قاربىز ماۋسىمى باستالدى. ءتاتتى جانە شىرىندى باقشا ونىمىنە اپتاپ ىستىقتا سۇرانىس ارتا تۇسەدى, وسى ورايدا دارىگەرلەر قاربىزدى تىم كوپ مولشەردە جەۋ زيان ەكەنىن ەسكەرتىپ, قاربىزدى تاڭداۋدىڭ بىرنەشە ءتاسىلىن اتادى, دەپ حابارلايلى Egemen.kz.
باقشا ونىمدەرىنىڭ كەز كەلگەن ءتۇرى سەكىلدى ونىڭ دا مولشەرىن شەكتەپ تۇتىنۋ قاجەت. دارىگەرلەردىڭ كەڭەسى بويىنشا, ءبىر رەتتە 200-300 گراممنان ارتىق قاربىز جەۋگە بولمايدى.
ەگەر ءسىز وسى مولشەردەن كوپ جەسەڭىز, اسىرەسە فيزيكالىق بەلسەندىلىك جەتىسپەسە, ارتىق كالوريا مەن قانت جيناقتالۋى مۇمكىن. قاربىزدىڭ كالورياسى كوپ, سونداي-اق ارتىق قانت دەنە سالماعىنا اسەر ەتۋى مۇمكىن.
سونداي-اق قاربىزدى ساتىپ الاتىن ورىننىڭ ساپاسىنا نازار اۋدارۋ ماڭىزدى. ساتۋشىنىڭ سانيتارلىق تالاپتارعا سايكەس كەلۋىن جانە بارلىق قاجەتتى قۇجاتتىڭ بولۋىن تەكسەرىڭىز.
ساتۋشى ورحان ىستىق جازدىڭ ونىمدەرىن جيناپ, پايدا كورمەك. ونىڭ ساتاتىن جولاقتى جەمىسى داعىستاننان جەتكىزىلەدى. تامىزدىڭ باسىندا مۇنداي قاربىزعا سۇرانىس ارتادى.
- ءبىز ەكى توننا قاربىزدى الىپ كەلىپ, ەكى كۇندە ساتىپ جىبەرەمىز. ۇلكەن قاربىزدار 12-15 كيلوگرامم بولادى. پىسكەنى بارابان سياقتى دىبىس شىعارادى. وتە ءدامدى, ءتاتتى, – دەدى ساتۋشى ورحان ابدۋللاەۆ.
ماماندار قاربىزدى تاڭداۋدىڭ بىرنەشە ءتاسىلى بار دەيدى. ولاردى ەستە ساقتاۋ وڭاي:
قابىعى قاتتى جانە جىلتىر بولۋعا ءتيىس, ال جولاقتارى بارىنشا قانىق بولعانى ءجون.
ەندى ءبىر ءتاسىل كوپشىلىككە تانىس. سىرتىن الاقانمەن ۇرساڭىز بارابان سەكىلدى دىبىسى انىق شىعادى.