وتكەن اپتادا نەگىزگى ۇلتتىق بىرىڭعاي تەستىلەۋ (ۇبت) ءتامامدالدى. قورىتىندى قالاي؟ نەگىزگى تەستىلەۋدىڭ ماڭىزى سول, تالاپكەرلەر وسىنىڭ ناتيجەسىمەن گرانت كونكۋرسىندا باق سىناي الادى. ال بايقاۋ قاشان؟
326 ادام تىيىم سالىنعان زاتتى الىپ كىرمەك بولعان
اۋەلى ۇمىتكەرلەر اراسىندا «ناعىز ۇبت» اتالىپ كەتكەن تەستىلەۋدىڭ قورىتىندىسىنا ۇڭىلەيىك. 210 مىڭنان اسا ادام 2025 جىلعى نەگىزگى سىناقتى تاپسىردى, ولاردىڭ ىشىندە 681-ءى – ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر. تالاپكەردىڭ 76,5%-عا جۋىعى – قازاق تىلىندە, 23,5%-ى – ورىس تىلىندە, 149 ادام اعىلشىن تىلىندە تەستىلەۋدەن ءوتتى.
تەستىلەۋ قورىتىندىسىندا 161 مىڭعا جۋىق تالاپكەر شەكتى بالل جينادى, بۇل جالپى قاتىسۋشى سانىنىڭ 76%-ىن قۇرايدى. بەس ءپان بويىنشا ۇبت-نىڭ ورتاشا بالى 69-دى قۇرادى. ەڭ جوعارى 140 بالدى ۇبت-نى وتكىزۋدىڭ ءبىرىنشى اپتاسىندا تۇركىستان وبلىسىنىڭ تۇلەگى ءابىلحان جانىبەك جينادى. 598 ادام 130 بالدان جوعارى ناتيجەگە قول جەتكىزدى.
بيىل اپەللياتسياعا 92 مىڭنان كوپ ءوتىنىش قابىلدانىپ, سونىڭ ىشىندە 104 بىرەگەي تەست تاپسىرماسىنا قاتىستى وتىنىشتەر قاناعاتتاندىرىلدى. اپەللياتسيا بويىنشا رەسپۋبليكالىق كوميسسيا جۇمىسىن اياقتادى, تالاپكەرلەردىڭ سەرتيفيكاتتارى جەكە كابينەتتە قولجەتىمدى.
نەگىزگى ۇبت-نى وتكىزۋ كەزەڭىندە 711 ەرەجە بۇزۋشىلىق تىركەلدى. سمارتفوندار, سمارت-ساعاتتار, ميكروقۇلاققاپتار سياقتى تىيىم سالىنعان قۇرىلعىلار مەن شپارگالكالاردى الىپ وتۋگە تىرىسۋ جاعدايلارى ءجيى بولدى. سول سەبەپتەرگە بايلانىستى 326 تالاپكەر تەستىلەۋدەن وتە المادى. سىناق بارىسىندا اۋديتوريالاردان 380 قاتىسۋشى شىعارىلىپ, ولاردىڭ ناتيجەسى دە جويىلدى. بەينەجازبالار قارالعان سوڭ, تاعى 5 ادامنىڭ ناتيجەسى جويىلدى. بەينەجازبالارعا تالداۋ جۇرگىزۋ وسى جىلدىڭ 31 قازانىنا دەيىن جالعاساتىنىن ەسكە سالا كەتۋ كەرەك. بۇل بارلىق قاتىسۋشى ءۇشىن ناتيجەلەردىڭ ادالدىعى مەن وبەكتيۆتىلىگىن قامتاماسىز ەتۋگە مۇمكىندىك بەرمەك.
كوپ كۇتتىرگەن كونكۋرس
ەندى كونكۋرس ماسەلەسىنە ويىسساق, تالاپكەرلەردەن گرانتتار كونكۋرسىنا قاتىسۋ ءۇشىن وتىنىشتەر 2025 جىلعى 13–20 شىلدە ارالىعىندا قابىلدانادى, قابىلداۋ باستالىپ كەتتى. ءبىلىم گرانتى يەگەرلەرىنىڭ ءتىزىمى 10 تامىزعا دەيىن جاريالانادى.
تالاپكەرلەرگە نەگىزگى ۇبت-نى ەكى رەت تاپسىرىپ, ەڭ ۇزدىك ناتيجەمەن گرانت كونكۋرسىنا قاتىسۋ مۇمكىندىگى ۇسىنىلدى. وسىلايشا, 210 مىڭ تالاپكەر ۇبت-نى 381 مىڭ رەت تاپسىردى.
كونكۋرسقا ءوتىنىش قابىلداۋ وتكەن جەكسەنبىدە باستالعانىن جوعارىدا جازدىق, سول ءبىرىنشى كۇننىڭ قورىتىندىسىنا قاراساق, 10 مىڭنان اسا ۇمىتكەر گرانت بايگەسىنە قاتىسۋعا نيەت ءبىلدىرىپ, قۇجاتتارىن جولداپ ۇلگەرىپتى.
ەڭ كوپ ءوتىنىش «پەداگوگيكالىق عىلىمدار» جانە «ينجەنەرلىك, وڭدەۋ جانە قۇرىلىس سالالارى» باعىتتارىنا تۇسكەن.
بيىل قۇجاتتاردى egov.kz پورتالى ارقىلى ونلاين نەمەسە جوعارى وقۋ ورىندارىنداعى قابىلداۋ ورتالىقتارى ارقىلى (كەز كەلگەن جاقىن ورنالاسقان جوو-دا) تاپسىرۋعا بولادى.
گرانت كونكۋرسىنا قاتىسۋ ءۇشىن تالاپكەرلەر جەكە كۋالىك, ۇبت سەرتيفيكاتىن, 3ح4 كولەمىندەگى فوتو, ورتا ءبىلىم تۋرالى اتتەستات (تەحنيكالىق جانە كاسىپتىك ءبىلىم ۇيىمدارىنىڭ تۇلەكتەرى ءۇشىن ديپلوم) تاپسىرۋ كەرەك. سونداي-اق جەڭىلدەتىلگەن سانات بويىنشا كونكۋرسقا قاتىسۋ ءۇشىن راستايتىن قۇجاتتار ۇسىنىلادى.
شەكتى بالل مەن مۇمكىندىكتەر
ءبىلىم گرانتتارى كونكۋرسىنا قاتىسۋ جانە اقىلى نەگىزدە وقۋعا ءتۇسۋ ءۇشىن ۇبت ناتيجەلەرى بويىنشا كەلەسى شەكتى بالل بەلگىلەندى:
- «قۇقىق» جانە «پەداگوگيكالىق عىلىمدار» باعىتتارى بويىنشا – كەمىندە 75 بالل;
- «دەنساۋلىق ساقتاۋ جانە الەۋمەتتىك قامتاماسىز ەتۋ (مەديتسينا)» باعىتى بويىنشا – كەمىندە 70 بالل;
- ۇلتتىق جوعارى وقۋ ورىندارىنا ءتۇسۋ ءۇشىن – كەمىندە 65 بالل, بىراق قازاق ۇلتتىق سۋ شارۋاشىلىعى جانە يرريگاتسيا ۋنيۆەرسيتەتىنە ءتۇسۋ ءۇشىن – كەمىندە 50 بالل بولىپ وتىر;
- باسقا جوعارى وقۋ ورىندارىنا ءتۇسۋ ءۇشىن – كەمىندە 50 بالل;
دەسە دە اكادەميالىق ەركىندىك تالاپتارىنا ساي جوعارى وقۋ ورىندارى ءبىلىم گرانتتارىن تاعايىنداۋ كونكۋرسىنا قاتىسۋ جانە اقىلى نەگىزدە وقۋعا قابىلداۋ ءۇشىن ءوز شەكتى بالدارىن وزدەرى بەلگىلەۋگە قۇقىلى ەكەنىن ەسكە سالعان ءجون.
اۋىلدىق جەرلەردەن شىققان جانە الەۋمەتتىك وسال توپتارعا جاتاتىن تالاپكەرلەردى قولداۋ ماقساتىندا قابىلداۋ ناۋقانى اياسىندا ارنايى شارالار قاراستىرىلعان. اتاپ ايتقاندا, گرانتتار كونكۋرسىنا قاتىسۋ بارىسىندا مەملەكەت بەكىتكەن كۆوتالار بار. مىسالى, كوپ جىلدان بەرى جۇزەگە اسىرىلىپ كەلە جاتقان «سەرپىن» جوباسى بار, وڭتۇستىك وڭىرلەردەن سولتۇستىك قازاقستان, اقمولا, شىعىس قازاقستان, پاۆلودار, قاراعاندى, قوستاناي وبلىستارىندا, سونداي-اق اباي جانە ۇلىتاۋ وبلىستارىندا ورنالاسقان جوعارى وقۋ ورىندارىنا تەگىن وقۋعا مۇمكىندىك بەرەتىن جوبا بويىنشا بيىل 2 مىڭنان اسا گرانت قاراستىرىلماق. وعان قوسا ءار وبلىستىڭ ءوز گرانتتارى مەن ارنايى كۆوتالارى بولادى, بۇل تالاپكەرلەردى, اسىرەسە مىقتى مامان بولۋعا سۇرانىپ تۇرعان الەۋەتى جوعارى ۇمىتكەرلەردى ءوز وڭىرىندە وقۋىن جالعاستىرۋعا جاعداي جاسايدى. سونىمەن قاتار وقۋعا تۇسۋشىلەردە الىس-جاقىن شەتەلدەردەگى جەتەكشى جوعارى وقۋ ورىندارىنىڭ ەلىمىزدەگى فيليالدارىندا ءبىلىم الۋعا مۇمكىندىگى بار. قازاقستانداعى شەتەلدىك ءبىلىم ورداسى فيليالىنا تۇسكىسى كەلەتىن تالاپكەر قانداي قۇجاتتار كەرەك ەكەنىن قالاعان وقۋ ورنىنىڭ وزىنەن عانا بىلە الادى, ويتكەنى ءار ۋنيۆەرسيتەت قابىلداۋدى وزىنشە جۇرگىزەدى.