ەلىمىزدە ءورت قاۋپى كەزەڭى باستالعالى بەرى 261 ورمان ءورتى تىركەلدى. جالپى ءورت اۋماعى 27 مىڭ گەكتاردان استى. بۇل تۋرالى توتەنشە جاعدايلار مينيسترلىگى ورتكە قارسى قىزمەت كوميتەتىنىڭ توراعاسى ەرلان تورەگەلديەۆ مالىمدەدى, دەپ جازادى Egemen.kz.
ونىڭ مالىمەتىنشە, ءورت قاۋىپسىزدىگى ەرەجەلەرىن ساقتاماعانى ءۇشىن 3 000-نان استام ادام اكىمشىلىك جاۋاپكەرشىلىككە تارتىلىپ, 52 ميلليون تەڭگەدەن استام ايىپپۇل سالىنعان. بۇدان بولەك, 16 دالا ءورتى (اۋدانى 14,5 مىڭ گەكتار) جانە 1 357 جانۋ دەرەگى تىركەلگەن.
«ورمان القاپتارىندا سۋ شاشۋ قۇرىلعىلارى بار اۆياتسيا كەزەكشىلىك اتقارادى. بۇگىندە 24 بورت دايىندىقتا تۇر. 26 ورمانشىلىقتا مينيسترلىكتىڭ كۇشتەرى 36 مەحانيكالاندىرىلعان كۇزەت بەكەتىن قۇردى. تابيعي ورتتەردىڭ الدىن الۋدىڭ جاڭا مودەلى ءورت سانىن بارىنشا ازايتۋعا مۇمكىندىك بەردى. ەلىمىزدىڭ ورمان-دالا القاپتارىندا الدىن الۋ شارالارىن جۇرگىزۋ ءۇشىن توتەنشە جاعدايلار مينيسترلىگى, پوليتسيا جانە ورمان شارۋاشىلىعى مەكەمەلەرىنىڭ قىزمەتكەرلەرى قاتارىنان موبيلدىك توپتار قۇرىلدى», دەدى ول.
ەرلان تورەگەلديەۆتىڭ ايتۋىنشا, قازىرگى ۋاقىتتا ەلىمىزدىڭ بىرنەشە وڭىرىندە وتە جوعارى ءورت قاۋپى ساقتالىپ وتىر. وسىعان بايلانىستى ازاماتتارعا ەلدى مەكەندەردە, ورمان القاپتارىندا, ەگىن ماڭىندا وت جاعۋعا قاتاڭ تىيىم سالىنادى.