كاسپي تەڭىزىندە قاتتى جەل سالدارىنان جاعالاۋدان الىستاپ كەتكەن 5 ادامدى توتەنشە جاعدايلار مينيسترلىگىنىڭ ماماندارى امان-ەسەن قۇتقارىپ قالدى, دەپ حابارلايدى Egemen.kz.
وقيعا اقتاۋ قالاسىنداعى "بريز" ياحتا-كلۋبى ماڭىندا ۇگىت-ناسيحات جانە پروفيلاكتيكالىق ءىس-شارالار وتكىزۋ كەزىندە بولعان.
SUP-تاقتامەن سەرۋەندەپ جۇرگەن 5 ادام قاتتى جەلگە تاپ بولىپ, 2,5 شاقىرىم قاشىقتىقتا اشىق تەڭىزگە شىعىپ كەتكەن.
وزدىگىنەن جاعاعا ورالا الماعان دەمالۋشىلارعا جەدەل-قۇتقارۋ جاساعىنىڭ قىزمەتكەرلەرى كومەككە كەلگەن.
– قۇتقارۋشىلاردىڭ جەدەل ارەكەتىنىڭ ارقاسىندا 5 ادام جاعاعا ءدىن امان جەتكىزىلدى. ەشقايسىسىنا مەديتسينالىق كومەك قاجەت بولمادى, – دەپ جازدى تجم ءباسپاسوز قىزمەتىنەن.
توتەنشە جاعدايلار مينيسترلىگى ازاماتتاردى جەلدى جانە داۋىلدى كۇندەرى سۋعا شىققاندا اباي بولۋعا, مىندەتتى تۇردە قۇتقارۋ كەۋدەشەلەرىن كيۋگە جانە اۋا رايىن مۇقيات باعالاۋعا شاقىرادى.