«eGov.kz» پورتالىندا كوللەدجدەرگە قۇجات قابىلداۋ ناۋقانى باستالدى. بيىل بۇل قىزمەت ايتارلىقتاي جاڭارتىلعان. ءوتىنىش بەرۋ جۇيەسىنە جاڭا فۋنكتسيا قوسىلىپ, وقۋ ورنىن جىلدام تاڭداپ, ۋاقىت ۇنەمدەۋگە مۇمكىندىك بەرەدى.
ەندى ءوتىنىش بەرۋ كەزىندە تالاپكەر جاتاقحانا نەمەسە تەگىن تاماقتانۋ قاجەت ەكەنىن بىردەن كورسەتەدى. سونداي-اق اسكەري قىزمەتىن تولىق وتەگەن ازامات ساناتىن راستايتىن قۇجاتتى تىركەي الادى.
بيىل اتالعان جۇيەگە وقۋ ورنىن تاڭداۋ كەزىندە سۇزگىدەن وتكىزەتىن تەتىك ەنگىزىلگەن. مۇندا تالاپكەر تاڭداعان تالاپتارعا ساي كوللەدجدەردىڭ ءتىزىمىن اۆتوماتتى تۇردە قالىپتاستىرادى. وقۋ ءتىلى كورسەتىلگەننەن كەيىن جۇيەدە تەك سول تىلدەگى وقۋ ورىندارى شىعادى. سونىمەن قاتار «سەرپىن» باعدارلاماسىنا قاتىساتىن وڭىرلەردەگى اۋىل مەكتەپتەرىنىڭ تۇلەكتەرىنە جەكە سۇزگىدەن وتكىزەتىن تەتىك جاسالعان.
ايتا كەتەيىك, ءار تالاپكەر ءوتىنىشتى ءبىر رەت قانا بەرە الادى. بۇل رەتتە ءتورت ءتۇرلى كوللەدجگە دەيىن ءتورت ماماندىق تاڭداۋ مۇمكىندىگى بار. قۇجاتتاردىڭ جالپى كولەمى 5 مەگابايتتان اسپاۋعا ءتيىس.
ازات ەسەن