون چو, ازيا تاەكۆوندو وداعىنىڭ باسشىسى جانە World Taekwondo كەڭەسىنىڭ وكىلدەرى قاتىسادى دەپ جوسپارلانعان.
قازاقستان تاەكۆوندو فەدەراتسياسىنىڭ پرەزيدەنتى قۇدىرەت شاميەۆ ءتۋرنيردىڭ ەل ىشىندە دە, حالىقارالىق دەڭگەيدە دە تاەكۆوندونىڭ دامۋىنا ىقپال ەتەتىنىن اتاپ ءوتتى.
«Kazakhstan Open ءتۋرنيرىن استانادا وتكىزۋ – حالىقارالىق سپورتتىق ىنتىماقتاستىقتى نىعايتۋعا جانە ەلىمىزدەگى تاەكۆوندونى دامىتۋعا باعىتتالعان ماڭىزدى قادام. ەلوردا تورىندە الەمنىڭ ۇزدىك سپورتشىلارى باس قوسىپ, جاستارعا شابىت بەرەدى, ال قازاقستان ءوز الەۋەتىن جاھانعا تانىتا الادى. بۇل جارىس ەلىمىزدەگى تاەكۆوندو دامۋىنىڭ سەرپىندى جالعاسى بولارىنا سەنەمىن. بىزگە سەنىم ارتقان سەرىكتەستەر مەن دۇنيەۇزىلىك فەدەراتسياعا العىسىمىز شەكسىز», دەدى قۇدىرەت شاميەۆ.