تۇركيانىڭ انكارا قالاسىندا رەسمي ساپارمەن جۇرگەن قازاقستان پرەزيدەنتى قاسىم-جومارت توقاەۆ ىسكەرلىك توپ وكىلدەرىمەن كەزدەسۋ وتكىزدى.
مەملەكەت باسشىسى الدىمەن «YDA Holding» باسقارما توراعاسى حۋسەين ارسلاندى قابىلدادى.
قاسىم-جومارت توقاەۆقا «YDA Holding» كومپانياسىنىڭ قازاقستاندا ىسكە اسىرىلىپ جاتقان ينۆەستيتسيالىق جوبالارى جونىندە مالىمەت بەرىلدى. اتاپ ايتقاندا, تۇركيالىق حولدينگ تۇركىستان, استانا جانە پەتروپاۆل قالالارىندا كوپبەيىندى اۋرۋحانالار سالۋ جانە پايدالانۋ بويىنشا ءۇش جوبانى قولعا العان. كومپانيا الداعى ۋاقىتتا استاناداعى «YDA Industrial Park» كوپسالالى ءوندىرىس كەشەنىن كەڭەيتىپ, سەندۆيچ-پانەلدەر شىعاراتىن زاۋىت سالۋدى باستايدى.
سونىمەن قاتار حۋسەين ارسلان كومپانيانىڭ اقتاۋدا ءمۋلتيمودالدى ترانزيت حابىن قۇرۋعا قاتىستى جوسپارىمەن ءبولىستى.
مەملەكەت باسشىسى حولدينگتىڭ قازاقستانعا ستراتەگيالىق تۇرعىدان قىزىعۋشىلىعىن جانە ەلىمىزدە جۇزەگە اسىرىپ جاتقان ينۆەستيتسيالىق باستامالارىن جوعارى باعالادى.
* * *
ودان سوڭ قاسىم-جومارت توقاەۆ «S Sistem Lojistik» كومپانياسىنىڭ باسقارما توراعاسى حۋسەين ءبارليندى قابىلدادى. كەزدەسۋ بارىسىندا كومپانيامەن لوگيستيكا سالاسىندا ءوزارا ءتيىمدى ءارى ۇزاقمەرزىمدى سەرىكتەستىك ورناتۋ پەرسپەكتيۆاسى تالقىلاندى.
مەملەكەت باسشىسى ەلىمىزدى ەۋرازياداعى جەتەكشى ترانزيتتىك حابقا اينالدىرۋ ءۇشىن ورتا ءدالىزدى جان-جاقتى دامىتۋ جۇمىستارى باستالعانىن جەتكىزدى. بۇل رەتتە قاسىم-جومارت توقاەۆ «S Sistem Lojistik» كومپانياسىنىڭ اقتوبە حالىقارالىق اۋەجايىندا لوگيستيكا ورتالىعىن قۇرۋ باستاماسىنا قولداۋ ءبىلدىردى. جوبا «قازپوشتا» اكتسيونەرلىك قوعامىمەن بىرگە جۇزەگە اسىرىلادى.
حۋسەين بارلين جوبا اياسىندا اتقارىلىپ جاتقان جۇمىستار تۋرالى باياندادى. سونداي-اق كومپانيانىڭ الداعى ۋاقىتتا استانا, الماتى, شىمكەنت جانە اقتاۋ قالالارىندا دا لوگيستيكا ورتالىعىن كەڭەيتۋدى جوسپارلاپ وتىرعانىن جەتكىزدى.
قاسىم-جومارت توقاەۆتىڭ ايتۋىنشا, لوگيستيكا ينفراقۇرىلىمىن كەشەندى تۇردە دامىتۋ وتە ماڭىزدى. مۇنىڭ ءبارى ترانزيت ۋاقىتىن قىسقارتۋعا جانە ەكسپورت ينفراقۇرىلىمىن جاقسارتۋعا مۇمكىندىك بەرەدى.
«S Sistem Lojistik» – تۇركيانىڭ لوگيستيكا سەكتورىنداعى جەتەكشى يننوۆاتسيالىق ۇيىم. كومپانيا ىستانبۇل, انكارا, يزمير جانە انتاليا اۋەجايلارىندا, سونداي-اق باسقا دا جەرلەردە جالپى اۋماعى 100 مىڭ شارشى مەتر قويما جەلىسىن باسقارادى.
* * *
سونىمەن قاتار مەملەكەت باسشىسى «Tiryaki Holding» كومپانياسىنىڭ اتقارۋشى ديرەكتورى سۇلەيمەن تيرياكيوعلىنى قابىلدادى. كەزدەسۋدە پرەزيدەنت قاسىم-جومارت توقاەۆ پەن «Tiryaki Holding» كومپانياسىنىڭ اتقارۋشى ديرەكتورى سۇلەيمەن تيرياكيوعلى اگروونەركاسىپ كەشەنى باعىتىنداعى ءوزارا ءتيىمدى جانە ۇزاقمەرزىمدى سەرىكتەستىك ماسەلەسىن تالقىلادى.
مەملەكەت باسشىسى كومپانيانىڭ استانا قالاسىنان بيداي مەن بۇرشاقتى تەرەڭ وڭدەۋ زاۋىتىن سالۋ تۋرالى شەشىمىنە قولداۋ ءبىلدىردى.
ءوز كەزەگىندە سۇلەيمەن تيرياكيوعلى اتالعان جوبا ەلىمىزدىڭ قايتا وڭدەۋ ونەركاسىبىن دامىتۋعا, زاماناۋي تەحنولوگيالاردى ەنگىزۋگە جانە جەرگىلىكتى مامانداردىڭ بىلىكتىلىگىن ارتتىرۋعا ىقپال ەتەتىنىن ايتتى.
كەزدەسۋدە قازاقستاننىڭ اۋىل شارۋاشىلىعى ونىمدەرىن تاسىمالداۋ ءۇشىن لوگيستيكانى ءتيىمدى ۇيىمداستىرۋ, قويما ينفراقۇرىلىمىن تسيفرلاندىرۋ جانە ەلەۆاتورلاردى جاڭعىرتۋ ماسەلەلەرى قارالدى.
«Tiryaki Holding» – ءداندى, مايلى داقىلدار, جەم-ءشوپ ءوندىرۋ جانە ەكسپورتتاۋ بويىنشا الەمدەگى كوشباسشى كومپانيالاردىڭ ءبىرى.
* * *
مەملەكەت باسشىسى «Orzax Group» باسقارما توراعاسى سەلمان اليموعلىنى قابىلدادى. الەمدەگى بيولوگيالىق بەلسەندى قوسپالار نارىعىندا كوشباسشىلاردىڭ ءبىرى سانالاتىن كومپانيا باسشىلىعىمەن كەزدەسۋدە بىرلەسكەن جوبالاردى جۇزەگە اسىرۋ ماسەلەسى قاراستىرىلدى.
قاسىم-جومارت توقاەۆ «Orzax Group» كومپانياسىنىڭ تۇركىستان وبلىسىندا بيولوگيالىق بەلسەندى قوسپالار وندىرەتىن زاۋىت سالۋ شەشىمىنە قولداۋ ءبىلدىرىپ, بۇل باستاما وتاندىق فارماتسەۆتيكا سالاسىن ارتاراپتاندىرۋعا جانە ەلىمىزدىڭ ەكسپورتتىق الەۋەتىن ارتتىرۋعا ەلەۋلى ۇلەس قوساتىنىن اتاپ ءوتتى.
ءوز كەزەگىندە سەلمان اليموعلى كومپانيانىڭ قازاقستاندا وندىرىستىك بازانى كەڭەيتۋمەن عانا شەكتەلمەي, عىلىمي زەرتتەۋ جانە يننوۆاتسيا باعىتتارىن دا دامىتۋعا نيەتتى ەكەنىن جەتكىزدى.
بۇگىنگى تاڭدا «Orzax Group» بيولوگيالىق بەلسەندى قوسپالاردىڭ 150 ءتۇرىن ءوندىرىپ, الەمنىڭ 60 ەلىنە ەكسپورتتايدى. قازاقستانداعى ءوندىرىس جوباسىنا كومپانيا 40 ميلليون دوللار ينۆەستيتسيا قۇيىپ, 500 ادامدى تۇراقتى جۇمىسپەن قامتۋدى جوسپارلاپ وتىر.