قىلمىستىق قۇقىق بۇزۋشىلىق ازايىپ, الاياقتىق ارتقان

كوميتەت مالىمەتىنشە, وسى جىلدىڭ العاشقى 6 ايىندا ەلىمىزدە 64 529 قىلمىستىق قۇقىق بۇزۋشىلىق تىركەلگەن. بۇل وتكەن جىلدىڭ سايكەس كەزەڭىمەن سالىستىرعاندا 4 463-كە از, پايىزعا شاققاندا 6,5% تومەندەگەن. سانات بويىنشا جىكتەسەك, اسا اۋىر قىلمىستار سانى  - 58,4%-عا, ورتاشا اۋىرلىقتاعى قىلمىستار - 14%-عا, ونشا اۋىر ەمەس قىلمىستار - 13,4%-عا ازايعان. دەسە دە اۋىر قىلمىستار سانى 2,4%-عا وسكەنى انىقتالعان. 

ال ۇرىپ-سوعۋ, ۇساق ۇرلىق, جول ەرەجەسىن بۇزۋ سىندى قۇقىق بۇزۋشىلىقتار جالپى كورسەتكىشتىڭ 20 پايىزىن قۇراپ وتىر. قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتى جاقىندا اكىمشىلىك قۇقىق بۇزۋشىلىق تۋرالى كودەكستىڭ كەيبىر باپتارىنىڭ قىلمىستىق قۇقىق بۇزۋشىلىق ساناتىنا اۋىسۋى بۇل ساناتتاعى بۇزۋشىلىقتاردىڭ ازايۋىنا ىقپال ەتكەنىن اتاپ وتكەن. 

سونداي-اق, ۇرلىق فاكتىلەرى  27,6%-عا تومەندەگەن. ماسەلەن,  2024 جىلى التى ايدا 16 309 ۇرلىق تىركەلسە, وسى جىلى 11 809 دەرەك تىركەلگەن. 

توناۋ 34%-عا (870 فاكتىدەن 574 فاكتىگە دەيىن), قاراقشىلىق 38,6%-عا (70-تەن 43-كە دەيىن), ادام ءولتىرۋ –18,8%-عا (324-تەن 263-كە دەيىن) , ادام ولتىرۋگە وقتالۋ –32,1% -عا (78-دەن 53-كە دەيىن) بۇزاقىلىق –23%-عا (892-687) زورلاۋ –11,7%-عا (256-دان 226-عا دەيىن) ازايعان. 

جارتى جىلدا جالپى الاياقتىققا قاتىستى 22 812 جاعداي تىركەلگەن. بۇل كورسەتكىش وتكەن جىلمەن سالىستىرعاندا 168 جاعدايعا نەمەسە 0,7%-عا ارتىق. 

ينتەرنەتتەگى الاياقتىق كەرىسىنشە قارقىن العان. ينتەرنەتتەگى الاياقتىق - 24,7%-عا ءوسىپ, 9 936-دان 12 390 جاعدايعا جەتكەن. ازاماتتاردىڭ باسىم بولىگى سايتتاردىڭ, قوڭىراۋلاردىڭ جانە چاتتاردىڭ قۇربانىنا اينالىپ جاتىر.كوميتەت قىلمىسكەرلەر الەۋمەتتىك جەلىلەردى, ونلاين جارنامالاردى, جالعان جەتكىزۋ قىزمەتتەرىن پايدالاناتىنىنا, ءتىپتى بانك شوتتارىن دا قولدان جاسايتىنىنا نازار اۋدارعان.