بيىل قىركۇيەك ايىندا «تالدىقورعان – ءۇشارال» ماگيسترالدى گاز قۇبىرىنىڭ قۇرىلىسى تولىق اياقتالادى. بۇل تۋرالى جەتىسۋ وبلىسىنىڭ اكىمى بەيبىت يساباەۆ الاكول اۋدانىنا جاساعان جۇمىس ساپارى بارىسىندا مالىمدەدى, دەپ جازادى Egemen.kz.
ۇزىندىعى 302,4 شاقىرىم بولاتىن قۇبىر اقسۋ, سارقان, الاكول اۋداندارىنداعى 84 ەلدى مەكەندى تابيعي گازبەن قامتاماسىز ەتەدى. ناتيجەسىندە 440 مىڭعا جۋىق تۇرعىن كوگىلدىر وتىنعا قول جەتكىزەدى.
جوبا شەڭبەرىندە 6 اۆتوماتتاندىرىلعان گاز تاراتۋ ستانتسياسى سالىنىپ جاتىر. قازىرگى تاڭدا ولاردىڭ 80%-ى دايىن, ال تورتەۋىندە سىناق جۇمىستارى جۇرگىزىلگەن.
«ينتەرگاز تسەنترالنايا ازيا» اق وكىلدەرىنىڭ ايتۋىنشا, باستاپقىدا قۇرىلىس 2026 جىلدىڭ سوڭىندا اياقتالادى دەپ جوسپارلانعان. الايدا جوبانىڭ الەۋمەتتىك ماڭىزدىلىعىنا بايلانىستى مەرزىمىنەن بۇرىن ىسكە قوسىلماق.
ايماق باسشىسى بۇل باستاما تۇرعىنداردىڭ ءال-اۋقاتىن ارتتىرىپ قانا قويماي, وڭىردەگى كاسىپكەرلىك پەن ءوندىرىستى دامىتۋعا سەرپىن بەرەتىنىن اتاپ ءوتتى.