شىمكەنت قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا شىمكەنت قالاسى اكىمىنىڭ ورىنباسارى رۋسلان بەردەنوۆكە جاسالعان قاستاندىق ءىسى بويىنشا الدىن الا تىڭداۋ ءوتتى, دەپ حابارلايدى Egemen.kz.
سوت وتىرىسىندا پروكۋرور باۋىرجان كارامانوۆ ايىپتاۋ اكتىسىن وقىپ, بولعان وقيعانىڭ ءمان-جايىن باياندادى.
تەرگەۋ ماتەريالدارىنا سايكەس, 2025 جىلدىڭ 21 ساۋىرىندە ايىپتالۋشى ەرنار جيەمباي شىمكەنت قالالىق قۇرىلىس باسقارماسىنىڭ قۇرىلىس نىساندارىن باقىلاۋ ءبولىمىنىڭ باسشىسىنان اقپارات العان. ول جيەمبايعا رۋسلان بەردەنوۆتىڭ تاپسىرماسىمەن «تۇرعىن ءۇي شىمكەنت» جشس ديرەكتورى قىزمەتىنەن ءوز ەركىمەن كەتۋى ءتيىس ەكەنىن جەتكىزگەن.
ايىپتاۋ تارابىنىڭ مالىمدەۋىنشە, وسى اقپاراتتان كەيىن جيەمبايدا بەردەنوۆتى ءولتىرۋ نيەتى پايدا بولعان. ەموتسيونالدىق كۇيزەلىس جاعدايىندا ول دۇكەننەن سپيرتتىك ىشىمدىك ساتىپ الىپ, ونى كولىگىندە ءىشىپ, كەيىن ۇيىنە بارىپ, «سايگا» ماركالى اڭشى مىلتىعىن العان. مىلتىقتى جۇبايىنا تيەسىلى كولىكتىڭ جۇك سالعىشىندا بىرنەشە ۋاقىت الىپ جۇرگەن.
سول كۇنى كەشكىسىن جيەمباي شىمكەنت قالالىق اكىمدىگى عيماراتىنا بارىپ, بەردەنوۆتى كۇتىپ تۇرعان. ول اكىمنىڭ ورىنباسارىن كورىپ, وعان بەس رەت وق اتقان. شەنەۋنىك جەرگە قۇلاعان سوڭ, جيەمباي جاقىنداپ بارىپ, تاعى وق اتپاق بولعان.
الايدا جارالانعانىنا قاراماستان, رۋسلان بەردەنوۆ قارسىلىق كورسەتىپ, وسى ساتتە ونىڭ جۇرگىزۋشىسى ارالاسىپ, كولىگىمەن ايىپتالۋشىنى قاعىپ, قىلمىستىڭ الدىن العان.
قىلمىستىق ءىس قر قك 24-بابىنىڭ 3-بولىگى جانە 99-بابىنىڭ 1-بولىگى (ادام ولتىرۋگە وقتالۋ) بويىنشا قارالىپ جاتىر. نەگىزگى سوت پروتسەسى 6 تامىز كۇنى ساعات 10:00-دە وتەدى.
ايتا كەتەيىك, سوت تىڭداۋىندا رۋسلان بەردەنوۆ بولماعان. ونىڭ وكىلى شەنەۋنىكتىڭ قازىرگى ۋاقىتتا ەم قابىلداپ جاتقانىن مالىمدەگەن. سۋديا بەردەنوۆكە نەگىزگى سوت وتىرىسىنا جەكە كەلۋ مىندەتىن جۇكتەگەن.
الدىن الا تىڭداۋ اشىق رەجيمدە وتكەن. الايدا جيەمباي ءوز بەينەسىنىڭ تۇسىرىلۋىنە قارسى ەكەنىن بىلدىرگەن.