ونەر مەن ەلگە قىزمەت ەتۋدىڭ, ۇلت مەرەيىن ءوسىرۋدىڭ جاۋاپتى جولى بار. سول جول كەنەتتەن ۇزىلسە, حالىق قايعىرادى, ۇلكەن ساحنا تۇلعاسىن جوقتايدى.
كەشە كورنەكتى وپەرا ءانشىسى, «استانا وپەرا» تەاترى وپەرا ترۋپپاسىن باسقارعان تۇلعا, رەجيسسەرلىك ءبولىمنىڭ قىزمەتكەرى, قازاقستاننىڭ ەڭبەك سىڭىرگەن قايراتكەرى بايعالي مومبەكوۆ 69 جاسقا قاراعان شاعىندا دۇنيە سالدى.
1956 جىلى تۇركىستان وبلىسى سارىاعاش اۋدانىندا تۋعان ونەرپاز قۇرمانعازى اتىنداعى الماتى مەملەكەتتىك كونسەرۆاتورياسىنىڭ انشىلىك فاكۋلتەتىن 1986 جىلى بىتىرگەن, وپەرالىق جانە كامەرالىق ءانشى, پەداگوگ. 1999 جىلدان اباي اتىنداعى مەملەكەتتىك اكادەميالىق وپەرا جانە بالەت تەاترىنىڭ ءسوليسى, كەيىن ك.بايسەيىتوۆا اتىنداعى ۇلتتىق وپەرا جانە بالەت تەاترىنىڭ ءسوليسى رەتىندە قازاق ونەرىنە قىزمەت ەتكەن تەنور ءانشى تىڭدارماننىڭ جۇرەگىن ىزگىلىككە, نازعا, اسەمدىككە بولەدى. ءوزى ء«اربىر رومانس تەرەڭ سەزىمگە تولى اقپارات بەرەدى. بۇل مۋزىكا تىڭدارماندى مەيىرىمدىلىككە, قارىم-قاتىناستاعى تازالىققا تاربيەلەپ, ادامدى ليريكالىق ۇيلەسىمدىلىككە باعىتتايدى. ءبىزدىڭ كونتسەرتىمىزگە كەلگەن كورەرمەندە مىندەتتى تۇردە ءپوزيتيۆتى سەزىم پايدا بولادى, ولار جاقسى كوڭىل كۇيدەن قۋات الادى» دەگەنىندەي, كوڭىل تەبىرەنتە شىرقاعان رومانستارى ەل جۇرەگىنەن وشپەك ەمەس.