Zhangjiang عىلىمي-تەحنولوگيالىق پاركىندە, ازيانىڭ «كرەمني القابىندا» ورتالىق ەۋرازيا ەلدەرىنىڭ تەحنولوگيالىق مۇمكىندىكتەرىن قىتايدىڭ ءىرى ەكوجۇيەسىمەن بايلانىستىرۋدى ماقسات ەتكەن العاشقى كاسىبي الاڭ – Khan Tengri Innovation Hub («حان ءتاڭىرى» يننوۆاتسيالىق حابى) ءوز جۇمىسىن رەسمي تۇردە باستادى, دەپ حابارلايدى Egemen.kz.
بۇل جوبا Growth Vision Pro كومپانياسىنىڭ باستاماسىمەن ىسكە قوسىلىپ, قازاقستان رەسپۋبليكاسىنىڭ تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ, سونداي-اق وڭىرلىك تەحنوپاركتەر Astana Hub (قازاقستان) پەن IT Park Uzbekistan-نىڭ قولداۋىمەن جۇزەگە اسقان.
Khan Tengri Innovation Hub — جاڭا بۋىنداعى تەحنولوگيالىق ديپلوماتيانى جۇزەگە اسىرۋعا باعىتتالعان ارنايى پلاتفورما. ول ەۋرازيا وڭىرىندەگى ستارتاپتار مەن جوعارى تەحنولوگيالار سالاسىنداعى كومپانيالاردى قىتاي نارىعىمەن جانە ونىڭ حالىقارالىق مۇمكىندىكتەرىمەن تىكەلەي بايلانىستىرۋدى كوزدەيدى. بۇل باستاما ايماقارالىق تۇراقتى تەحنولوگيالىق سەرىكتەستىككە دەگەن ارتىپ كەلە جاتقان سۇرانىستىڭ ناقتى كورىنىسى بولىپ وتىر.
قر تسيفرلىق دامۋ ءمينيسترى جاسلان ماديەۆ اتاپ وتكەندەي, بۇل حاب وڭىرلىك ستارتاپتار مەن كاسىپكەرلەر ءۇشىن قىتاي ينۆەستورلارىنا جول اشىپ, ينكۋباتسيالىق جانە اكسەلەراتسيالىق باعدارلامالار ارقىلى بيزنەستى دامىتۋعا سەپتىگىن تيگىزەدى.
«Khan-Tengri Innovation Hub وڭىردەگى ستارتاپتار مەن كاسىپكەرلەر ءۇشىن قىتايلىق ينۆەستورلارمەن بايلانىستىراتىن كوپىرگە اينالىپ, ينكۋباتسيالىق جانە اكسەلەراتسيالىق باعدارلامالارعا جول اشادى. ءبىز بۇل حاب ەلىمىزدىڭ تەحنولوگيالىق كومپانيالارى ونىمدەرىن قىتاي نارىعىنا ىلگەرىلەتۋدە ماڭىزدى ءرول اتقارادى دەپ سەنەمىز», دەدى جاسلان ماديەۆ.
جوبانىڭ نەگىزگى مىندەتتەرى:
تسيفرلىق تەحنولوگيالار, عىلىم جانە زەرتتەۋ سالالارىندا حالىقارالىق تەحنولوگيا ترانسفەرىن دامىتۋ; ورتالىق ازياداعى ءىت-كومپانيالار مەن ستارتاپتاردىڭ قىتاي نارىعىنا شىعۋىن قامتاماسىز ەتۋ; قىتايلىق تەحنولوگيالىق بيزنەستىڭ ەۋرازيا, ەۋروپا مەن MENA ەلدەرىنە «ورتا ءدالىز» ارقىلى جەڭىلدەتىلگەن ەنۋىنە جاعداي جاساۋ; بىرلەسكەن عىلىمي-زەرتتەۋ جوبالارىن ىسكە اسىرۋ, تەحنولوگيا الماسۋ مەن ۆەنچۋرلىك كاپيتال تارتۋ; قىتايدا ورتالىق ەۋرازيا ەلدەرىنىڭ يننوۆاتسيالىق بەدەلىن ارتتىرۋ.ايتا كەتەيىك, بۇل باستاما جەرگىلىكتى نارىقتىڭ ەرەكشەلىكتەرىنە بەيىمدەلۋ ۇدەرىسىن جەڭىلدەتۋگە, «جۇمساق قونۋ» (soft-landing) قاعيداتى بويىنشا يكەمدى وتۋگە مۇمكىندىك بەرەدى.
حابتىڭ اۋماعىندا جۇمىس ىستەۋ ءۇشىن بارلىق قاجەتتى ينفراقۇرىلىم قاراستىرىلعان: زاماناۋي كەڭسەلەر, كوۆوركينگتەر, جايلى اپارتامەنتتەر جانە تۇرمىستىق-تەحنيكالىق قولداۋ. بۇل كومپانيالارعا اكىمشىلىك قيىندىقتارعا الاڭداماي, ءوز ونىمدەرىن دامىتۋعا تولىق كوڭىل بولۋگە جاعداي جاسايدى.
سونىمەن قاتار, قاتىسۋشىلارعا زاڭدىق جانە سالىقتىق كەڭەس بەرۋ, ينۆەستورلار مەن وندىرىستىك ارىپتەستەرمەن بايلانىس ورناتۋ, اكسەلەراتسيالىق قولداۋ, مەنتورينگ جانە ىسكەرلىك كەزدەسۋلەر ۇيىمداستىرۋ سياقتى كەشەندى كومەك كورسەتىلەدى.مينيسترلىكتىڭ حابارلاۋىنشا, حابتىڭ اياسىندا قىتايلىق XNode اكسەلەراتورىمەن بىرلەسىپ, ءتۇرلى دامۋ ساتىسىنداعى كومپانيالارعا ارنالعان بىرنەشە باعدارلاما ازىرلەنگەن. اتاپ ايتقاندا:
China Market Entry Bootcamp – قىتاي نارىعىن زەرتتەۋگە جانە شىعۋ ستراتەگياسىن جاساۋعا باعىتتالعان قىسقا مەرزىمدى باعدارلاما; China Launchpad – كومپانيانىڭ قىتايداعى جۇمىسىنا ناقتى جول اشىپ, نارىقتاعى اۋقىمىن كەڭەيتۋگە مۇمكىندىك بەرەتىن تولىققاندى باعدارلاما.باعدارلامالار اياسىندا ستارتاپتار مەنتورلىق قولداۋ الىپ, وقىتۋ سەمينارلارىنا قاتىسىپ, قىتايدىڭ تەحنولوگيالىق ەكوجۇيەسىمەن تىكەلەي تانىسا الادى.