بولاشاق جۇمىسشى ماماندارىنىڭ باسقوسۋى

جيىندا ءسوز العان پرەمەر-ءمي­نيستردىڭ ورىنباسارى ­ەر­مەك­ كوشەرباەۆ سلەت قاتىسۋ­شى­لا­رىنا ساتتىلىك تىلەي وتىرىپ, جۇ­مىسشى ماماندىقتارىنىڭ ەل دامۋىنا قوسار ۇلەسىنىڭ ەرەكشە ەكەنىن اتاپ ءوتتى.

«مەملەكەت باسشىسى 2025 جىلدى جۇمىسشى ماماندىقتارى جىلى دەپ جاريالادى. بۇل – تەك ءبىر سالاعا مامان دايىنداۋ ەمەس, ەل ەكونوميكاسىنىڭ تىرەگى سانالاتىن ماماندىقتاردىڭ ما­ڭىزىن قايتا باعالاۋ. بىرنە­شە جىل بويى جۇمىسشى مامان­دىقتارىنا دەگەن كوزقاراس بىر­جاقتى ستەرەوتيپتەر ارقىلى قالىپتاستى. الايدا بۇگىندە جاعداي وزگەردى. جۇمىسشى – زاماناۋي تەحنولوگيانى مەڭگەرگەن, ەڭبەك نارىعىندا سۇرانىسقا يە, بىلىكتى مامان. ءبىز مەملەكەت رەتىندە ەڭبەككە لايىقتى قۇرمەت كورسەتۋ ءۇشىن بارلىق جاعدايدى جاساپ جاتىرمىز. سەبەبى جۇمىسشى ماماندارسىز يندۋستريالىق دامۋ, ءوندىرىستى جاڭعىرتۋ مەن ەكونوميكالىق تۇراقتىلىقتى ساقتاۋ مۇمكىن ەمەس. بۇل وزگەرىستىڭ بەل ورتاسىندا سىزدەر – جاس ماماندار تۇرسىزدار», دەدى ە.كوشەرباەۆ.

وقۋ-اعارتۋ مينيسترلىگى تارات­­قان اقپاراتقا سۇيەنسەك, جۇمىسشى ماماندىقتارى جى­لىنىڭ جارتىجىلدىق قورى­تىن­دىسى كوڭىل كونشىتەدى. ايتالىق, جىل باسىنان بەرى 8 مىڭنان كوپ كاسىبي باعدار بەرۋشى پەداگوگ دايارلاندى, جاڭا وقۋ جىلىندا 700-دەن اسا بەيىندى سىنىپ اشىلادى, قازىرگى تاڭدا 352 سىنىپ ىسكە قوسىلدى. 1300 مەكتەپ وقۋشىسى جۇمىسشى ماماندىقتارىنىڭ بازالىق داعدىلارىن مەڭگەرىپ ۇلگەردى. قامقورلىققا الاتىن كاسىپورىندار سانى 7 ەسە ءوستى, مە­كە­مەلەرمەن جاسالعان دۋالدى كەلىسىم سانى 2 ەسەگە ارتتى, بۇگىندە 18 مىڭ كاسىپورىن ستۋدەنتتەر­دى دۋالدى وقىتۋ جۇيەسىمەن دايار­لاپ جاتىر. 185 كوللەدجدىڭ ماتەريالدىق-تەحنيكالىق بازا­سى­ جاڭارتىلادى, ستۋدەنتتەر­دىڭ جا­تاق­حانامەن قامتىلۋى 96%-عا جەتەدى. 1 قىركۇيەكتەن باستاپ تەح­نيكالىق جانە كاسىپ­تىك ءبىلىم بە­رۋ ۇيىمدارىنا جان باسىنا شاق­قانداعى قارجىلان­دىرۋ كولەمى 437 مىڭ تەڭگەدەن 912 مىڭ تەڭگەگە دەيىن, ياعني ەكى ەسەگە ۇلعايادى.

سلەتتە سويلەگەن وقۋ-اعارتۋ ءمينيسترى عاني بەيسەمباەۆ: «بۇگىندە ەڭبەك نارىعىندا تەك ديپلوم عانا ەمەس, ناقتى داعدى ماڭىزدى. قازاقستاننىڭ تەحنيكالىق جانە كاسىپتىك ءبىلىم بەرۋ جۇيەسى جاڭا دەڭگەيگە كوتەرىلىپ كەلەدى. قىتاي, فران­تسيا, تۇركيا, جاپونيا, ۇلىبري­تانيا, گرۋزيا جانە باسقا دا ەلدەرمەن بىرگە 10 حالىقارالىق جوبا ىسكە قوسىلىپ جاتىر. كول­لەدجدەردى حالىقارالىق سەرتي­في­كاتتاۋ العاش رەت قولعا الىندى. ەندى ءبىزدىڭ ستۋدەنتتەر ءوز قۇ­زىرەتتەرىن جاھاندىق ستاندارتتار بويىنشا دالەلدەپ, شەت­ەلدىك تاعىلىمدامالارعا, جۇ­­مىسقا جانە جاھاندىق ەڭبەك نا­­رىعىنا شىعۋ مۇمكىندىگىنە يە بولادى», دەدى.

سلەتكە قاتىسۋشىلاردىڭ اراسىندا جامبىل پوليتەحني­كا­لىق جوعارى كوللەدجىنىڭ 3-كۋرس ستۋدەنتى ايالا بايبولات تا بار. ول گرانتتا وقيدى, ال ايالانىڭ ءبىلىم الاتىن كوللەدجى ينتەرنا­تسيونالداندىرۋ جوباسىنا ال­عاش­­قىلاردىڭ ءبىرى بولىپ ەنگەن.

«پرەزيدەنت جۇمىسشى ما­مان­­دىقتارى جىلىن جاريالا­عان­­دا ماماندىعىمىز بەن ءوز سا­­لامىز بويىنشا ىستەيتىن جۇ­مىسىمىزدىڭ شىنىمەن دە ما­ڭىزدى ەكەنىن سەزىندىك. قازىرگى كوللەدجدەر – بولاشاعى بار تاڭ­داۋ. بىزدە زاماناۋي شەبەر­حانالار اشىلىپ جاتىر, حالىق­ارالىق تاعىلىمدامالار ۇيىم­داس­تىرىلىپ تۇرادى, ەڭ باستىسى ناقتى مۇمكىندىكتەر بار. بۇل سەنىم مەن قولداۋ ءۇشىن العىس ايتامىن», دەدى كوللەدج ستۋدەنتى.

سلەت 3 كۇنگە سوزىلدى. قاتى­سۋشىلار موتيۆاتسيالىق كەزدەسۋلەر, شەبەرلىك ساباقتارى, ينتەراكتيۆتى ءبىلىم بلوكتارىنان وزىنە تەوريالىق-ىسكەرلىك تاجىريبە جيناپ, كوماندالىق تاپسىرمالاردى ورىنداۋ ارقىلى شىڭداپ, مازمۇندى مادەني جانە سپورتتىق باعدارلاماعا اتسالىس­تى. ايتا كەتەيىك, ەلىمىزدە 772 كوللەدج بار, وندا 550 مىڭنان اسا ستۋدەنت ءبىلىم الىپ ءجۇر.