«توبىل» لوگيستيكالىق حابىنىڭ قۇرىلىسى باستالدى

ىسكە قوسۋ راسىمىنە پرەمەر-ءمينيسترىنىڭ ورىنباسارى ەرمەك كوشەرباەۆ, قوستاناي وبلىسىنىڭ اكىمى قۇمار اقساقالوۆ, «كەدەنترانسسەرۆيس» اق باس ديرەكتورى ەلنار جۇماتاەۆ جانە Allur كومپانيالارى ديرەكتورلار كەڭەسىنىڭ توراعاسى اندرەي لاۆرەنتەۆ قاتىستى.

جوبا «كەدەنترانسسەرۆيس» اق قاتىسۋىمەن, «ونەركاسىپتى دامىتۋ قورى» اق قولداۋىمەن جۇزەگە اسىرىلىپ جاتىر. لوگيستيكالىق كەشەننىڭ اۋماعى 133,6 گەكتاردى قۇرايدى, ينۆەستيتسيانىڭ جالپى كولەمى – 64 ملرد تەڭگە. «توبىل» كلك جوبالىق قۋاتى – جىلىنا 400 مىڭ جيىرما فۋتتىق كونتەينەرگە (جفە) دەيىن نەمەسە 11 ملن توننادان استام جۇك.

كەشەن لوگيستەردى, وپەراتورلاردى, IT مامانداردى, قىزمەت كورسەتۋشى پەرسونال مەن جاس مامانداردى جۇمىسقا ورنالاستىرۋ ماقساتىندا 500 جاڭا جۇمىس ورنىن قۇراتىن بولادى.

ۇلتتىق ماسشتابتاعى حاب جانە بولاشاق ينفراقۇرىلىمى

پرەمەر-ءمينيستردىڭ ورىنباسارى ەرمەك كوشەرباەۆ ىسكە قوسۋ راسىمىندە سويلەگەن سوزىندە جوبانىڭ ماڭىزى تۋرالى ايتىپ ءوتتى.

ء«بىز جاي عانا لوگيستيكالىق حاب سالىپ جاتقان جوقپىز, ەلدىڭ جاڭا ەكونوميكالىق گەوگرافياسىنىڭ بەرىك نەگىزىن قالاپ جاتىرمىز. «توبىل» لوگيستيكا, تسيفرلاندىرۋ, ءبىلىم جانە يندۋستريا توعىسقان زياتكەرلىك الاڭعا اينالادى. مۇندا جاستار ءۇشىن جاڭا قۇزىرەت, جاڭا جۇمىس ورىندارى قۇرىلماق. بۇل – ايماقتىق ەمەس, ۇلتتىق جوبا, بۇكىل ەلدىڭ وركەندەۋىنىڭ كاتاليزاتورى. كەشەن قازاقستاننىڭ جاھاندىق جەتكىزۋ تىزبەگىندەگى پوزيتسياسىن نىعايتىپ, بيزنەس, ينۆەستورلار ءۇشىن جانە وسىندا, ءوز وتانىندا ءوسىپ, دامىعىسى كەلەتىن ادامدار ءۇشىن جاڭا كوكجيەكتەر اشادى», دەدى پرەمەر-ءمينيستردىڭ ورىنباسارى.

2025 جىلدىڭ ءبىرىنشى جارتىجىلدىعىندا قازاقستان ارقىلى ترانزيتتىك تاسىمالداۋ 16,8 ملن توننانى قۇرادى, بۇل وتكەن جىلدىڭ سايكەس كەزەڭىمەن سالىستىرعاندا 4%-عا ارتىق. «توبىل» كلك ىسكە قوسىلۋى الداعى جىلدارى وسى كورسەتكىشتەرگە قوسىمشا سەرپىن بەرەدى دەپ كۇتىلىپ وتىر.

ايماقتىڭ يندۋستريالدى كلاستەرى ءۇشىن نەگىز 

«جاڭا كەشەن كاسىپورىندار ءۇشىن لوگيستيكالىق شىعىنداردى تومەندەتۋگە, ەكسپورتقا باعدارلانعان وندىرىستەردى دامىتۋعا جانە وڭدەۋ سەكتورىنا جاڭا ينۆەستيتسيالار تارتۋعا جانە جاڭا ونەركاسىپتىك كاسىپورىنداردىڭ پايدا بولۋىنا جاعداي جاسايدى. ءبىز «توبىل» كولىك-لوگيستيكالىق كەشەنى بيزنەس ءۇشىن تارتىمدىلىق نۇكتەسىنە اينالاتىنىنا جانە ءوڭىردىڭ ودان ءارى ونەركاسىپتىك دامۋىنا سەرپىن بەرەتىنىنە سەنىمدىمىز», دەپ اتاپ ءوتتى «توبىل» كولىك-لوگيستيكالىق كەشەنىنىڭ ديرەكتورى ايدىن ءالىموۆ.

كەشەن قىتاي, ورتالىق ازيا, تۇركيا, يران, اۋعانستان جانە ەۋروپانى بايلانىستىراتىن حالىقارالىق كولىك دالىزدەرىنە بىرىكتىرىلەدى. «سولتۇستىك قازاقستان – وڭتۇستىك ورال» باعىتى بويىنشا دا, قحر باعىتىندا دا جۇك اينالىمىنىڭ ارتۋى كۇتىلىپ وتىر.

كەشەن اۋماعىندا ء«بارى ءبىر جەردە» قاعيداتى بويىنشا تەرمينالدار, قويمالار, كەدەندىك راسىمدەۋ, IT جانە سەرۆيستىك ايماقتار ورنالاساتىن بولادى. ناقتى ۋاقىتتا جۇكتەردى باقىلاۋدىڭ ساندىق جۇيەسى قامتاماسىز ەتىلگەن. قۇرىلىستى اياقتاۋ 2027 جىلعا جوسپارلانعان. 

جوبانى جۇزەگە اسىرۋدىڭ وزەكتىلىگى

قوستاناي وبلىسى ەلىمىزدىڭ باستى يندۋستريالىق ورتالىقتارىنىڭ ءبىرى رەتىندەگى مارتەبەسىن بەكىتىپ جاتىر. تەك 2025 جىلدىڭ وزىندە قۋاتتىلىعى جىلىنا 70 مىڭ اۆتوكولىكتى قۇرايتىن KIA زاۋىتىن, جالپى قۋاتتىلىعى 220 مىڭ بىرلىكتەن اساتىن اۆتوكومپونەنتتەر مەن جيىنتىقتاۋىشتار وندىرەتىن كاسىپورىنداردى ىسكە قوسۋ جوسپارلانعان. ال دامىعان لوگيستيكاسىز مۇنداي كلاستەر مۇمكىن ەمەس. «توبىل» كولىك-لوگيستيكالىق كەشەنى ايماقتا وندىرىلەتىن ونىمدەردىڭ تۇراقتى ەكسپورتىنىڭ جۇيەلى ينفراقۇرىلىمدىق تىرەگى بولماق جانە ەۋرازيالىق كەڭىستىكتەگى ىنتىماقتاستىقتىڭ جاڭا مۇمكىندىكتەرىن اشادى.