قازاقستاندىق ءانشى مەرەي ايىمبەتوۆا (ساحناداعى ەسىمى – Merey) ءوزىنىڭ Instagram ستوريسىندە 2023 جىلى جارىق كورگەن «ۇيقى حانشايىمى» ءانى مەن درەيك, PARTYNEXTDOOR جانە Yebba بىرىگىپ شىعارعان جاڭا «Die Trying» ترەگىنىڭ اۋەنىن سالىستىردى. ونىڭ ايتۋىنشا, ەكى ءاننىڭ مەلودياسى ءبىر-بىرىنە تىم ۇقساس, دەپ جازادى Egemen.kz.
رەسمي تۇردە ەشقانداي ارىز بەرىلمەسە دە, مەرەي بۇل قاراپايىم سايكەستىك ەمەس, ناقتى كوشىرمە دەپ وتىر.
درەيككە قاتىستى مۇنداي داۋلار بۇرىن دا بولعان. ونى بىرنەشە رەت وزگە ورىنداۋشىلاردىڭ ءستيلىن, مۋزىكالىق باعىتىن رۇقساتسىز قولداندى دەپ ايىپتاعان. ماسەلەن, XXXTentacion-نان فلوۋ, بريتان ارتىستەردەن ستيل, افريكالىق ورىنداۋشىلاردان ساۋند العانى تۋرالى كوپ ايتىلعان.
ال, ەلىمىزدىڭ جاس تالانتى, ءانشى MEREY – شىمكەنت قالاسىنىڭ تۋماسى. ونىڭ مۋزىكالىق ءبىلىمى بولماسا دا, ءوزىن-ءوزى ۇيرەتكەن ونەرپاز. جاس ورىنداۋشى اندەرىنىڭ اۋەنى مەن ءسوزىن ءوزى جازادى.