ەلوردادا ءوتىپ جاتقان قوعام بەلسەندىسى جانە قايىرىمدىلىق قورىنىڭ قۇرىلتايشىسى پەريزات قايراتقا قاتىستى سوت پروتسەسىندە كۋاگەرلەردەن جاۋاپ الىنىپ جاتىر. سوتتا ءسوز العاندار «Biz birgemiz Qazaqstan – 2030» قوعامدىق بىرلەستىگىنىڭ قۇرىلتايشىلارى رەتىندە كورسەتىلگەنىمەن, قۇجاتتارعا قول قويماعاندارىن مالىمدەدى, دەپ حابارلايدى Egemen.kz.
كۋاگەرلەردىڭ ءبىرى – بۇعان دەيىن «جاس وتان» جاستار ۇيىمىنىڭ ۆولونتەرى بولعان سەرگەي ماتيۋشەنكو – 2021 جىلى پەريزات قايراتتىڭ كەڭسەگە شاقىرىپ, دايىن حاتتاما ۇسىنىپ, قۇرىلتايشى بولۋعا كەلىسىم سۇراعانىن ايتقان. قۇجاتتا وزگە تۇلعالاردىڭ اتى-ءجونى مەن قولتاڭبالارى الدىن الا تولتىرىلعان كورىنەدى.
ماتيۋشەنكو ءبىرىنشى قۇجاتقا قول قويعانىمەن, ەكىنشى حاتتاماعا قاتىسى جوق ەكەنىن, ونداعى قولدىڭ وزىنىكى ەمەس ەكەنىن ناقتىلادى. سوت وتىرىسىندا پەريزات قايرات پەن كۋاگەر اراسىندا قىسقاشا ديالوگ بولدى. ايىپتالۋشى ونىڭ شىنايى جاۋابىن سۇراعاندا, ماتيۋشەنكو:
«ەكىنشى حاتتاماعا قول قويعان جوقپىن», دەپ جاۋاپ بەردى.
سوت بارىسىندا سونداي-اق بىرلەستىك قۇرىلتايشىلارى رەتىندە تانىلعان تاعى ەكى كۋاگەر دە حاتتاماداعى قولتاڭبالاردى مويىنداماعان. ولار دا قۇجاتقا ەشقاشان قول قويماعاندارىن جەتكىزدى.
قازىرگى ۋاقىتتا ءىس بويىنشا سوت وتىرىسى جالعاسىپ جاتىر.