پرەمەر-مينيستر جاپون گۋبەرناتورىمەن كەزدەستى

قازاقستان جاپونيامەن كەڭەيتىلگەن ستراتەگيالىق ارىپتەستىكتى دامىتۋعا ۇلكەن ءمان بەرەدى. بۇل باعىتتا ەل ۇكىمەتى پرەزيدەنت قاسىم-جومارت توقاەۆ بەلگىلەگەن مىندەتتەردى دايەكتى تۇردە جۇزەگە اسىرىپ جاتىر.

كەزدەسۋ بارىسىندا «حيروشيما – سەمەي» باستاماسىن جالعاستىرۋدىڭ, سونداي-اق Mayors for Peace حالىقارالىق قوزعالىسى اياسىندا ءبىلىم الماسۋدىڭ ماڭىزدىلىعى اتاپ ءوتىلدى. تاراپتار يادرولىق قارۋدى تاراتپاۋ تۋرالى شارتتىڭ (ياقتش) الدا وتەتىن شولۋ كونفەرەنتسياسى شەڭبەرىندە ودان ارعى ءوزارا ءىس-قيمىلعا ءازىر ەكەندىكتەرىن ءبىلدىردى.

جاپون گۋبەرناتورى يادرولىق قارۋدى تاراتپاۋ ماسەلەلەرىندە جاپونيا مەن قازاقستاننىڭ ىنتىماقتاستىعى اسا ماڭىزدى ەكەنىن اتاپ ءوتتى.

ء«بىز قازاقستاننىڭ حالىقارالىق ارەناداعى قولداۋىن جوعارى باعالايمىز. ساپارىمىزدىڭ ءبىر ماقساتى – دوستىقتى نىعايتۋ. ەكى ەلدە دە يادرولىق قارۋ سالدارىنان جينالعان مول تاجىريبە بار. ءبىز حيروشيمالىقتار ءوزىمىزدى ماڭىزدى ميسسيامىز بار جاندارمىز دەپ سانايمىز, ول – الەمدى يادرولىق قارۋدان ازات ەتۋ جولىندا تىنىمسىز ەڭبەك ەتۋ. قازاقستان – يادرولىق قارۋدى تاراتپاۋ تۋرالى قوزعالىستىڭ ورتالىق ازياداعى مۇشەسى», دەدى حيدەحيكو يۋزاكي.

«قازاقستان رادياتسيادان زارداپ شەككەندەردى مەديتسينالىق جانە الەۋمەتتىك قولداۋ, سونداي-اق رادياتسيالىق مەديتسينا سالاسىنداعى تەحنولوگيالاردى ازىرلەۋ جانە ەنگىزۋ سياقتى باعىتتار بويىنشا جاپونيامەن ىنتىماقتاستىقتى تەرەڭدەتۋگە ۇمتىلادى. ءبىز جاپونيا ۇكىمەتىنە سەمەيدەگى يادرولىق سىناقتار سالدارىمەن كۇرەسۋ ءۇشىن وتەۋسىز گرانت بەرۋ نيەتىنە العىس بىلدىرەمىز. بۇل باستاما مەديتسينالىق كومەك كورسەتۋ ساپاسىن ارتتىرۋعا ورنىقتى تۇردە ۇزاقمەرزىمدى اسەر ەتەتىنىنە سەنىمدىمىز», دەپ اتاپ ءوتتى ولجاس بەكتەنوۆ.

ايتا كەتسەك, 2024 جىلدىڭ قورىتىندىسى بويىنشا قازاقستان مەن جاپونيا اراسىنداعى تاۋار اينالىمى $1,8 ملرد-تى قۇرادى. قازىرگى ۋاقىتتا قازاقستاندا 60-تان استام جاپوندىق كومپانيا تابىستى جۇمىس ىستەپ جاتىر. سوڭعى 20 جىلدا جاپون بيزنەسى قر ەكونوميكاسىنا شامامەن $8,3 ملرد ينۆەستيتسيا سالدى. Toyota, Hitachi, Marubeni جانە باسقا دا كومپانيالارمەن ءىرى جوبالار جۇزەگە اسىرىلدى.