قازاقستاندا 2025 جىلعى 1 شىلدەدەگى جاعداي بويىنشا جۇمىس بەرۋشىلەر ءوز قىزمەتكەرلەرىنىڭ پايداسىنا 464 ميلليارد تەڭگە كولەمىندە مىندەتتى زەينەتاقى جارنالارىن (جمزج) اۋداردى. بۇل جارنالار 5,1 ميلليوننان استام جۇمىسكەردى قامتىعان, دەپ حابارلايدى Egemen.kz.
ەستەرىڭىزگە سالا كەتەيىك, 2024 جىلدىڭ 1 قاڭتارىنان باستاپ ەلىمىزدە جۇمىس بەرۋشىنىڭ مىندەتتى زەينەتاقى جارنالارى ەنگىزىلگەن بولاتىن. بۇل جارنالار جۇمىس بەرۋشى تاراپىنان تولەنىپ, ولاردىڭ قىزمەتكەرلەرىنىڭ پايداسىنا اۋدارىلادى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, 2024 جىلى مولشەرلەمە 1,5% بولسا, 2025 جىلدان باستاپ ول 2,5%-دى قۇرادى. جوسپار بويىنشا, بۇل كورسەتكىش 2028 جىلعا قاراي 5%-عا دەيىن بىرتىندەپ وسەتىن بولادى.
«جۇمىس بەرۋشىلەردىڭ جمزج اۋدارۋى جۇمىسكەرلەردى قارتايعان شاعىندا ءومىر بويى قوسىمشا جيناقتاۋشى زەينەتاقى تولەمىمەن قامتاماسىز ەتۋگە مۇمكىندىك بەرەدى. اتالعان شارا قازاقستاندىقتاردىڭ جاس بۋىنىن قولداۋعا باعىتتالعان, ولاردىڭ زەينەتاقى مولشەرى ولاردىڭ زەينەتاقى اۋدارىمدارىنا تىكەلەي بايلانىستى بولادى. ولاردىڭ زەينەتاقىسى ءۇش كومپونەنتتەن قۇرالادى: مەملەكەتتەن بازالىق زەينەتاقى, جيناقتاۋشى – بىرىڭعاي جيناقتاۋشى زەينەتاقى قورىنا ءوز اۋدارىمدارى ەسەبىنەن جانە شارتتى-جيناقتاۋشى – جۇمىس بەرۋشىلەردىڭ جارنالارى ەسەبىنەن بولادى», دەلىنگەن حابارلامادا.
ايتا كەتەيىك, جمزج تولەۋدى جۇمىس بەرۋشىلەر 1975 جىلعى 1 قاڭتاردان كەيىن تۋعان ادامدار ءۇشىن عانا جۇزەگە اسىرادى.
سونىمەن قاتار, قر سالىق كودەكسىنە سايكەس, جۇمىس بەرۋشى تولەيتىن بۇل جارنالار سالىق سالىناتىن تابىستان شەگەرىلەدى. وسىلايشا, جۇمىس بەرۋشى ءۇشىن قوسىمشا جۇكتەمە شامادان تىس اۋىر بولماي, قارجىلىق تۇرعىدا ءتيىمدى جاعداي ساقتالادى.