2025 جىلدىڭ 1 جارتىجىلدىعىندا الماتىدا 220 ەسكى تۇرعىن ءۇي يەسى جاڭا جايلى پاتەرگە كوشتى. قونىس اۋدارۋ جۇمىستارىن الماتى قالاسى اكىمدىگىنىڭ «الماتى» اكك ەنشىلەس ۇيىمى «قالالىق كۇردەلى قۇرىلىس كاسىپورنى» جشس مەن ينۆەستورلار «الماتى قالاسىنىڭ تۇرعىن ءۇيدى جاڭارتۋ باعدارلاماسى – 2030» اياسىندا جۇزەگە اسىرىپ وتىر, دەپ حابارلايدى Egemen.kz.
الماتىلىقتار جاڭا باسپانانى «بولمە ورنىنا بولمە» قاعيداتى بويىنشا نەمەسە بۇرىنعى تۇرعىن ءۇيىنىڭ نارىقتىق قۇنىنا سايكەس وتەماقى الۋ ارقىلى يەلەنىپ وتىر. جاڭارتۋ باعدارلاماسى اياسىندا بارلىق پاتەر تولىق ارلەنىپ, دايىن كۇيىندە بەرىلدى. ۇيلەرگە ينتەرنەت جۇرگىزىلىپ, ورتكە قارسى دابىل جۇيەسى, سانتەحنيكا, فايانس, گاز نەمەسە ەلەكتر پليتاسى ورناتىلعان.
سونىمەن بيىل ەڭ تۇرعىنى كوپ تۇركسىب اۋدانىندا – 99 ادام, المالى اۋدانىندا – 57, جەتىسۋ اۋدانىندا – 32, اۋەزوۆ اۋدانىندا – 20, بوستاندىق اۋدانىندا – 7, الاتاۋ اۋدانىندا – 3 جانە مەدەۋ اۋدانىندا – 2 ادام جاڭا پاتەرگە قونىستاندى.باعدارلاماعا سايكەس, كوشىرۋ مەن عيماراتتاردى ءسۇرۋ جۇمىستارى بارلىق مەنشىك يەلەرىنىڭ كەلىسىمىمەن عانا جۇرگىزىلەدى. ەرەكشە كۇتىمدى قاجەت ەتەتىن ادامدار ءۇشىن ءبىرىنشى قاباتتان نەمەسە جەدەلساتى, پاندۋسى, كەدەرگىسىز قولجەتىمدىلىگى بار ۇيلەردەن پاتەر قاراستىرىلعان. قالا تۇرعىندارىنىڭ قاۋىپسىزدىگىن قامتاماسىز ەتۋ ماقساتىندا اسىرەسە, قامىستى ۇيلەر مەن تەكتونيكالىق جارىق ايماعىندا ورنالاسقان عيماراتتاردى سۇرۋگە ەرەكشە كوڭىل بولىنەدى.
بەرىلگەن باسپاناعا كوشۋدەن باس تارتقان جاعدايدا تۇرعىندار ەسكى ۇيدە تۇرا بەرەدى, بىراق ىقتيمالدى قاۋىپ-قاتەرلەرگە وزدەرى جاۋاپتى بولادى. بيىل جىل سوڭىنا دەيىن «قالالىق كۇردەلى قۇرىلىس كاسىپورنى» مەن ينۆەستورلاردىڭ كۇشىمەن تاعى 600-دەن استام ادامدى جاڭا تۇرعىن ۇيمەن قامتاماسىز ەتۋ جوسپارلانىپ وتىر.
«جاڭارتۋ باعدارلاماسى كەشەندى تاسىلگە نەگىزدەلگەن. تۇرعىن ءۇي عانا ەمەس, سونىمەن بىرگە قالا تۇرعىندارىنىڭ ءومىر سالتى وزگەرەدى: جايلى ورتا قالىپتاسىپ, جاڭا قوعامدىق كەڭىستىكتەر, جۇمىس ورىندارى مەن قىزمەتتەر پايدا بولادى. سونىمەن قاتار, الماتىنىڭ ساۋلەتتىك كەلبەتى جاڭارادى. 2030 جىلعا دەيىن قالاداعى ەسكى ۇيلەردىڭ سانىن 1 366-دان 690-عا دەيىن ازايتىپ, شامامەن 7 500 مەنشىك يەسىن زاماناۋي پاتەرگە كوشىرۋ جوسپارلانىپ وتىر», دەدى «قالالىق كۇردەلى قۇرىلىس كاسىپورنى» جشس باسقارما توراعاسى رينات قۇرمانوۆ.
«الماتىنىڭ تۇرعىن ءۇيدى جاڭارتۋ باعدارلاماسى – 2030» قالالىق اكىمدىك تاراپىنان ازىرلەنىپ, 2024 جىلدىڭ قاراشا ايىندا ءماسليحات بەكىتكەن بولاتىن. باعدارلامانى «الماتى» اكك» اق اكىمشىلىگى مەن ۋاكىلەتتى ۇيىم الماتى قالاسى اكىمدىگىنىڭ «قالالىق كۇردەلى قۇرىلىس كاسىپورنى» جشس جۇزەگە اسىرىپ وتىر.