ورال قالاسىندا ينتەرنەت-الاياقتىققا قاتىسى بار كۇدىكتى تۇرعىنداردى «كەپىلسىز نەسيە راسىمدەيمىن» دەپ الداپ, 1,5 ملن تەڭگەدەن استام قاراجاتتى زاڭسىز يەمدەنگەن, دەپ حابارلايدى Egemen.kz.
باتىس قازاقستان وبلىسى پوليتسيا دەپارتامەنتىنىڭ كيبەرقىلمىسقا قارسى ءىس-قيمىل باسقارماسى مەن ورال قالالىق پب كريمينالدىق پوليتسيا قىزمەتكەرلەرى بىرنەشە الاياقتىققا قاتىسى بار دەگەن كۇدىكپەن 32 جاستاعى قالا تۇرعىنىن ۇستادى.تەرگەۋ بارىسىندا كۇدىكتى Instagram الەۋمەتتىك جەلىسىندە كەپىلسىز نەسيە راسىمدەۋ تۋرالى جالعان جارناما جاريالاپ, ازاماتتاردى WhatsApp مەسسەندجەرىندەگى سىلتەمە ارقىلى ءوتىپ, ميكروكرەديتتىك ۇيىمداردان ونلاين نەسيە الۋعا كوندىرىپ وتىرعان. نەسيە راسىمدەۋ كەزىندە ول قاراجاتتى وزىنە جانە تانىستارىنىڭ بانك شوتتارىنا اۋدارۋدى سۇراعان. جابىرلەنۋشىلەرگە ۆەريفيكاتسيادان ءوتۋ ءۇشىن ارنايى سىلتەمەلەر جىبەرگەن.
نەسيە ماقۇلدانعاننان كەيىن اقشا كورسەتىلگەن ەسەپشوتتارعا, كەيىن كۇدىكتىنىڭ اتىنا تىركەلگەن شوتقا اۋدارىلىپ, قالاداعى ءتۇرلى بانكوماتتار ارقىلى قولما-قول اقشاعا اينالدىرىلعان. كۇدىكتىنىڭ ءۇيىن ءتىنتۋ بارىسىندا 27 تەلەفون, ءتورت SIM-كارتا جانە ءتورت بانك كارتاسى تاركىلەنىپتى. پوليتسيا قازىرگى تاڭدا ءتورت ەپيزود بويىنشا قىلمىستىق ءىس قوزعالعانىن حابارلادى. كەلتىرىلگەن جالپى شىعىن كولەمى — 1,5 ملن تەڭگەدەن استام. كۇدىكتى ۋاقىتشا ۇستاۋ يزولياتورىنا قامالعان, تەرگەۋ ءجۇرىپ جاتىر.
باتىس قازاقستان وبلىسى