جاز ماۋسىمىندا سۋعا شومىلۋ كەزىندە قاۋىپسىزدىك تالاپتارىن ەلەمەۋ ادام ومىرىنە ۇلكەن قاتەر توندىرەدى. وسىعان بايلانىستى توتەنشە جاعدايلار مينيسترلىگى (تجم) ازاماتتارعا سۋداعى قاراپايىم ەرەجەلەردى قاتاڭ ساقتاۋ كەرەكتىگىن ەسكەرتىپ, ءتۇسىندىرۋ جۇمىستارىن كۇشەيتتى. قۇتقارۋشىلار اسىرەسە بالالاردىڭ قاۋىپسىزدىگىنە باسا نازار اۋداردى, دەپ حابارلايدى Egemen.kz.
شومىلۋ ماۋسىمىندا سۋداعى جازاتايىم وقيعالاردىڭ الدىن الۋ جانە ازاماتتاردىڭ قاۋىپسىزدىك مادەنيەتىن قالىپتاستىرۋ ماقساتىندا تجم قىزمەتكەرلەرى بەلسەندى پروفيلاكتيكالىق جۇمىس جۇرگىزىپ جاتىر.
مينيسترلىكتىڭ ايتۋىنشا, سۋ ايدىندارىنداعى جازاتايىم وقيعالاردىڭ كوپشىلىگى رۇقسات ەتىلمەگەن جانە جابدىقتالماعان سۋ كوزدەرىندە بولادى. ءاربىر ازامات سۋ ايدىندارىنداعى قاۋىپسىزدىك ەرەجەلەرىن قاتاڭ ساقتاۋى ءتيىس.
ەلىمىزدىڭ سۋ ايدىندارىندا ادامداردىڭ قازا بولۋ فاكتىلەرىن بولدىرماۋ جانە ازايتۋ ماقساتىندا تجم سۋدىڭ جانىندا بولعان كەزدە قاراپايىم قاۋىپسىزدىك ەرەجەلەرىن ساقتاۋ قاجەتتىگىن ەسكە سالادى.