باكۋدە وتكەن Technoxian Azerbaijan حالىقارالىق چەمپيوناتى اياسىندا ەلىمىزدىڭ «Robotek Grand Tournament» جوباسى رەسمي تۇردە تانىستىرىلدى. روبوتتار شايقاسى مەن درون جارىستارىن قامتىعان بۇل الاڭ – ءداستۇرلى تۇردە ينجەنەرلىك ويلاۋ مەن تەحنيكالىق شىعارماشىلىقتىڭ ەڭ جوعارى دەڭگەيىن كورسەتەتىن بەدەلدى دودا. بيىلعى جارىسقا ازەربايجاننىڭ بارلىق وڭىرىنەن 120-دان استام مەكتەپ پەن جوعارى وقۋ ورنىنىڭ كوماندالارى قاتىسىپ, ۇلتتىق فينال STEM-ءبىلىم بەرۋدىڭ ايتارلىقتاي ىلگەرى دامىعانىن پاش ەتتى, دەپ حابارلايدى Egemen.kz.
اتالعان ءىس-شاراعا ەلىمىزدىڭ اتىنان ارنايى دەلەگاتسيا قاتىسىپ, ءوز تاجىريبەلەرىمەن ءبولىستى. مامىر ايىندا استانادا وتكەن حالىقارالىق «Robotek Grand Tournament» چەمپيوناتىندا ازەربايجاندىق كوماندالاردىڭ جوعارى بەلسەندىلىك تانىتۋى – قوس تاراپ اراسىنداعى ىنتىماقتاستىقتىڭ ناقتى كورىنىسى. وسى چەمپيونات اياسىندا تۇركىتىلدەس ەلدەردىڭ ۇزدىك كوماندالارى باس قوسىپ, «TurkTime!» جاھاندىق باستاماسى شەڭبەرىندە ىنتىماقتاستىق تۋرالى بىرنەشە مەموراندۋمعا قول قويىلعان ەدى.
«حالىقارالىق جارىستاردىڭ تاجىريبەسى كورسەتكەندەي, تسيفرلىق داۋىردە ەلدەر اراسىنداعى شەكارالار ەمەس, يدەيالار مەن تەحنولوگيالار ماڭىزدى. سوندىقتان ءبىز جاڭا مازمۇنداعى وليمپيادالاردى قولعا الىپ جاتىرمىز. سونىڭ ءبىرى – «Caspian Cup» اتتى اشىق چەمپيونات. قازاقستاندىق سەرىكتەستەرىمىزدى باكۋدە كورەتىنىمىزگە سەنىمدىمىز», دەدى «AREA» ينجەنەرلىك اكادەمياسىنىڭ باس ديرەكتورى راحمان راسۋلزادە.
جالپى, ازەربايجان روبوتوتەحنيكانى دامىتۋعا ون جىلدان استام ۋاقىت بۇرىن بەت بۇرعان. بۇگىندە بۇل ەل World Robot Olympiad سەكىلدى جاھاندىق بايقاۋلاردا تۇراقتى جەڭىستەرگە جەتىپ ءجۇر. Technoxian Azerbaijan جوباسىنا ءۇش مينيسترلىك – جاستار جانە سپورت مينيسترلىگى, تسيفرلىق دامۋ جانە كولىك مينيسترلىگى, سونداي-اق يننوۆاتسيالار مەن تسيفرلىق دامۋدى قولداۋ اگەنتتىگى (IDDA) قولداۋ كورسەتىپ وتىر.
«استاناداعى چەمپيونات بىزگە ەرەكشە اسەر قالدىردى. جاڭا استانا – بىرەگەي مەگاپوليس. ەڭ باستىسى, ءبىز قازاقستاندا روبوتوتەحنيكانىڭ جۇيەلى تۇردە دامىپ جاتقانىن كوردىك. «Robotek Grand Tournament» – IT سالاسىنداعى حالىقارالىق ماڭىزى بار برەندكە اينالدى», دەدى ازەربايجانداعى World Robot Olympiad ۇلتتىق ۇيلەستىرۋشىسى كەنان كاريموۆ.
بۇگىندە استاناداعى «Robotek» مەكتەبى وتاندىق ينتەللەكتۋالدىق جوبالاردى الەمدىك دەڭگەيدەگى وليمپيادالارمەن ۇشتاستىرىپ, تەحنولوگيالىق ترانسفورماتسيانىڭ ناقتى ۇلگىسىنە اينالىپ وتىر. پانامادا ەكى جىل بۇرىن قول قويىلعان حالىقارالىق مەموراندۋمدار تابىستى جۇزەگە اسىپ جاتىر.
2025 جىلعى «Robotek Grand Tournament» بۇرىنعىدان دا اۋقىمدى ءوتتى. قازاقستان استاناسىندا وتكەن بۇل دوداعا العاش رەت اقش, بولگاريا, ازەربايجان, مولدوۆا, وزبەكستان, قىرعىزستان, تاجىكستان سىندى ەلدەردەن 25-تەن استام كوماندا قاتىستى.
«تۇركىتىلدەس ەلدەردىڭ تەحنيكالىق ءبىلىم بەرۋ وشاقتارىمەن ءوزارا ارىپتەستىك ورناتۋ – ءبىزدىڭ باستى ماقساتىمىز. باكۋدە وتكەن كەزدەسۋ بارىسىندا چەمپيونات اياسىن كەڭەيتۋ, «Caspian Cup» جوباسىنا قازاقستاندىق كوماندالاردىڭ قاتىسۋى, سونداي-اق بولاشاق بىرلەسكەن جوبالاردىڭ باعىتى ايقىندالدى», دەدى «Robotek» مەكتەبىنىڭ باس ديرەكتورى سانجار شالقاربەكوۆ.
قازىرگى تاڭدا الەمدىك روبوتوتەحنيكا ۇنەمى وزگەرىپ, جاڭارىپ كەلەدى. بۇل سالاداعى ۇلتتىق, وڭىرلىك جانە حالىقارالىق چەمپيوناتتار – جاس ۇرپاقتىڭ جاڭا مۇمكىندىكتەر كەڭىستىگىنە شىعۋىنا جول اشاتىن بىرەگەي الاڭ. قازاقستان مەن ازەربايجان اراسىنداعى ىنتىماقتاستىق – وسى ءۇردىستىڭ ناقتى دالەلى.