شىمكەنت قالاسى اكىمدىگى زاڭسىز قۇرىلىس نىساندارىمەن كۇرەستى كۇشەيتتى. وسىعان بايلانىستى شاھار اۋماعىندا سالىنعان قۇرىلىس عيماراتتارىن ءسۇرۋ جۇمىستارى بۇگىندە زاڭ تالاپتارى اياسىندا ىسكە اسىرىلىپ جاتىر, دەپ حابارلايدى Egemen.kz.
ماسەلەن جاقىندا شىمكەنت قالالىق ورتا ساپاسى جانە باقىلاۋ باسقارماسى تاراپىنان «REAL PACK» جشس-نە تيەسىلى قۇرىلىس نىسانىنا تەكسەرۋ جۇرگىزىلگەن بولاتىن. ناتيجەسىندە, «قيال الەمى» ساياباعىنا ىرگەلەس جاتقان اجەتحانا قۇرىلىسىنا بەرىلگەن جالپى كولەمى 0,9326 گا جەر ۋچاسكەسى قازاقستان رەسپۋبليكاسى جەر كودەكسىنىڭ تالاپتارىنا قايشى بەرىلگەنى جانە اتالعان اۋماققا زاڭسىز قۇرىلىس جۇمىستارى جۇرگىزىلگەندىگى انىقتالدى. وسىعان وراي ورتاق پايدالانۋ اۋماعىنان زاڭسىز بەرىلگەن 1 گەكتارعا جۋىق جەر ۋچاسكەسىندە سالىنعان 3 قاباتتى زاڭسىز قۇرىلىس عيماراتى سوت شەشىمىنە سايكەس بۇزىلدى.
جوعارىدا اتالعان باسقارما وكىلدەرى قۇقىق بۇزۋشىلىقتارعا بايلانىستى اتالعان سەرىكتەستىك اكىمشىلىك جاۋاپكەرشىلىككە تارتىلىپ, ايىپپۇل سالىنعانىن مالىمدەدى. بۇگىن سوت شەشىمىنە سايكەس 3 قاباتتى قۇرىلىس نىسانىن بۇزۋ جۇمىستارى جۇرگىزىلدى.
بۇدان بۇرىن دا شىمكەنت قالالىق ورتا ساپاسى جانە باقىلاۋ باسقارماسىنىڭ قىزمەتكەرلەرى ەڭبەكشى اۋدانى, توعىس تۇرعىن الابىنداعى زاڭسىز سالىنعان نىساندى انىقتاعان بولاتىن. زاڭ تالاپتارىنا سايكەس مەنشىك يەسىنە قۇرىلىس جۇرگىزۋ بارىسىندا «قازاقستان رەسپۋبليكاسىنداعى ساۋلەت, قالا قۇرىلىسى جانە قۇرىلىس قىزمەتى تۋرالى» زاڭىنىڭ تالاپتارىن ساقتاماعانى ءۇشىن (جوبالاۋ قۇجاتتاماسىنسىز, اۆتورلىق جانە تەحنيكالىق قاداعالاۋسىز, سونداي-اق قۇرىلىستىڭ باستالعانى تۋرالى حابارلاماسىز) 900 مىڭ تەڭگەدەن استام ايىپپۇل سالىندى. سونىمەن قاتار اتالعان قۇرىلىستىڭ جەر تەلىمىنەن تىس سالىنعان بولىگى ءوز ەركىمەن بۇزىلدى.
وسى ورايدا باسقارما وكىلدەرى كەز-كەلگەن عيماراتتىڭ قۇرىلىسىن باستار الدىندا قولدانىستاعى زاڭ تالاپتارى مەن قۇرىلىس نورمالارىن قاتاڭ ساقتاۋ قاجەتتىگىن ەسكەرتەدى.
تالاپتاردىڭ ورىندالماۋى ءىرى كولەمدە ايىپپۇل سالۋعا جانە نىساندى ماجبۇرلەپ بۇزۋعا اكەپ سوعۋى مۇمكىن ەكەنىن ەسكە سالادى.
شىمكەنت